അരിസോണ: അരിസോണയിലെ കുടിയേറ്റക്കാര്‍ക്ക് രാജ്യം വിടണമെന്ന് ഇ മെയിൽ സന്ദേശം ലഭിക്കുന്നതായി റിപ്പോര്‍ട്ടുകൾ. അഫ്ഗാനിസ്ഥാനിൽ നിന്നുള്ള 38 കാരനായ അഭയാർത്ഥി ഫീനിക്സ് സ്കൈ ഹാർബർ അന്താരാഷ്ട്ര വിമാനത്താവളത്തിൽ വീൽചെയർ സഹായിയായി പുലർച്ചെ 4 മണിക്കുള്ള ഷിഫ്റ്റിന് തയ്യാറെടുക്കുകയായിരുന്നു. അപ്പോഴാണ് അദ്ദേഹം ഇമെയിൽ പരിശോധിച്ചത്. യുഎസ് ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റിയിൽ നിന്നുള്ള ഒരു അറിയിപ്പാണ് അദ്ദേഹം കണ്ടത്. “നിങ്ങൾ അമേരിക്കൻ ഐക്യനാടുകൾ വിട്ടുപോകേണ്ട സമയം അതിക്രമിച്ചിരിക്കുന്നു” – ഇങ്ങനെയായിരുന്നു അറിയിപ്പിൽ പറഞ്ഞിരുന്നത്.
യുഎസിൽ താമസിക്കാൻ അനുവദിച്ചിരുന്ന സമയം ഏഴ് ദിവസത്തിനുള്ളിൽ റദ്ദാക്കുകയാണെന്നും രാജ്യം വിട്ടുപോകണമെന്നും സന്ദേശത്തിൽ വ്യക്തമാക്കിയിട്ടുണ്ട്. നിങ്ങൾ ഉടൻ തന്നെ അമേരിക്കൻ ഐക്യനാടുകൾ വിട്ടുപോയില്ലെങ്കിൽ, നിങ്ങളെ അമേരിക്കൻ ഐക്യനാടുകളിൽ നിന്ന് നീക്കം ചെയ്യുന്നതിന് കാരണമാകുന്ന നിയമ നിർവ്വഹണ നടപടികൾക്ക് വിധേയനാകേണ്ടി വരുമെന്നും മുന്നറിയിപ്പുണ്ട്. പരോൾ സ്റ്റാറ്റസിലൂടെ നേടിയ തൊഴിൽ പെർമിറ്റുകളും റദ്ദാക്കപ്പെടുമെന്ന് അറിയിപ്പിൽ പറയുന്നു.
ഹെക്മത്തുള്ള ക്വുവാഞ്ച് എന്ന് പേരുള്ള ഈ വ്യക്തി അറിയിപ്പ് കണ്ട് ഭയന്നുപോയെന്ന് പറഞ്ഞു. ഞാൻ വിഷമിക്കുകയും പേടിക്കുകയും ആശയക്കുഴപ്പത്തിലുമാണ്, അദ്ദേഹം കൂട്ടിച്ചേര്‍ത്തു. ബൈഡൻ ഭരണകൂടത്തിൽ സിബിപി വൺ ആപ്പ് വഴി യുഎസിലേക്ക് പരോളിൽ പ്രവേശിച്ച ശേഷം, ഏപ്രിൽ 10, 11 തീയതികളിൽ ഹോംലാൻഡ് സെക്യൂരിറ്റി വകുപ്പിൽ നിന്ന് സമാനമായ അറിയിപ്പുകൾ ലഭിച്ച, അരിസോണയിൽ താമസിക്കുന്ന ഡസൻ കണക്കിന് അഭയാര്‍ത്ഥികളാണ് ഉള്ളത്.
