ആഗോള അയ്യപ്പ സംഗമം വൻ വിജയമാണെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. മുഖ്യമന്ത്രി പിണറായി വിജയനെ തനിക്ക് വലിയ ഇഷ്ടമാണെന്നും അദ്ദേഹം മനസുകൊണ്ട് ഒരു ഭക്തനാണെന്നും വെള്ളാപ്പള്ളി പറഞ്ഞു. സംഗമത്തിന്റെ തുടക്കം മുതൽ പിന്തുണ പ്രഖ്യാപിച്ച വെള്ളാപ്പള്ളി, മുഖ്യമന്ത്രിക്കൊപ്പം ഒരു വാഹനത്തിൽ വേദിയിലെത്തി. “അദ്ദേഹവും ഞാനും പരസ്പരം പിന്തുണച്ച് മുന്നോട്ട് പോകുന്നു. പിണറായി തന്നെ അടുത്ത തവണയും മുഖ്യമന്ത്രിയാകണം,” അദ്ദേഹം മാധ്യമപ്രവർത്തകരോട് പറഞ്ഞു.
മുഖ്യമന്ത്രി പിണറായി വിജയൻ അയ്യപ്പനെ ഹൃദയംകൊണ്ട് സ്വീകരിച്ചുവെന്നും അദ്ദേഹം ഭക്തനാണെന്നും വെള്ളാപ്പള്ളി അവകാശപ്പെട്ടു. “വിളക്ക് വാങ്ങാതിരിക്കാമായിരുന്നു, പക്ഷേ അദ്ദേഹം അത് സ്വീകരിച്ചു. ഇത് ഭക്തിയുടെ ലക്ഷണമാണ്,” വെള്ളാപ്പള്ളി കൂട്ടിച്ചേർത്തു. ആഗോള അയ്യപ്പ സംഗമത്തിന്റെ വിജയത്തിന് മുഖ്യമന്ത്രിയുടെ സാന്നിധ്യവും പിന്തുണയും നിർണായകമായിരുന്നുവെന്ന് അദ്ദേഹം വ്യക്തമാക്കി. ഇരുവരും ഒരുമിച്ചെത്തിയത് സംഗമത്തിന്റെ പ്രാധാന്യം വർധിപ്പിച്ചു.
ഇടതുപക്ഷത്ത് മുഖ്യമന്ത്രിയാകാൻ യോഗ്യതയുള്ള ഏക വ്യക്തി പിണറായി വിജയനാണെന്ന് വെള്ളാപ്പള്ളി നടേശൻ ആവർത്തിച്ചു. “എല്ലാവരെയും ഒരുമിച്ച് കൊണ്ടുപോകാനുള്ള കഴിവും ശക്തിയും പിണറായിക്ക് മാത്രമേ ഉള്ളൂ,” അദ്ദേഹം പറഞ്ഞു. സംഗമത്തിന്റെ വിജയവും മുഖ്യമന്ത്രിയുടെ പങ്കാളിത്തവും സമൂഹത്തിൽ ഐക്യവും ഭക്തിയും ശക്തിപ്പെടുത്തുമെന്ന് വെള്ളാപ്പള്ളി പ്രത്യാശ പ്രകടിപ്പിച്ചു.
