വാഷിംഗ്ടണ്‍ : മെക്സിക്കോ അതിര്‍ത്തിക്കടുത്തുള്ള മെംഫിസില്‍ നീതിന്യായ വകുപ്പിനെ സഹായിക്കാന്‍ നിരവധി അഭിഭാഷകരെ ആവശ്യമുണ്ടെന്നും എത്രയും വേഗം അവരെ അയയ്ക്കണമെന്നും സൈന്യത്തോട് ഉത്തരവിട്ട് പ്രതിരോധ സെക്രട്ടറി പീറ്റ് ഹെഗ്സെത്ത്. ഇത് താത്ക്കാലിക നിയമനമായിരിക്കുമെന്നും അസോസിയേറ്റഡ് പ്രസ് പുറത്തുവിട്ട ഉത്തരവില്‍ ഹെഗ്സെത്ത് വ്യക്തമാക്കിയിട്ടുണ്ട്.
”നിങ്ങളുടെ സൈനിക വകുപ്പിനുള്ളില്‍ നിന്ന് 48 അഭിഭാഷകരെയും 4 പാരാലീഗലുകളെയും ആവശ്യമുണ്ട്. ഇത്രയും പേരെ ഉടന്‍ കണ്ടെത്തണം. നീതിന്യായ വകുപ്പിന് വേണ്ടി അവര്‍ പ്രത്യേക അസിസ്റ്റന്റ് യു.എസ്. അഭിഭാഷകരായി പ്രവര്‍ത്തിക്കാനുള്ളവരാണ്”. ഉത്തരവില്‍ പറയുന്നു.
പെന്റഗണില്‍ ജോലി ചെയ്യുന്ന സൈനിക, സിവിലിയന്‍ അഭിഭാഷകരെ നീതിന്യായ വകുപ്പിലേക്ക് എത്തിക്കുന്നതിനുള്ള ഏറ്റവും പുതിയ ശ്രമമായാണ് ഈ നീക്കം വിലയിരുത്തപ്പെടുന്നത്. കഴിഞ്ഞ മാസം, പെന്റഗണ്‍ 600 സൈനിക അഭിഭാഷകരെ താല്‍ക്കാലിക ഇമിഗ്രേഷന്‍ ജഡ്ജിമാരായി സേവനമനുഷ്ഠിക്കാന്‍ ജസ്റ്റിസ് വകുപ്പിലേക്ക് എത്തിക്കാന്‍ സമ്മതം നല്‍കിയിരുന്നു. പിന്നാലെയാണ് പുതിയ നീക്കം. തെക്കന്‍ അതിര്‍ത്തിയിലേക്കും അമേരിക്കന്‍ നഗരങ്ങളിലേക്കും വിന്യസിക്കുന്നതുള്‍പ്പെടെ കുടിയേറ്റ നിയന്ത്രണ നടപടികള്‍ ശക്തിപ്പെടുത്താന്‍ ട്രംപ് ഭരണകൂടം സൈന്യത്തെ കൂടുതലായി ഉപയോഗപ്പെടുത്തിയിട്ടുണ്ട്. പുതിയ നീക്കവും അത്തരത്തിലുള്ളതാണ്.
Hegseth orders military to send lawyers to help Justice Department in Memphis, near Mexico border
