ന്യൂ ഓർലിയൻസ്: ഷാർലറ്റിന് പിന്നാലെ, ബോർഡർ പട്രോൾ ഉദ്യോഗസ്ഥൻ ഗ്രിഗറി ബോവിനോയുടെ ഇമിഗ്രേഷൻ നടപടി മറ്റ് ഡെമോക്രാറ്റിക് നഗരങ്ങളിലും തുടരുമെന്ന് വിലയിരുത്തൽ. അടുത്ത ലക്ഷ്യം ന്യൂ ഓർലിയൻസ് ആണെന്ന് പദ്ധതികളെക്കുറിച്ച് അറിയാവുന്ന രണ്ട് യുഎസ് ഉദ്യോഗസ്ഥർ പറഞ്ഞു. റിപ്പബ്ലിക്കൻ നേതൃത്വത്തിലുള്ള സംസ്ഥാനത്തിലെ ഡെമോക്രാറ്റിക് നഗരമായ ന്യൂ ഓർലിയൻസിലേക്ക് നാഷണൽ ഗാർഡിനെ അയക്കുന്നതിനെക്കുറിച്ച് പ്രസിഡന്‍റ് ട്രംപ് സെപ്റ്റംബർ മുതൽ സംസാരിക്കുന്നുണ്ട്.
നഗരത്തിൽ ഒരു ക്രൈം പ്രശ്നമുണ്ട് എന്നാണ് അദ്ദേഹം പറഞ്ഞത്. എന്നാൽ ചിക്കാഗോയിലും പോർട്ട്ലാൻഡിലും നാഷണൽ ഗാർഡിനെ വിന്യസിക്കാനുള്ള ശ്രമങ്ങൾ കോടതികൾ തടഞ്ഞതിനാൽ ഈ പദ്ധതി യാഥാർത്ഥ്യമായിട്ടില്ല.
സാധ്യമായ ബോർഡർ പട്രോൾ ഓപ്പറേഷനുകളെക്കുറിച്ച് ന്യൂ ഓർലിയൻസ് മേയറുടെ ഓഫീസ് ഇതുവരെ മറുപടി നൽകിയിട്ടില്ല. ഷാർലറ്റ് ഓപ്പറേഷൻ ഔദ്യോഗികമായി പ്രഖ്യാപിക്കുന്നതിന് മുമ്പ്, വെസ്റ്റ് വിർജീനിയയിൽ വെച്ച് ഫോക്സ് ന്യൂസിനോട് സംസാരിക്കവെ ബോവിനോ, ബോർഡർ പട്രോൾ അടുത്തതായി ലക്ഷ്യമിടാൻ സാധ്യതയുള്ള ചില നഗരങ്ങളെക്കുറിച്ച് സൂചന നൽകിയിരുന്നു. “നിങ്ങൾ ഞങ്ങളെ വീണ്ടും വിന്യസിക്കുന്നത് കാണും — അത് ന്യൂയോർക്ക് ആകാം, ചിക്കാഗോ ആകാം, അല്ലെങ്കിൽ ഷാർലറ്റ് ആകാം,” അദ്ദേഹം പറഞ്ഞു.
