വാഷിംഗ്ടൺ: സർക്കാർ ഷട്ട്ഡൗൺ അവസാനിപ്പിക്കാൻ ഇരുപക്ഷവുമായും ചേർന്ന് പ്രവർത്തിക്കുന്നുണ്ടെങ്കിലും, തടസ്സവാദം ഒഴിവാക്കാനുള്ള പ്രസിഡൻ്റ് ഡോണൾഡ് ട്രംപിൻ്റെ വാദം ബലമുള്ളതാണെന്ന് എന്ന് റിപ്പബ്ലിക്കൻ സെനറ്റർ കാറ്റി ബ്രിട്ട് അഭിപ്രായപ്പെട്ടു.
“പ്രസിഡൻ്റ് ട്രംപ് ഇന്നലെ വളരെ ബലവത്തായ ഒരു വാദമാണ് മുന്നോട്ട് വെച്ചത്. നമ്മുടെ മുന്നിലുള്ള കാര്യങ്ങളെക്കുറിച്ചും അമേരിക്കൻ ജനതയ്ക്കുവേണ്ടി നമ്മൾ ചെയ്യേണ്ട കാര്യങ്ങളെക്കുറിച്ചും അദ്ദേഹം സംസാരിച്ചു. തീർച്ചയായും അദ്ദേഹത്തിന് ശക്തമായൊരു അജണ്ടയുണ്ട്, അത് നടപ്പിലാക്കേണ്ടത് നമ്മളുടെ ഉത്തരവാദിത്തമാണ്,” അലബാമയിൽ നിന്നുള്ള സെനറ്റർ ഇന്ന് രാവിലെ പറഞ്ഞു.
ഫിലിബസ്റ്റർ — നിയമനിർമ്മാണം പാസാക്കാൻ 60 വോട്ട് എന്ന പരിധി — ഒഴിവാക്കി, കേവല ഭൂരിപക്ഷം ഉപയോഗിച്ച് വോട്ട് ചെയ്ത് ഷട്ട്ഡൗൺ അവസാനിപ്പിക്കാൻ റിപ്പബ്ലിക്കൻമാർ ന്യൂക്ലിയർ ഓപ്ഷൻ ഉപയോഗിക്കണമെന്ന് ട്രംപ് കഴിഞ്ഞ ദിവസങ്ങളിൽ പരസ്യമായി ആവശ്യപ്പെട്ടിരുന്നു. ഇന്നലെ സെനറ്റ് റിപ്പബ്ലിക്കൻമാരുമായുള്ള പ്രഭാതഭക്ഷണ യോഗത്തിലും അദ്ദേഹം ഈ ആവശ്യം ആവർത്തിച്ചു.
ഫിലിബസ്റ്റർ അവസാനിപ്പിക്കാൻ ആവശ്യമായ വോട്ടുകൾ ഇപ്പോൾ ഇല്ലെന്ന് സെനറ്റ് ഭൂരിപക്ഷ നേതാവ് ജോൺ തൂൺ പറഞ്ഞതായും ബ്രിട്ട് അഭിമുഖത്തിൽ കൂട്ടിച്ചേർത്തു. എങ്കിലും, അദ്ദേഹത്തിൻ്റെ ലക്ഷ്യം കൈവരിക്കാൻ സഹായിക്കുന്ന മാർഗ്ഗങ്ങൾ ഞങ്ങളുടെ മുന്നിലുണ്ടെന്നും അവർ പറഞ്ഞു.
അവശ്യ ഭക്ഷ്യ സഹായ പരിപാടികൾ, സൈനിക, മുൻ സൈനിക സേവനങ്ങൾ, ക്യാപിറ്റോൾ പോലീസ് ഉദ്യോഗസ്ഥർക്കുള്ള ശമ്പളം എന്നിവയ്ക്കുള്ള ധനസഹായം പാസാക്കാൻ താൻ ഡെമോക്രാറ്റുകളുമായും റിപ്പബ്ലിക്കൻമാരുമായും ചേർന്ന് പ്രവർത്തിക്കുകയാണെന്നും സെനറ്റർ അറിയിച്ചു.
