വാഷിംഗ്ടൺ: തന്‍റെ ഇന്ത്യൻ വേരുകളിൽ നിന്ന് അകലം പാലിക്കുന്നതായി പ്രഖ്യാപിച്ച് ഇന്ത്യൻ-അമേരിക്കൻ റിപ്പബ്ലിക്കൻ നേതാവ് നിക്കി ഹേലിയുടെ മകൻ നളിൻ ഹേലി. തനിക്ക് അമേരിക്കയോട് മാത്രമാണ് കൂറെന്നും അദ്ദേഹം വ്യക്തമാക്കി. “ഞാനറിഞ്ഞിട്ടുള്ളത് അമേരിക്കയെ മാത്രമാണ്. ഞാൻ ഒരിക്കലും പോകാത്ത ഒരു രാജ്യത്തോട് എനിക്ക് വിചിത്രമായ കൂറ് ഉണ്ടാകേണ്ട കാര്യമില്ല,” നളിൻ ഹേലി ന്യൂയോർക്ക് പോസ്റ്റിനോട് പറഞ്ഞു. “നമ്മുടെ സമ്പദ്‌വ്യവസ്ഥ ദുർബലമായിരിക്കുന്ന, കമ്പനികൾ അമേരിക്കക്കാരെ നിയമിക്കാത്ത, എഐ ധാരാളം ജോലികൾ ഏറ്റെടുക്കുന്ന ഒരു സമയത്ത് നിയമപരമായ കുടിയേറ്റം അനുവദിക്കുന്നത് ഉത്തരവാദിത്തമുള്ള കാര്യമായി ഞാൻ കരുതുന്നില്ല,” അദ്ദേഹം കൂട്ടിച്ചേർത്തു.
“നമ്മുടെ കുട്ടികളെ നിയമിക്കാത്ത സമയത്ത് വിദേശ തൊഴിലാളികൾ ഇങ്ങോട്ട് വരുന്നത് അർത്ഥശൂന്യമാണ്,” എന്നും അദ്ദേഹം പറഞ്ഞു. നളിന്‍റെ മുത്തച്ഛൻ അജിത് സിംഗ് രൺധാവ, പഞ്ചാബിൽ നിന്ന് യുഎസിലേക്ക് കുടിയേറിയ വ്യക്തിയാണ്. അദ്ദേഹം യുഎസിൽ മികച്ച അക്കാദമിക് ജീവിതം കെട്ടിപ്പടുത്തു. നളിൻ അടുത്തിടെ H1-B വിസകൾ നിരോധിക്കാനും നിയമപരമായ കുടിയേറ്റം പരിമിതപ്പെടുത്താനും വാദിച്ചുകൊണ്ട് വാർത്തകളിൽ ഇടം നേടിയിരുന്നു.
നിരാശരായ തലമുറയായി താൻ വിശേഷിപ്പിക്കുന്ന ജെൻ സിയുടെ വക്താവായി സ്വയം നിലയുറപ്പിച്ചുകൊണ്ട്, യുവാക്കളുടെ ശബ്ദം കേൾക്കാത്തതിന് നളിൻ റിപ്പബ്ലിക്കൻ പാർട്ടിയെ വിമർശിച്ചു. റിപ്പബ്ലിക്കൻ പാർട്ടി അമേരിക്കൻ തൊഴിലാളികളുടെ താൽപ്പര്യങ്ങൾക്ക് മുകളിൽ കോർപ്പറേറ്റ് പ്രമാണിമാർക്ക് പ്രാധാന്യം നൽകുന്നു എന്നും അദ്ദേഹം ആരോപിച്ചു. 24 വയസുള്ള ധനകാര്യ വിദഗ്ധനായ നളിൻ, ന്യൂയോർക്ക് സിറ്റി മേയർ തിരഞ്ഞെടുപ്പിൽ ഇന്ത്യൻ വംശജനായ സൊഹ്റാൻ മംദാനിയുടെ വിജയത്തിന്‍റെ പേരിലും പാര്‍ട്ടിയെ വിമര്‍ശിച്ചു.
