ശതകോടീശ്വരൻ ഇലോൺ മസ്കിൻ്റെ എക്സ് എഐ നടത്തിയ ഹാക്കത്തോണിൽ വെള്ളം കുടിച്ച രീതി വൈറലായതോടെ പരിഹാസ പാത്രമായ ഇന്ത്യൻ വംശജനായ ടെക്കി വിനീത് സെന്തിൽരാജ് മസ്കിൻ്റെ കമ്പനിയിൽ ചേരുന്നു. വിനീത് എക്സിലൂടെയാണ് ഇക്കാര്യം സ്ഥിരീകരിച്ചിരിക്കുന്നത്. ടെക് ലോകത്തെ പുതിയ കണ്ടെത്തലുകളും ആശയങ്ങളും സൂത്രവിദ്യകളും വിവരങ്ങളും പങ്കുവയ്ക്കാനുള്ള ഒരു വേദിയാണ് ഹാക്കത്തോൺ. മണിക്കൂറുകൾ മുതൽ മാസങ്ങളോളം നീണ്ടുനിൽക്കുന്ന ഹാക്കത്തോൺ സംഗമങ്ങൾ വരെയുണ്ട്. എന്നാൽ മിക്ക ഹാക്കത്തോണുകളും ഒന്നോ രണ്ടോ ദിവസത്തേക്കാണ് നടത്താറുള്ളത്.
വൈറലായ വെള്ളംകുടി
ഈമാസം ആദ്യം ഇലോൺ മസ്കിൻ്റെ എക്സ് എഐ സംഘടിപ്പിച്ച ഒരു ഹാക്കത്തോണിനിടെയായിരുന്നു വിനീതിനെ വൈറലാക്കിയ സംഭവമുണ്ടായത്. ഹാക്കത്തോണിൻ്റേതായി പുറത്തുവന്ന ചിത്രത്തിൽ വിനീത് വെള്ളം കുടിക്കുന്ന രീതിയെ സമൂഹമാധ്യമത്തിൽ വ്യാപകമായി വിമർശിച്ചിരുന്നു. കുപ്പിയുടെ വായ്ഭാഗം തൻ്റെ വായ്ക്കുള്ളിലാക്കി കുടിച്ചതാണ് വൈറലായ ചിത്രത്തിലുള്ളത്. ഈ സംഭവത്തെക്കുറിച്ച് സെന്തിൽരാജ് തന്നെ വിശദീകരണം നൽകുകയും താൻ എങ്ങനെ വെള്ളം കുടിച്ചുവെച്ച് 1 ദശലക്ഷം ആളുകൾ വിലയിരുത്തിയെന്നും പറഞ്ഞിരുന്നു.
1 week ago I got clipped for drinking water.
— Vineeth Sendilraj (@VineethSendil) December 17, 2025
now I'm joining @xai to build the future of AI.
full circle moment. https://t.co/qF62WooTSJ pic.twitter.com/KXeVadujgb
വിമർശകരേ ഇപ്പോൾ ഞാൻ AI-യുടെ ഭാവി കെട്ടിപ്പടുക്കാൻ പോകുന്നു
തനിക്കെതിരായ വിമർശനത്തിൽ തളരാതെ മിടുക്കുകാട്ടി ഹാക്കത്തോണിൽ തിളങ്ങിയതുകൊണ്ട് ഇലോൺ മസ്കിൻ്റെ എക്സ് എഐയിൽ വിനീതിന് ജോലി ലഭിച്ചിരിക്കുകയാണ്. ഇതേക്കുറിച്ച് വിനീത് തന്നെയാണ് സോഷ്യൽ മീഡിയയിൽ പങ്കുവെച്ചിരിക്കുന്നത്. താൻ ഹാക്കത്തോൺ വിജയകരമായി പൂർത്തിയാക്കിയെന്നും മക്സിൻ്റെ കമ്പനിയിൽ ചേർന്ന താൻ ഇപ്പോൾ എക്സ് എഐയുടെ ഭാഗമാണെന്നും സെന്തിൽരാജ് സമൂഹമാധ്യമത്തിൽ കുറിച്ചു. 1 ആഴ്ച മുമ്പ് ഞാൻ വെള്ളംകുടിച്ചപ്പോൾ വൈറലായി. ഇപ്പോൾ ഞാൻ AI-യുടെ ഭാവി കെട്ടിപ്പടുക്കാൻ എക്സ് എഐയിൽ ചേരുന്നു”. വൈറലായ ചിത്രത്തോടൊപ്പമാണ് അദ്ദേഹം ഇങ്ങനെ കുറിച്ചത്.
വെള്ളംകുടിയുടെ പേരിൽ വിമർശിച്ച അതേ സോഷ്യൽ മീഡിയ വിനീതിനെ അഭിനന്ദിക്കുന്ന കാഴ്ചയാണ് പിന്നീട് കണ്ടത്. ഹാക്കത്തൺ വീണ്ടും വിജയിച്ചതിന് അഭിനന്ദനങ്ങൾ, നിങ്ങളുടെ ആദ്യ ദിവസം തന്നെ ഈ ഫോട്ടോ പുനഃസൃഷ്ടിക്കുക, നിങ്ങൾ മിടുക്കനാണ്…” എന്നിങ്ങനെ പോകുന്നു കമൻ്റുകൾ.
യുഎസ് പ്രസിഡൻഷ്യൽ സ്കോളർമാരായി അംഗീകരിക്കപ്പെട്ട 2024 ജോർജിയ ക്ലാസിലെ നാല് വിദ്യാർത്ഥികളിൽ ഒരാളായിരുന്നു അദ്ദേഹം. ലാംബർട്ട് ഹൈസ്കൂളിലാണ് അദ്ദേഹം പഠിച്ചത്. സ്കൂളിൽ പഠിക്കുമ്പോൾ ട്രാക്ക് ടീമിലും അദ്ദേഹം അംഗമായിരുന്നു. സ്കൂളിന്റെ പ്രസിദ്ധീകരണത്തിന് നൽകിയ അഭിമുഖത്തിൽ, ലോകത്തെ മികച്ച സ്ഥലമാക്കുക എന്നതാണ് തന്റെ ലക്ഷ്യമെന്ന് സെന്തിൽരാജ് പറഞ്ഞിരുന്നു.
Indian-origin man who went viral for ‘drinking water’ at XAI Hackathon will now work with Elon Musk
