പാരീസ്: ഫ്രഞ്ച് പ്രസിഡന്‍റ് ഇമ്മാനുവൽ മാക്രോണും ഭാര്യ ബ്രിജിറ്റും അമേരിക്കൻ വലതുപക്ഷ പോഡ്‌കാസ്റ്റർ കാൻഡസ് ഓവൻസിനെതിരെ 22 വകുപ്പുകൾ ചുമത്തി മാനനഷ്ടക്കേസ് ഫയൽ ചെയ്തു. ബ്രിജിറ്റ് ഒരു പുരുഷനാണെന്നുള്ള ഓവൻസിന്‍റെ വാദങ്ങൾക്കെതിരെയാണ് ഈ നിയമനടപടി. ഡെലവെയർ സുപ്പീരിയർ കോടതിയിൽ ഫയൽ ചെയ്ത കേസിൽ, ഓവൻസ് മാക്രോൺ ദമ്പതികൾക്കെതിരെ ഒരു വർഷത്തോളം നീണ്ടുനിന്ന അപകീർത്തികരമായ പ്രചാരണം നടത്തിയെന്ന് മാക്രോൺ ദമ്പതികളുടെ അഭിഭാഷകൻ ടോം ക്ലെയർ ആരോപിക്കുന്നു.
കൺസർവേറ്റീവ് കമന്‍റേറ്ററായ കാൻഡസ് ഓവൻസ് കഴിഞ്ഞ മാർച്ചിൽ ഫ്രാൻസിന്‍റെ പ്രഥമ വനിത ഒരു പുരുഷനാണോ?” എന്ന തലക്കെട്ടിലുള്ള ഒരു യൂട്യൂബ് വീഡിയോയിലൂടെ ഈ അസംബന്ധമായ ഗൂഢാലോചന സിദ്ധാന്തത്തിന് വീണ്ടും ജീവൻ നൽകുകയായിരുന്നുവെന്ന് പരാതിയിൽ പറയുന്നു. എക്സിൽ വ്യാപകമായി പ്രചരിപ്പിച്ച ഈ ഗൂഢാലോചന സിദ്ധാന്തം രാഷ്ട്രീയ ചരിത്രത്തിലെ ഏറ്റവും വലിയ വിവാദമായിരിക്കാൻ സാധ്യതയുണ്ട് എന്ന് ഓവൻസ് അവകാശപ്പെട്ടു.
ഓവൻസ് തന്‍റെ ഏകദേശം 4.5 ദശലക്ഷം യൂട്യൂബ് സബ്‌സ്‌ക്രൈബർമാർക്കായി ബ്രിജിറ്റ് മാക്രോണിനെക്കുറിച്ച് നിരവധി വീഡിയോകൾ നിർമ്മിച്ചിട്ടുണ്ട്. ബികമിംഗ് ബ്രിജിറ്റ് എന്ന പേരിലുള്ള ഒരു മൾട്ടി-പാർട്ട് സീരീസും ഇതിൽ ഉൾപ്പെടുന്നു. ഈ വാദങ്ങളെ പ്രോത്സാഹിപ്പിക്കുന്ന ഉൽപ്പന്നങ്ങൾ ഓവൻസ് വിറ്റഴിച്ചിട്ടുണ്ടെന്നും കേസിൽ ആരോപിക്കുന്നുണ്ട്.
