ടെഹ്റാൻ: ഇസ്രായേൽ ഈ മാസം നടത്തിയ ആക്രമണങ്ങളോട് ഇറാൻ പ്രതികരിച്ചില്ലായിരുന്നെങ്കിൽ സ്ഥിതിഗതികൾ പൂർണ്ണമായതും നിയന്ത്രിക്കാൻ കഴിയാത്ത ഒരു യുദ്ധത്തിലേക്ക് മേഖലയിൽ മാറിയേനെ എന്ന് ഇറാൻ പ്രസിഡന്‍റ് മസൂദ് പെസെഷ്കിയാൻ. ബെലാറസിൽ നടന്ന ഒരു സമ്മേളനത്തിൽ വീഡിയോ സന്ദേശത്തിലൂടെ സംസാരിക്കുകയായിരുന്നു പെസെഷ്കിയാൻ. അമേരിക്കയും സയണിസ്റ്റ് ഭരണകൂടവും നടത്തിയ ആക്രമണങ്ങൾ എല്ലാ അന്താരാഷ്ട്ര നിയമങ്ങളുടെയും ഗുരുതരമായ ലംഘനമാണ്. ആണവ നിർവ്യാപന വ്യവസ്ഥയുടെ (nuclear non-proliferation regime) വിശ്വാസ്യതയ്ക്ക് തീരാത്ത ആഘാതമാണെന്നും അദ്ദേഹം പറഞ്ഞു.
അണുവായുധങ്ങളുടെ വ്യാപനം തടയുന്നതിനുള്ള ആണവ നിർവ്യാപന കരാറിൽ (Nuclear Non-Proliferation Treaty) രാജ്യത്തിന്‍റെ അംഗത്വത്തെ ഇറാനിയൻ ഉദ്യോഗസ്ഥർ ചോദ്യം ചെയ്തിരുന്നു. പാർലമെന്‍റ് അന്താരാഷ്ട്ര ആണവോർജ്ജ ഏജൻസിയുമായുള്ള (International Atomic Energy Agency) സഹകരണം താൽക്കാലികമായി നിർത്തിവെക്കാൻ വോട്ട് ചെയ്യുകയും ചെയ്തു.
ടെഹ്‌റാനും വാഷിംഗ്ടണും തമ്മിൽ ഇറാന്‍റെ ആണവ പദ്ധതിയെച്ചൊല്ലിയുള്ള പരോക്ഷ ചർച്ചകൾക്കിടയിലാണ് ഇസ്രായേലിന്‍റെ ആക്രമണം ഉണ്ടായത്. ഇത് നയതന്ത്ര പ്രക്രിയയെ അട്ടിമറിക്കാനുള്ള മനഃപൂർവമായ ശ്രമമായിരുന്നു,” പെസെഷ്കിയാൻ പറഞ്ഞു. ഇസ്രായേൽ യുദ്ധത്തിന്‍റെ നിയമങ്ങൾ ലംഘിച്ച് ആളുകളെ കൊന്നു. അവർ സർവകലാശാലാ വിദ്യാർത്ഥികളെയും സാധാരണക്കാരെയും ലക്ഷ്യം വെച്ചു. ഈ യുദ്ധത്തിൽ നിരവധി സാധാരണക്കാർ കൊല്ലപ്പെട്ടു. അവർ താമസ കെട്ടിടങ്ങളും ആശുപത്രികളും ജോലി സ്ഥലങ്ങളും ആക്രമിച്ചുവെന്നും അദ്ദേഹം പറഞ്ഞു. ഇസ്രയേലിന്‍റെ സൈനിക നടപടികളിൽ ഇറാനിൽ 627 പേർ കൊല്ലപ്പെട്ടതായി ഇറാന്‍റെ ആരോഗ്യ മന്ത്രാലയം അറിയിച്ചു.
