വാഷിംഗ്ടൺ: വൈറ്റ് ഹൗസിൽ നടന്ന റിപ്പബ്ലിക്കൻ സെനറ്റർമാരുമായുള്ള യോഗത്തിൽ, ചൈനീസ് പ്രസിഡൻ്റ് ഷി ജിൻപിംഗുമായും അദ്ദേഹത്തിൻ്റെ ഉദ്യോഗസ്ഥരുമായും താൻ നടത്തിയ ഉഭയകക്ഷി കൂടിക്കാഴ്ചയെക്കുറിച്ച് യുഎസ് പ്രസിഡൻ്റ് ഡോണൾഡ് ട്രംപ് വിവരിച്ചു. ഷി ജിൻപിംഗിൻ്റെ ഇരുവശത്തും ആറ് ഉദ്യോഗസ്ഥർ വീതം ഉണ്ടായിരുന്നുവെന്നും, അവരെല്ലാവരും നിവർന്നു നിൽക്കുകയായിരുന്നുവെന്നും ട്രംപ് വിവരിച്ചു.
അവരിൽ ഓരോരുത്തരും ഇങ്ങനെയാണ് നിന്നിരുന്നത്, കൈകൾ പുറകിൽ കെട്ടി, താടി ഉയർത്തിക്കൊണ്ട് ട്രംപ് പറഞ്ഞു. അവർ ശ്രദ്ധാഭാവത്തിലായിരുന്നു.
അവരിൽ ഒരാളോട് ട്രംപ് സംസാരിച്ചപ്പോൾ ഒരു പ്രതികരണവും ലഭിച്ചില്ല. “ഞാൻ ചോദിച്ചു, ‘നിങ്ങൾ എന്നോട് മറുപടി പറയുന്നില്ലേ?’ ഒരു പ്രതികരണവും കിട്ടിയില്ല. പ്രസിഡൻ്റ് ഷി അവനെ അതിന് അനുവദിച്ചില്ല,” അദ്ദേഹം കൂട്ടിച്ചേർത്തു. എൻ്റെ കാബിനറ്റും അങ്ങനെ പെരുമാറണം എന്ന് ഞാൻ ആഗ്രഹിക്കുന്നുവെന്നും ട്രംപ് കൂട്ടിചേർത്തു.
“ഇത്രയും പേടിച്ച മനുഷ്യരെ ഞാൻ എൻ്റെ ജീവിതത്തിൽ കണ്ടിട്ടില്ല,” യുഎസ് നേതാവ് പറഞ്ഞപ്പോൾ മുറിയിൽ ചിരി മുഴങ്ങി. എങ്കിലും, ട്രംപിൻ്റെ കാബിനറ്റ് യോഗങ്ങളും അമിതമായ സ്തുതിപാഠകത്വത്തിനുള്ള വേദിയാണെന്നത് ശ്രദ്ധേയമാണ്. ഓഗസ്റ്റിൽ ടെലിവിഷനിൽ സംപ്രേക്ഷണം ചെയ്ത ഒരു കാബിനറ്റ് യോഗം, ഒരു സർക്കാർ മീറ്റിംഗിനേക്കാൾ ട്രംപിനെ ആർക്ക് കൂടുതൽ പ്രശംസിക്കാൻ കഴിയുമെന്ന ഒരു മത്സരമായി തോന്നി.
പ്രസിഡൻ്റ് ജോ ബൈഡൻ്റെ മുൻ പ്രസ് സെക്രട്ടറിയായിരുന്ന ജെൻ സാക്കി ഈ യോഗത്തെ സ്തുതിപാഠകത്വം നിറഞ്ഞത് എന്ന് വിശേഷിപ്പിച്ചു. ട്രംപിൻ്റെ മുതിർന്ന ഉദ്യോഗസ്ഥരുടെ ഈ സ്തുതിപാടൽ കിം ജോങ് ഉൻ പോലുള്ള ഉത്തരകൊറിയൻ നേതാക്കളെയോ റഷ്യൻ പ്രസിഡൻ്റ് വ്ലാഡിമിർ പുടിനെയോ പോലും ചുവപ്പിക്കുമെന്നും അവർ കൂട്ടിച്ചേർത്തു.
