ലോസ് ഏഞ്ചല്സ് : അരിസോണയിലെ സ്കോട്ട്സ്ഡെയ്ലിലെ മുനിസിപ്പല് വിമാനത്താവളത്തില് ലാന്ഡ് ചെയ്യുന്നതിനിടെ ബിസിനസ് ജെറ്റ് റണ്വേയില് നിന്ന് തെന്നിമാറി പാര്ക്ക് ചെയ്തിരുന്ന മറ്റൊരു ജെറ്റില് ഇടിച്ച് അപകടം. ഒരാള് മരിച്ചതായി അധികൃതര് അറിയിച്ചു. കുറഞ്ഞത് നാല് പേര്ക്ക് പരിക്കേറ്റതായി സ്കോട്ട്സ്ഡെയ്ല് ഫയര് ഡിപ്പാര്ട്ട്മെന്റിന്റെ വക്താവ് ഡേവ് ഫോളിയോ പത്രസമ്മേളനത്തില് പറഞ്ഞു.
ജെറ്റ് റണ്വേയില് നിന്ന് തെന്നിമാറിയതിന്റെ കാരണം എന്താണെന്ന് ഉടന് വ്യക്തമല്ല. ലിയര്ജെറ്റ് 35A ആണ് ലാന്ഡിംഗിനിടെ റണ്വേയില് നിന്ന് തെന്നിമാറി ഗള്ഫ്സ്ട്രീം 200 ജെറ്റുമായി കൂട്ടിയിടിച്ചത്. അപകടത്തെക്കുറിച്ച് അന്വേഷിക്കുകയാണെന്ന് ഫെഡറല് ഏവിയേഷന് അഡ്മിനിസ്ട്രേഷന് അറിയിച്ചു.
വാഷിംഗ്ടണ് ഡിസിയില് ഒരു പാസഞ്ചര് ജെറ്റും യുഎസ് ആര്മി ബ്ലാക്ക് ഹോക്ക് ഹെലികോപ്റ്ററും ആകാശത്ത് കൂട്ടിയിടിച്ച് 67 പേര് കൊല്ലപ്പെട്ട സംഭവം അടുത്തിടെയാണ് ഉണ്ടായത്. ഏഴ് പേര് കൊല്ലപ്പെട്ട ഫിലാഡല്ഫിയയില് ഒരു മെഡിക്കല് ജെറ്റ് അപകടം, 10 പേര് കൊല്ലപ്പെട്ട അലാസ്കയില് ഒരു വിമാനാപകടം എന്നിവയും കഴിഞ്ഞ ആഴ്ചകളിലെ മൂന്ന് മാരകമായ അപകടങ്ങളായിരുന്നു. ഇവയില് ചിലത് നാഷണല് ട്രാന്സ്പോര്ട്ടേഷന് സേഫ്റ്റി ബോര്ഡ് അന്വേഷിക്കുന്നുണ്ട്. യുഎസ് വ്യോമ സുരക്ഷയെക്കുറിച്ചുള്ള കൂടുതല് പരിശോധന നടക്കുന്ന സമയത്താണ് പുതിയ ജെറ്റ് അപകടം.
