കാലിഫോർണിയ: ഈ ആഴ്ച കാലിഫോർണിയ യൂണിവേഴ്സിറ്റി, ബർക്ക്ലിയിൽ നടന്ന പ്രതിഷേധങ്ങളെക്കുറിച്ച് അന്വേഷണം ആരംഭിച്ചതായി നീതിന്യായ വകുപ്പ് അറിയിച്ചു. അന്തരിച്ച യാഥാസ്ഥിതിക പ്രവർത്തകൻ ചാർളി കിർക്ക് സ്ഥാപിച്ചതും അമേരിക്കൻ കാമ്പസുകളിലെ യുവജനങ്ങളെ ലക്ഷ്യമിടുന്നതുമായ ടേണിംഗ് പോയിൻ്റ് യുഎസ്എ എന്ന ഗ്രൂപ്പ് സംഘടിപ്പിച്ച പരിപാടിക്കിടെയാണ് പ്രതിഷേധങ്ങൾ പൊട്ടിപ്പുറപ്പെട്ടത്.
പരിപാടി തുടങ്ങുന്നതിന് മണിക്കൂറുകൾക്ക് മുൻപ് പ്രതിഷേധക്കാർ ഒത്തുകൂടിയിരുന്നു, ചിലർ പോലീസ് നിരയുമായി ഏറ്റുമുട്ടുന്നതും കാണപ്പെട്ടു. പരിപാടിയുമായി ബന്ധപ്പെട്ട എല്ലാ അക്രമങ്ങളെയും അപലപിച്ച യൂണിവേഴ്സിറ്റി ഓഫ് കാലിഫോർണിയ, ബർക്ക്ലിയുടെ വക്താവ് ഡാൻ മൊഗുലോഫ്, നഗരത്തിലെയും യൂണിവേഴ്സിറ്റിയിലെയും ഉദ്യോഗസ്ഥർ നിരവധി അറസ്റ്റുകൾ രേഖപ്പെടുത്തിയതായി അറിയിച്ചു.
തിങ്കളാഴ്ച നടന്ന സംഭവത്തെക്കുറിച്ച് എഫ്.ബി.ഐ.യുടെ ജോയിൻ്റ് ടെററിസം ടാസ്ക് ഫോഴ്സും ഡി.ഒ.ജെ.യുടെ സിവിൽ റൈറ്റ്സ് ഡിവിഷനും സംയുക്തമായി അന്വേഷണം നടത്തുമെന്ന് അറ്റോർണി ജനറൽ പാം ബോണ്ടി, സിവിൽ റൈറ്റ്സ് ഡിവിഷൻ്റെ ചുമതലയുള്ള അസിസ്റ്റൻ്റ് അറ്റോർണി ജനറൽ ഹർമീത് ധില്ലൻ എന്നിവർ വ്യക്തമാക്കി
അന്വേഷണത്തിൽ എല്ലാ ക്രിമിനൽ, സിവിൽ വശങ്ങളെക്കുറിച്ചും ആഴത്തിലുള്ള പരിശോധനയുണ്ടാകും. കൂടാതെ, കാമ്പസിൽ യാഥാസ്ഥിതിക പ്രഭാഷകരെ സംരക്ഷിക്കുന്നതിൽ യുസി ബർക്ക്ലിക്ക് ചരിത്രപരമായ വീഴ്ച സംഭവിച്ചതിലുള്ള ആശങ്കയും പരിഗണിക്കും,” ധില്ലൻ എക്സ് പ്ലാറ്റ്ഫോമിൽ കുറിച്ചു. തിങ്കളാഴ്ചത്തെ സംഭവങ്ങളോടുള്ള പ്രതികരണത്തെക്കുറിച്ചുള്ള എല്ലാ രേഖകളും സംരക്ഷിക്കാൻ യുസി ബർക്ക്ലി പോലീസ് ഡിപ്പാർട്ട്മെൻ്റിനോട് ആവശ്യപ്പെട്ടിട്ടുണ്ടെന്നും അദ്ദേഹം കൂട്ടിച്ചേർത്തു.
