എലോണ്‍ മസ്‌ക് മുതല്‍ ലാറി പേജ് വരെ… ഏറ്റവും ധനികരായ ഈ അഞ്ചുപേര്‍ എന്താണ് പഠിച്ചത്?രസകരമാണ് ഇക്കാര്യങ്ങള്‍

നന്നായി പഠിച്ചാല്‍, നന്നായി സമ്പാദിക്കാമെന്നും മികച്ച ജോലി നേടാമെന്നും പലരും കുട്ടികളെ ഉപദേശിക്കാറുണ്ട്. എന്നാല്‍, നന്നായി സമ്പാദിക്കുന്ന നന്നായി പഠിക്കാതിരുന്നവരും നമുക്കിടയിലുണ്ട്. അതില്‍ ലോകത്തിലെ ഏറ്റവും ധനികരായ ആളുകള്‍ ഉണ്ടെന്നറിഞ്ഞാലോ?. ലോകത്തിലെ ഏറ്റവും ധനികരായ ആളുകള്‍ എന്താണ് പഠിച്ചതെന്നും ഏതൊക്കെ കാര്യങ്ങളാണ് അവര്‍ പിന്തുടര്‍ന്നതെന്നും നിങ്ങള്‍ എപ്പോഴെങ്കിലും ചിന്തിച്ചിട്ടുണ്ടോ? ലോകത്തിലെ ഏറ്റവും ധനികരായ വ്യക്തികളില്‍ ചിലര്‍ സ്‌കൂള്‍ പാതിവഴിയില്‍ ഉപേക്ഷിച്ചരാണ്. പിന്നീട് സംരംഭകരായി വളരാന്‍ അവരെടുത്ത വിലയേറിയ തീരുമാനങ്ങളാണ് അവരെ വേറിട്ടുനിര്‍ത്തിയത്.

2025 ല്‍ ഫോര്‍ബ്സ് ലോകത്തിലെ ഏറ്റവും ധനികരായി തിരഞ്ഞെടുത്ത എലോണ്‍ മസ്‌ക് മുതല്‍ ലാറി പേജ് വരെ എന്താണ് പഠിച്ചതെന്ന് നോക്കിയാലോ?

എലോണ്‍ മസ്‌ക്

    65 കോടിയിലധികം ഉപയോക്താക്കളുള്ള സമൂഹമാധ്യമമായ എക്‌സിന്റെയും ടെസ്ല, സ്പേസ് എക്സ് പോലുള്ള നിരവധി മുന്‍നിര കമ്പനികളുടെയും സിഇഒ ആണ് എലോണ്‍ മസ്‌ക്. അമിത ചെലവുകള്‍ നിയന്ത്രിക്കുന്നതിന് ലക്ഷ്യമിട്ടുള്ള രണ്ടാമത്തെ ട്രംപ് ഭരണകൂടത്തിന്റെ ഗവണ്‍മെന്റ് എഫിഷ്യന്‍സി ഡിപ്പാര്‍ട്ട്മെന്റിനെ (DOGE) നയിച്ചതിലും അദ്ദേഹം കഴിവുതെളിയിച്ചിരുന്നു. നിലവില്‍ അദ്ദേഹത്തിന്റെ ആസ്തി 415.6 ബില്യണ്‍ ഡോളറാണ്. പെന്‍സില്‍വാനിയ സര്‍വകലാശാലയില്‍ നിന്ന് ഭൗതികശാസ്ത്രത്തില്‍ ബാച്ചിലര്‍ ഓഫ് ആര്‍ട്സും സര്‍വകലാശാലയിലെ വാര്‍ട്ടണ്‍ സ്‌കൂളില്‍ നിന്ന് സാമ്പത്തിക ശാസ്ത്രത്തില്‍ ബാച്ചിലര്‍ ഓഫ് സയന്‍സും അദ്ദേഹം പഠിച്ചു. സ്റ്റാന്‍ഫോര്‍ഡ് യൂണിവേഴ്സിറ്റിയുടെ മെറ്റീരിയല്‍സ് സയന്‍സില്‍ ബിരുദാനന്തര ബിരുദ പ്രോഗ്രാമില്‍ ചേര്‍ന്നു, പക്ഷേ അത് പൂര്‍ത്തിയാക്കാതെ ജോലി അന്വേഷിക്കാന്‍ തുടങ്ങുകയായിരുന്നു.

    ലാറി എലിസണ്‍
    ഇന്ന് ഭൂമിയിലെ ഏറ്റവും ധനികരായ രണ്ടാമത്തെ വ്യക്തിയാണ് ഒറാക്കിളിന്റെ സഹസ്ഥാപകനായ ലാറി എലിസണ്‍. ഇദ്ദേഹത്തിന് 270.9 ബില്യണ്‍ ഡോളര്‍ ആസ്തിയുണ്ട്. ലാറി ചിക്കാഗോ സര്‍വകലാശാലയിലും ഇല്ലിനോയിസ് സര്‍വകലാശാലയിലും പഠിച്ചു, പക്ഷേ ബിരുദം പൂര്‍ത്തിയാക്കുന്നതിന് മുമ്പ് അദ്ദേഹവും ജോലിതേടിപ്പോകുകയായിരുന്നു.

    മാര്‍ക്ക് സക്കര്‍ബര്‍ഗ്
    ഫേസ്ബുക്ക്, ഇന്‍സ്റ്റാഗ്രാം, വാട്ട്സ്ആപ്പ് എന്നിവയുടെ മാതൃകമ്പനിയായ മെറ്റയുടെ സിഇഒയാണ് മാര്‍ക്ക് സക്കര്‍ബര്‍ഗ്. 253 ബില്യണ്‍ ഡോളര്‍ ആസ്തിയുള്ള ലോകത്തിലെ മൂന്നാമത്തെ ധനികനാണ് ഇദ്ദേഹം. ഹാര്‍വാര്‍ഡ് സര്‍വകലാശാലയില്‍ ചേര്‍ന്നെങ്കിലും പിന്നീട് സംരംഭകനാകാനുള്ള യാത്രയില്‍ ശ്രദ്ധ കേന്ദ്രീകരിക്കാന്‍ അത് ഉപേക്ഷിച്ചു. സ്‌കൂള്‍ കാലഘട്ടത്തില്‍ ഗണിതശാസ്ത്രത്തില്‍ മിടുക്കുതെളിയിച്ച അദ്ദേഹത്തിന് ഒന്നിലധികം അവാര്‍ഡുകള്‍ ലഭിച്ചിരുന്നു.

    ജെഫ് ബെസോസ്
    ലോകത്തിലെ ഏറ്റവും മികച്ച സര്‍വകലാശാലകളില്‍ 22-ാം സ്ഥാനത്തുള്ള പ്രിന്‍സ്റ്റണ്‍ സര്‍വകലാശാലയില്‍ നിന്ന് ഇലക്ട്രിക്കല്‍ എഞ്ചിനീയറിംഗിലും കമ്പ്യൂട്ടര്‍ സയന്‍സിലും ബിരുദം നേടിയ വ്യക്തിയാണ് ജെഫ് ബെസോസ്. ആമസോണിന്റെ സ്ഥാപകനായ ജെഫ് ബെസോസിന്റെ ആസ്തി 239.4 ബില്യണ്‍ ഡോളറാണ്, ലോകത്തിലെ നാലാമത്തെ ധനികനാണ്.

    ലാറി പേജ്
    ഗൂഗിളിന്റെ സഹസ്ഥാപകനായ ലാറി പേജിന്റെ ആസ്തി 178.3 ബില്യണ്‍ ഡോളറാണ്. ലാറി മിഷിഗണ്‍ സര്‍വകലാശാലയില്‍ നിന്ന് കമ്പ്യൂട്ടര്‍ എഞ്ചിനീയറിംഗും സ്റ്റാന്‍ഫോര്‍ഡ് സര്‍വകലാശാലയില്‍ നിന്ന് കമ്പ്യൂട്ടര്‍ സയന്‍സില്‍ ബിരുദാനന്തര ബിരുദവും നേടിയിട്ടുണ്ട്.

      More Stories from this section

      family-dental
      witywide