വാഷിംഗ്ടൺ: ട്രംപ് ഭരണകൂടം മുന്നോട്ട് വെച്ച വെടിനിർത്തൽ പദ്ധതിയുമായി ബന്ധപ്പെട്ട് ഹമാസ് അധികാരം ഒഴിയാൻ വിസമ്മതിച്ചാൽ ആ ഗ്രൂപ്പിനെ പൂർണമായി ഇല്ലാതാക്കുമെന്ന് യുഎസ് പ്രസിഡന്റ് ഡോണൾഡ് ട്രംപ്. ഹമാസ് അധികാരത്തിൽ തുടരാൻ നിർബന്ധിച്ചാൽ എന്ത് സംഭവിക്കുമെന്ന് സിഎൻഎൻ റിപ്പോർട്ടർ ജെയ്ക്ക് ടാപ്പർ ടെക്സ്റ്റ് സന്ദേശത്തിലൂടെ ചോദിച്ചപ്പോൾ ട്രംപിന്റെ മറുപടി ശക്തമായിരുന്നു: “പൂർണ്ണമായ ഉന്മൂലനം!”
സെനറ്റർ ലിൻഡ്‌സെ ഗ്രഹാമിന്റെ ഒരു വ്യാഖ്യാനം ഉദ്ധരിച്ച് ടാപ്പർ പ്രസിഡൻ്റിനോട് കൂടുതൽ ചോദ്യങ്ങൾ ഉന്നയിച്ചു. ഗ്രഹാമിൻ്റെ അഭിപ്രായത്തിൽ, “നിരായുധീകരണം വേണ്ട, ഗാസയുടെ നിയന്ത്രണം പലസ്തീൻ്റെ കൈകളിൽ തുടരണം, ബന്ദികളുടെ മോചനം ചർച്ചകളുമായി ബന്ധിപ്പിക്കണം” എന്നീ ആവശ്യങ്ങൾ ഉന്നയിച്ചുകൊണ്ട് ഹമാസ് ഫലത്തിൽ സമാധാന പദ്ധതി നിഷേധിച്ചിരിക്കുകയാണ്.
ഗ്രഹാമിൻ്റെ ഈ വ്യാഖ്യാനം തെറ്റാണോ എന്ന ചോദ്യത്തിന്, “നമുക്ക് കണ്ടെത്താം. കാലം മാത്രമേ ഉത്തരം പറയൂ!!!” എന്നായിരുന്നു ട്രംപിൻ്റെ മറുപടി.
സമാധാനത്തിനായി ഹമാസ് ആത്മാർത്ഥമായി പ്രതിജ്ഞാബദ്ധരാണോ എന്നതിനെക്കുറിച്ച് “ഉടൻ തന്നെ” വ്യക്തത വരുമെന്ന് പ്രതീക്ഷിക്കുന്നതായും ട്രംപ് കൂട്ടിച്ചേർത്തു. ഗാസയിലെ ബോംബാക്രമണം അവസാനിപ്പിക്കുന്നതിനും തൻ്റെ വിശാലമായ സമാധാന കാഴ്ചപ്പാടിനും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിൻ്റെ പൂർണ്ണ പിന്തുണയുണ്ടോ എന്ന ചോദ്യത്തിന്, “ബിബിയുടെ കാര്യത്തിൽ ഉണ്ട്” എന്ന് ട്രംപ് മറുപടി നൽകി.
തൻ്റെ വെടിനിർത്തൽ നിർദ്ദേശം യാഥാർത്ഥ്യമാകുമെന്ന് പ്രതീക്ഷിക്കുന്നതായും അത് നേടിയെടുക്കാൻ താൻ കഠിനമായി പരിശ്രമിക്കുകയാണെന്നും ട്രംപ് ഊന്നിപ്പറഞ്ഞു.
