വാഷിംഗ്ടൺ: വെള്ളിയാഴ്ച ടെന്നസിയിലെ ഒരു സൈനിക സ്ഫോടകവസ്തു നിർമ്മാണ കേന്ദ്രത്തിലുണ്ടായ ഉഗ്ര സ്ഫോടനത്തിൽ നിരവധി മരണം. സ്ഫോടനത്തിനു പിന്നാലെ 19 പേരെ കാണാതായെന്ന് ഹംഫ്രീസ് കൗണ്ടി ഷെരീഫ് ക്രിസ് ഡേവിസ് പറഞ്ഞു.
ഒരു ഫാക്ടറിയിലുണ്ടായ വൻ സ്ഫോടനത്തെ തുടർന്ന് നാലോ അഞ്ചോ പേരെ അടുത്തുള്ള ആശുപത്രിയിൽ പ്രവേശിപ്പിച്ചതായും റിപ്പോർട്ടുണ്ട്. നാഷ്‌വില്ലിൽ നിന്ന് ഏകദേശം 90 കിലോമീറ്റർ തെക്ക് പടിഞ്ഞാറ് ബക്സ്നോർട്ടിലുള്ള പ്ലാന്റിൽ സ്ഫോടകവസ്തുക്കളുടെ നിർമ്മാണം, കൈകാര്യം ചെയ്യൽ, സംഭരണം എന്നിവയാണ് നടന്നിരുന്നത്. സ്ഫോടനത്തിന്റെ കാരണം വ്യക്തമല്ല.
സംഭവസ്ഥലത്ത് നിന്നുള്ള ആകാശ ദൃശ്യങ്ങളിൽ കത്തിനശിച്ച അവശിഷ്ടങ്ങൾ, ഉയരുന്ന പുക, കത്തിയ വാഹന അവശിഷ്ടങ്ങൾ എന്നിവ കാണാം. സംഭവസമയത്ത് പ്ലാന്റ് പ്രവർത്തനക്ഷമമായിരുന്നെന്നും തുടർച്ചായുണ്ടായ സ്ഫോടനങ്ങൾ തുടക്കത്തിൽ രക്ഷാപ്രവർത്തനത്തിന് വെല്ലുവിളിയായെന്നും മാധ്യമ പ്രവർത്തകരോട് ഷെരീഫ് ഡേവിസ് ചൂണ്ടിക്കാട്ടി. കാണാതായവർ ഒരുപക്ഷേ മരിച്ചിരിക്കാം എന്നും അദ്ദേഹം വ്യക്തമാക്കി.
മണിക്കൂറുകൾക്ക് ശേഷം നടന്ന രണ്ടാമത്തെ പത്രസമ്മേളനത്തിലും, 19 പേരെ ഇപ്പോഴും കണ്ടെത്താനായില്ലെന്നും ഒരു വലിയ കെട്ടിടത്തിലാണ് സ്ഫോടനം നടന്നതെന്നും ഡേവിസ് സ്ഥിരീകരിച്ചു. അര ചതുരശ്ര മൈൽ വിസ്തൃതിയിൽ അവശിഷ്ടങ്ങൾ ചിതറിത്തെറിച്ചുവെന്നും അദ്ദേഹം കൂട്ടിച്ചേർത്തു. സ്ഫോടനം ആകസ്മികമോ മനഃപൂർവമോ ആണെന്ന് താൻ വിശ്വസിക്കുന്നുണ്ടോ എന്ന് ചോദ്യത്തിന് ഉത്തരം നൽകാൻ ഡേവിസ് വിസമ്മതിച്ചു.
സംഭവം ഒരു ദുരന്തമാണെന്നും തന്റെ ഓഫീസ് നിലവിലുള്ള സ്ഥിതിഗതികൾ നിരീക്ഷിച്ചുവരികയാണെന്നും ടെന്നസി ഗവർണർ ബിൽ ലീ ഒരു സോഷ്യൽ മീഡിയ പോസ്റ്റിൽ കുറിച്ചു. സ്ഫോടനത്തിൽ രക്ഷാപ്രവർത്തനം നടത്താൻ സംസ്ഥാന, തദ്ദേശ സ്വയംഭരണ സ്ഥാപനങ്ങൾ ഫെഡറൽ ഏജൻസികളുമായി സഹകരിച്ച് പ്രവർത്തിക്കുന്നുണ്ടെന്നും അദ്ദേഹം പറഞ്ഞു.
