കോട്ടയം : ഒരു മതവിഭാഗത്തിനെതിരെ വിദ്വേഷ പരാമര്‍ശം നടത്തിയതിനെത്തുടര്‍ന്നുണ്ടായ കേസില്‍ ജാമ്യം നിഷേധിക്കപ്പെട്ട പിസി ജോര്‍ജ്ജിനെ അറസ്റ്റ് ചെയ്യാന്‍ നീക്കമുണ്ടെന്ന് സൂചന.
പി.സി.ജോര്‍ജിനോട് സ്റ്റേഷനില്‍ ഹാജരാകാന്‍ ആവശ്യപ്പെട്ട് ഈരാറ്റുപേട്ട പൊലീസ് നോട്ടിസ് നല്‍കിയെങ്കിലും അദ്ദേഹം നോട്ടിസ് കൈപ്പറ്റിയിട്ടില്ല. പാര്‍ട്ടി തീരുമാനം അനുസരിച്ച് സ്റ്റേഷനില്‍ ഹാജരാകാനാണ് ജോര്‍ജിന്റെ തീരുമാനം. ചാനല്‍ ചര്‍ച്ചയ്ക്കിടെ നടത്തിയ മതവിദ്വേഷ പരാമര്‍ശത്തില്‍ പി.സി.ജോര്‍ജിനെ അറസ്റ്റ് ചെയ്യാന്‍ സാധ്യതയുണ്ടെന്നാണ് വിവരം.
ഈരാറ്റുപേട്ട യൂത്ത് ലീഗ് മണ്ഡലം കമ്മിറ്റിയാണ് പരാതി നല്‍കിയത്. കേസില്‍ ഉന്നത പൊലീസ് ഉദ്യോഗസ്ഥരുടെ നിര്‍ദേശത്തിനനുസരിച്ച് നടപടിയെടുക്കാനാണ് ഈരാറ്റുപേട്ട പൊലീസിന്റെ നീക്കം. ടെലിവിഷന്‍ ചര്‍ച്ചയ്ക്കിടെ നടത്തിയ പരാമര്‍ശം അബദ്ധത്തില്‍ പറ്റിപ്പോയ പിഴവെന്നായിരുന്നു പി.സി.ജോര്‍ജിന്റെ വാദം. പക്ഷേ ഈ വാദം കണക്കിലെടുക്കാതെ ഹൈക്കോടതി ജാമ്യം നിഷേധിക്കുകയായിരുന്നു.
