ലണ്ടൻ: ഇസ്രായേലിന്റെ രഹസ്യാന്വേഷണ വിഭാഗം മൊസാദിൻ്റെ മുന്നറിയിപ്പ്. യൂറോപ്പിലുടനീളം ഹമാസ് പ്രവർത്തന ശൃംഖല വളർത്തിയെടുക്കുന്നുണ്ടെന്നും രഹസ്യ സെല്ലുകൾ വഴി പ്രവർത്തിക്കുന്നുണ്ടെന്നും മൊസാദ് മുന്നറിയിപ്പ് നൽകി. ആയുധങ്ങൾ കണ്ടെത്താനും സംശയിക്കുന്നവരെ അറസ്റ്റ് ചെയ്യാനും ആസൂത്രിതമായ ആക്രമണങ്ങൾ തടയാനും യൂറോപ്യൻ സുരക്ഷാ ഏജൻസികളുടെ സഹകരണത്താൽ സാധിച്ചെന്നും ഇസ്രായേൽ- ജൂത സമൂഹങ്ങളെ ലക്ഷ്യം വച്ചുള്ള ഗൂഢാലോചനകൾ തകർക്കാൻ യൂറോപ്യൻ പങ്കാളികൾ സഹായിച്ചതായും മൊസാദ് പ്രസ്താവനയിൽ പറഞ്ഞു.
ജർമ്മനി, ഓസ്ട്രിയ തുടങ്ങിയ രാജ്യങ്ങളിലെ സംയുക്ത നടപടികളുടെ ഫലമായി സംശയിക്കപ്പെടുന്നവരെ കസ്റ്റഡിയിലെടുക്കുകയും സാധാരണക്കാർക്കെതിരെ ആക്രമണത്തിന് ഉപയോഗിക്കാൻ തയ്യാറാക്കിയ ആയുധശേഖരങ്ങൾ പിടിച്ചെടുക്കുകയും ചെയ്തു. ഓസ്ട്രിയയുടെ ഡിഎസ്എൻ സുരക്ഷാ സേവനം കൈത്തോക്കുകളും സ്ഫോടകവസ്തുക്കളും അടങ്ങിയ ഒരു ആയുധ ശേഖരം കണ്ടെത്തിയിരുന്നു. ആയുധശേഖരത്തിന് ഹമാസ് രാഷ്ട്രീയ വിഭാഗത്തിലെ മുതിർന്ന ഉദ്യോഗസ്ഥനായ ബാസെം നയിമിന്റെ മകനും, ഗാസയിലെ മുതിർന്ന ഹമാസ് നേതാവായ ഖലീൽ അൽ-ഹയ്യയുമായി അടുത്ത ബന്ധം പുലർത്തുന്നയാളുമായ ഹമാസ് നേതാവ് മുഹമ്മദ് നയിമുമായി ബന്ധമുണ്ടെന്ന് കണ്ടെത്തി.
വിദേശത്തുള്ള ഹമാസ് നേതൃത്വം ഈ ശ്രമങ്ങൾക്ക് രഹസ്യമായി സൗകര്യമൊരുക്കുകയാണെന്നും ഭീകര പ്രവർത്തനങ്ങൾ മുന്നോട്ട് കൊണ്ടുപോകുന്നതിൽ ഖത്തറിലെ സംഘടനയുടെ നേതൃത്വത്തിന്റെ പങ്കാളിത്തം ഇതാദ്യമായല്ല വെളിപ്പെടുന്നതെന്നും മൊസാദ് പറഞ്ഞു. സെപ്റ്റംബറിൽ ഖത്തറിൽ വെച്ച് മുഹമ്മദ് നയിമും പിതാവും തമ്മിൽ നടന്ന ഒരു കൂടിക്കാഴ്ചയും ഏജൻസി ചൂണ്ടിക്കാട്ടി.
Mossad warns of growing Hamas network across Europe
