തിരുവനന്തപുരം: തുടർച്ചയായ വിവാദങ്ങൾക്കും സൈബർ ആക്രമണങ്ങൾക്കും പിന്നാലെ കെപിസിസി സോഷ്യൽ മീഡിയ സെല്ലിൽ കോൺഗ്രസ് ദേശീയ നേതൃത്വം വൻ അഴിച്ചുപണി നടത്തി. ഡിജിറ്റൽ മീഡിയ സെൽ ചെയർമാൻ വി.ടി. ബൽറാമിനെ മാറ്റി എറണാകുളം എംപി ഹൈബി ഈഡനെ പുതിയ ചുമതല നൽകി. സെല്ലിന്റെ പേരും മാറ്റി – ഇനി മുതൽ ‘സോഷ്യൽ മീഡിയ സെൽ’ എന്നായിരിക്കും. ദേശീയ തലത്തിലും മറ്റ് സംസ്ഥാനങ്ങളിലും ഇതേ പേരിലാണ് പ്രവർത്തിക്കുന്നതെന്ന് ചൂണ്ടിക്കാട്ടിയാണ് മാറ്റം.
രാഹുൽ മാങ്കൂട്ടത്തിൽ വിഷയത്തിൽ പ്രതിപക്ഷ നേതാവ് വി.ഡി. സതീശനടക്കമുള്ള നേതാക്കൾക്കെതിരെ സൈബർ ആക്രമണം അതിരുവിട്ടതാണ് ദേശീയ നേതൃത്വത്തെ ഇടപെടാൻ പ്രേരിപ്പിച്ചത്. ബീഡി-ബിഹാർ പോസ്റ്റ് വിവാദത്തെത്തുടർന്ന് ബൽറാം രാജി പ്രഖ്യാപിച്ചിരുന്നെങ്കിലും കെപിസിസി അംഗീകരിച്ചിരുന്നില്ല. നിലവിലുള്ള ടീം കാര്യക്ഷമമല്ലെന്ന് എഐസിസി ജനറൽ സെക്രട്ടറി ദീപാ ദാസ്മുൻഷി ദേശീയ നേതൃത്വത്തെ അറിയിച്ചതോടെയാണ് പെട്ടെന്നുള്ള മാറ്റം.
പ്രൊഫഷണൽ സംഘത്തെ നിയോഗിച്ച് സോഷ്യൽ മീഡിയ സെൽ ശക്തമാക്കുമെന്ന് ഹൈബി ഈഡൻ അറിയിച്ചു. തെരഞ്ഞെടുപ്പ് അടുത്തിരിക്കെ ദേശീയ നേതൃത്വത്തിന്റെ നേരിട്ടുള്ള മേൽനോട്ടത്തിലായിരിക്കും പുതിയ ടീമിന്റെ പ്രവർത്തനം. മുതിർന്ന നേതാക്കളടങ്ങുന്ന മോണിറ്ററിങ് ടീമും കർശന മാർഗനിർദേശങ്ങളും ഏർപ്പെടുത്തുമെന്നാണ് സൂചന.
