ഫ്‌ളോറിഡ : ബഹിരാകാശ യാത്രികരായ സുനിത വില്യംസിനെയും ബുച്ച് വില്‍മോറിനെയും തിരിച്ചുകൊണ്ടുവരാനുള്ള നാസയും സ്പേസ് എക്സും ചേര്‍ന്നു നടത്തിയ ക്രൂ 10 പേടകം ഇന്ന് അന്താരാഷ്ട്ര ബഹിരാകാശ നിലയത്തില്‍ (ഐഎസ്എസ്) എത്തും.
നാല് ബഹിരാകാശ സഞ്ചാരികളുമായി ഇന്നലെ വൈകുന്നേരം 7:03 ന് (ഇന്ത്യന്‍ സമയം ശനിയാഴ്ച പുലര്‍ച്ചെ 4:30) ആണ് പേടകം പുറപ്പെട്ടത്. ഞായറാഴ്ച രാവിലെ 9 മണിക്ക് ക്രൂ 10 അന്താരാഷ്ട്ര ബഹിരാകാശ നിലയത്തില്‍ ഡോക്ക് ചെയ്യും. നാസയിലെ ആനി മക്ലെയിന്‍, നിക്കോള്‍ അയേഴ്‌സ്, ജാപ്പനീസ് ബഹിരാകാശ ഏജന്‍സിയായ ജാക്‌സയിലെ തകുയ ഒനിഷി, റോസ്‌കോസ്‌മോസിന്റെ കിറില്‍ പെസ്‌കോവ് എന്നിവരാണ് സംഘത്തിലുള്ളത്.
ഡോക്കിംഗിന് ശേഷം, ക്രൂ-10 ബഹിരാകാശയാത്രികര്‍ അവരുടെ സ്പേസ് സ്യൂട്ടുകള്‍ മാറ്റി, ഡ്രാഗണ്‍ ബഹിരാകാശ പേടകത്തിനും ഐഎസ്എസിന്റെ ഹാര്‍മണി മൊഡ്യൂളിനും ഇടയിലുള്ള ഹാച്ച് തുറക്കും. പിന്നീട് സ്റ്റേഷനില്‍ കയറിക്കഴിഞ്ഞാല്‍, ക്രൂ-10 സ്വാഗത പ്രസംഗങ്ങളും തുടര്‍ന്ന് ക്രൂ-9 ന്റെ വിടവാങ്ങല്‍ പ്രസംഗങ്ങളും നാസ സംപ്രേഷണം ചെയ്യും. ക്രൂ-10 ന്റെ വരവോടെ, ഐഎസ്എസിലെ ആകെ ബഹിരാകാശയാത്രികരുടെ എണ്ണം 11 ആയി ഉയരും. നിക്ക് ഹേഗ്, സുനിത വില്യംസ്, ബുച്ച് വില്‍മോര്‍, ഗോര്‍ബുനോവ് എന്നിവര്‍ മാര്‍ച്ച് 19 ബുധനാഴ്ചയ്ക്ക് മുമ്പ് ഭൂമിയിലേക്ക് മടങ്ങും. ഇവര്‍ പുറപ്പെടുന്നതിനു മുമ്പ്, ഫ്‌ളോറിഡ തീരത്തെ കാലാവസ്ഥാ സാഹചര്യങ്ങള്‍ മിഷന്‍ ടീമുകള്‍ വിലയിരുത്തി സുരക്ഷിതമായ തിരിച്ചുവരവ് ഉറപ്പാക്കും.
ഫ്‌ളോറിഡയിലെ കെന്നഡി സ്പേസ് സെന്ററില്‍ നിന്ന് ഫാല്‍ക്കണ്‍ 9 റോക്കറ്റിലാണ് സ്പേസ് എക്‌സ് ക്രൂ 10 വിക്ഷേപിച്ചത്. മാര്‍ച്ച് 12 ന് ഫ്‌ലോറിഡയില്‍ നിന്ന് ക്രൂ10 ദൗത്യം നടത്താന്‍ സ്പേസ് എക്സും നാസയും പദ്ധതിയിട്ടിരുന്നു. എന്നാല്‍ അവസാന നിമിഷം റോക്കറ്റില്‍ സാങ്കേതിക തകരാര്‍ കണ്ടെത്തിയതിനെ തുടര്‍ന്ന് ദൗത്യം നീട്ടി വയ്ക്കുകയായിരുന്നു. നാസയും ഇലോണ്‍ മസ്‌കിന്റെ സ്പേസ് എക്സും ചേര്‍ന്നുള്ള ദൗത്യമാണ് ക്രൂ10.
9 മാസമായി ബഹിരാകാശ നിലയത്തില്‍ കുടുങ്ങിക്കിടക്കുകയാണ് സുനിതയും ബുച്ച് വില്‍മോറും . ക്രൂ 10 എത്തി ഏതാനും ദിവസങ്ങള്‍ക്ക് ശേഷമേ സുനിത വില്യംസും ബുച്ചും ഭൂമിയിലേക്ക് മടങ്ങിയെത്തുകയുള്ളൂ. കഴിഞ്ഞ ജൂണ്‍ അഞ്ചിനായിരുന്നു ബോയിങ് സ്റ്റാര്‍ലൈനര്‍ പേടകത്തില്‍ സുനിത വില്യംസും, ബുച്ച് വില്‍മോറും ബഹിരാകാശ നിലയത്തിലെത്തിയത്.
