കോപ്പൻഹേഗൻ: ഗ്രീൻലാൻഡിന്റെ രാഷ്ട്രീയ കാര്യങ്ങളിൽ ഇടപെടാൻ അമേരിക്ക രഹസ്യമായ നീക്കങ്ങൾ നടത്തുന്നു എന്ന ഡാനിഷ് മാധ്യമറിപ്പോർട്ടിനെ തുടർന്ന് ഡെൻമാർക്ക് യുഎസിൻ്റെ മുതിർന്ന നയതന്ത്രജ്ഞനെ വിളിച്ചുവരുത്തി.
ഓഗസ്റ്റ് 27-ന് ഡെൻമാർക്കിന്റെ സർക്കാർ ഉടമസ്ഥതയിലുള്ള മാധ്യമമായ ഡി.ആർ. പുറത്തുവിട്ട റിപ്പോർട്ടനുസരിച്ച്, ഡെൻമാർക്കിന്റെയും ഗ്രീൻലാൻഡിന്റെയും ബന്ധം വഷളാക്കാൻ ലക്ഷ്യമിട്ട് കുറഞ്ഞത് മൂന്ന് അമേരിക്കൻ പൗരന്മാരുടെ ഒരു സംഘം രഹസ്യമായി സ്വാധീന പ്രവർത്തനങ്ങൾ നടത്തുന്നുണ്ട്. പ്രസിഡന്റ് ഡോണൾഡ് ട്രംപ് ഗ്രീൻലാൻഡിനെ അമേരിക്കയുടെ ഭാഗമാക്കാൻ ആഗ്രഹിക്കുന്നുവെന്ന് മുൻപ് പ്രസ്താവിച്ചിരുന്നു.
രാജ്യത്തിൻ്റെ ആഭ്യന്തര കാര്യങ്ങളിൽ ഇടപെടാനുള്ള ഏതൊരു ശ്രമവും അംഗീകരിക്കാൻ കഴിയില്ലെന്ന് ഡാനിഷ് വിദേശകാര്യ മന്ത്രി ലാർസ് ലോക്കെ റാസ്മുസെൻ പറഞ്ഞു. റിപ്പോർട്ടിനെക്കുറിച്ച് വിശദീകരണം തേടുന്നതിനായി കോപ്പൻഹേഗനിലെ യുഎസ് ചാർജ് ഡി അഫയേഴ്‌സ് മാർക്ക് സ്ട്രോഹിനെ വിളിച്ചുവരുത്തിയ ശേഷമാണ് അദ്ദേഹം ഇക്കാര്യം അറിയിച്ചത്. ഈ ആരോപിക്കപ്പെടുന്ന ഇടപെടൽ അസ്വീകാര്യമാണ് എന്ന് ഡാനിഷ് പ്രധാനമന്ത്രി മെറ്റെ ഫ്രെഡെറിക്‌സനും പറഞ്ഞു.
നിലവിൽ ഡെൻമാർക്കിൽ അമേരിക്കൻ അംബാസഡർ ഇല്ല. അംബാസഡർ ഇല്ലാത്ത സാഹചര്യത്തിൽ എംബസിയുടെ ചുമതല വഹിക്കുന്ന നയതന്ത്രജ്ഞനാണ് ചാർജ് ഡി അഫയേഴ്‌സ്.
