കാലിഫോര്‍ണിയ: കാലിഫോർണിയയിൽ അറസ്റ്റ് ചെയ്യുമ്പോൾ നിയമ നിർവ്വഹണ ഉദ്യോഗസ്ഥർ മുഖം മറയ്ക്കുന്നത് തടയാൻ ലക്ഷ്യമിട്ടുള്ള നിയമം മുന്നോട്ട് വച്ച് രണ്ട് കാലിഫോർണിയൻ നിയമനിർമ്മാതാക്കൾ. “നോ സീക്രട്ട് പോലീസ് ആക്റ്റ്” എന്ന് പേരിട്ടിരിക്കുന്ന ഈ ബിൽ, സംസ്ഥാന സെനറ്റിലെ രണ്ട് ഡെമോക്രാറ്റുകളാണ് അവതരിപ്പിച്ചത്. രാജ്യത്തുടനീളം സാധാരണ വേഷത്തിൽ മുഖംമൂടി ധരിച്ചെത്തുന്ന ഏജന്‍റുമാർ തങ്ങളുടെ പേരോ ഏജൻസിയോ വെളിപ്പെടുത്താൻ വിസമ്മതിക്കുന്നത് വർദ്ധിച്ചുവരുന്ന സാഹചര്യത്തിലാണ് ഈ നിയമം വരുന്നത്.
കാലിഫോർണിയയിലെ സമീപകാല ഫെഡറൽ ഓപ്പറേഷനുകൾ ഭീകരതയുടെ അന്തരീക്ഷം സൃഷ്ടിച്ചിട്ടുണ്ടെന്ന് ഡി-സാൻ ഫ്രാൻസിസ്കോ സെനറ്റർ സ്കോട്ട് വീനർ ഒരു പ്രസ്താവനയിൽ പറഞ്ഞു. പൊതുജനങ്ങൾക്ക് നിയമ നിർവ്വഹണ ഉദ്യോഗസ്ഥരെ വിശ്വസിക്കണമെങ്കിൽ, ഒരു സ്വേച്ഛാധിപത്യ രാജ്യത്തിലെ രഹസ്യ പോലീസിനെപ്പോലെ പെരുമാറാൻ അവരെ അനുവദിക്കരുതെന്നും അദ്ദേഹം പറഞ്ഞു. ട്രംപ് ഭരണകൂടത്തിന്‍റെ അതിശക്തമായ കുടിയേറ്റ നിയമനിർമ്മാണത്തിനെതിരായ പ്രതിഷേധം ജൂൺ ആദ്യം ലോസ് ഏഞ്ചൽസിൽ തെരുവുപ്രകടനങ്ങൾ അക്രമാസക്തമായപ്പോൾ വ്യാപകമായി. കാലിഫോർണിയൻ നിയമനിർമ്മാതാക്കൾ പ്രസിഡന്‍റ് ഡോണാൾഡ് ട്രംപിന്റെ ഏറ്റവും ശക്തരായ എതിരാളികളായി മാറിയിട്ടുണ്ട്.
