വാഷിംഗ്ടൺ: അമേരിക്കയിലെ ഒരു കടയിൽ വസ്ത്രങ്ങൾ മോഷ്ടിക്കാൻ ശ്രമിച്ച ഇന്ത്യൻ യുവതിയെ പോലീസ് അറസ്റ്റ് ചെയ്തു. ഇന്ത്യയിലുള്ള സഹോദരന് സമ്മാനമായി നൽകാനാണ് വസ്ത്രങ്ങൾ കൊണ്ടുപോകാൻ ശ്രമിച്ചതെന്ന് യുവതി പോലീസിനോട് പറഞ്ഞു. സംഭവം സോഷ്യൽ മീഡിയയിൽ വ്യാപകമായ ചർച്ചകൾക്ക് വഴിവച്ചിട്ടുണ്ട്. പുരുഷ വസ്ത്രങ്ങൾ ഉൾപ്പെടെയുള്ള സാധനങ്ങളാണ് മോഷ്ടിക്കാൻ ശ്രമിച്ചത്.
‘മേഡ് ഇൻ യുഎസ്എ’ ഉൽപ്പന്നങ്ങളോട് സഹോദരന് പ്രത്യേക ഇഷ്ടമുണ്ടെന്നും, എന്നാൽ വാങ്ങാൻ പണമില്ലാത്തതിനാലാണ് ഇങ്ങനെ ചെയ്തതെന്നും യുവതി വിശദീകരിച്ചതായി റിപ്പോർട്ടുകൾ സൂചിപ്പിക്കുന്നു. സോഷ്യൽ മീഡിയയിൽ വൈറലായ വീഡിയോയിൽ, പണമടയ്ക്കാതെ സാധനങ്ങൾ എടുത്തെന്ന ആരോപണത്തെത്തുടർന്ന് പോലീസുമായി സംസാരിക്കുന്നതും കരയുന്നതും മാപ്പ് അപേക്ഷിക്കുന്നതും യുവതിയെ കാണാം.
പണം കൊടുക്കാൻ മറന്നുപോയി മാത്രമാണെന്നാണ് അവരുടെ വാദം. കൈവിലങ്ങ് ഇടരുതെന്നും ഒരു അവസരം നൽകണമെന്നും യുവതി അഭ്യർത്ഥിച്ചു. എന്നിരുന്നാലും, യുവതിയുടെ അഭ്യർത്ഥനകൾ തള്ളിക്കളഞ്ഞ പോലീസ് കൈവിലങ്ങണിയിച്ച് സ്റ്റേഷനിലേക്ക് കൊണ്ടുപോയി. മോഷണക്കുറ്റം ചുമത്താനുള്ള നടപടികൾ ആരംഭിച്ചതായി അറിയുന്നു. യുവതിയുടെ പേര്, സംഭവം നടന്ന സ്റ്റോറിന്റെ വിശദാംശങ്ങൾ, മോഷ്ടിച്ച സാധനങ്ങളുടെ മൂല്യം തുടങ്ങിയവ ഇതുവരെ ഔദ്യോഗികമായി വെളിപ്പെടുത്തിയിട്ടില്ല. അധികൃതർ കേസിന്റെ അന്വേഷണം തുടരുകയാണ്.
