വാഷിംഗ്ടൺ: പ്രസിഡന്റ് ഡോണൾഡ് ട്രംപ് തന്റെ ദീർഘകാല വാഗ്ദാനമായ “ഗോൾഡ് കാർഡ്” ഔദ്യോഗികമായി വിൽപ്പനയ്ക്കെത്തുന്നതായി പ്രഖ്യാപിച്ചു. പദ്ധതി പ്രകാരം, വ്യക്തിഗത അപേക്ഷകർക്ക് ഒരു മില്യൺ യുഎസ് ഡോളറാണ് യുഎസ് ട്രഷറിയിൽ സംഭാവന നൽകേണ്ടത്. കോർപറേറ്റ് അല്ലെങ്കിൽ കമ്പനികൾ സ്പോൺസർ ചെയ്യുന്ന അപേക്ഷകൾക്ക് രണ്ട് മില്യൺ യുഎസ് ഡോളർ സംഭാവന നൽകണം. അപേക്ഷാ ഫീസ് 15,000 യുഎസ് ഡോളർ ആയിരിക്കും. യുഎസിൽ നിയമപരമായ പദവിയും ഒടുവിൽ യുഎസ് പൗരത്വത്തിലേക്കുള്ള വഴിയും വാഗ്ദാനം ചെയ്യുന്നതാണ് ഗോൾഡ് കാർഡ്.
ഗോൾഡി കാർഡ് പദ്ധതിക്ക് ഔദ്യോഗികമായി തുടക്കമായെന്നും അപേക്ഷകൾ സ്വീകരിക്കുന്ന ഒരു വെബ്സൈറ്റ് സജീവമായതായും വൈറ്റ് ഹൗസിലെ റൂസ്വെൽറ്റ് റൂമിൽ ബിസിനസ്സ് നേതാക്കൾ പങ്കെടുത്ത ചടങ്ങിൽ ട്രംപ് വ്യക്തമാക്കി.
വിദേശ നിക്ഷേപം സൃഷ്ടിക്കുന്നതിനായി 1990-ൽ കോൺഗ്രസ് സൃഷ്ടിച്ചതും കുറഞ്ഞത് 10 പേർക്ക് ജോലി നൽകുന്ന ഒരു കമ്പനിയിൽ ഏകദേശം 1 മില്യൺ ഡോളർ ചെലവഴിക്കുന്ന ആളുകൾക്ക് ലഭ്യമായിരുന്നതുമായ EB-5 വിസകൾക്ക് പകരമാകാനാണ് ഗോൾഡ് കാർഡിൻ്റെ ശ്രമം. യുഎസ് ഖജനാവിന് വരുമാനം ഉണ്ടാക്കുന്നതിനൊപ്പം, മികച്ച പ്രതിഭകളെ ആകർഷിക്കാനും നിലനിർത്താനുമുള്ള ഒരു മാർഗമായാണ് ട്രംപ് ഇതിനെ കാണുന്നത്.
പരിപാടിയുടെ ഭാഗമായി എത്തുന്ന എല്ലാ ഫണ്ടുകളും “യുഎസ് സർക്കാരിലേക്ക് പോകും” എന്ന് പ്രസിഡന്റ് പറഞ്ഞു, കൂടാതെ “രാജ്യത്തിന് ഗുണകരമായ കാര്യങ്ങൾ ചെയ്യാൻ കഴിയുന്ന” ട്രഷറി വകുപ്പ് നടത്തുന്ന ഒരു അക്കൗണ്ടിലേക്ക് കോടിക്കണക്കിന് പണം ഒഴുകുമെന്നും അദ്ദേഹം സന്തോഷം പങ്കുവെച്ചു.
ആർക്കാണ് ഗോൾഡ് കാർഡ് യോഗ്യത
ഗോൾഡ് കാർഡ് അപേക്ഷകർക്ക് അമേരിക്കയിൽ സ്ഥിരതാമസത്തിന് യോഗ്യത ഉള്ളവരും അമേരിക്കയിലേക്ക് പ്രവേശിക്കാൻ അനുവാദമുള്ളവരും ആയിരിക്കണം. അപേക്ഷകർക്ക് ഇബി-1 അല്ലെങ്കിൽ ഇബി-2 വിസ വിഭാഗത്തിലാകും സ്ഥിരതാമസത്തിനുള്ള അനുമതി ലഭിക്കുക. അപേക്ഷകർക്ക് മറ്റ് സ്ഥിരതാമസക്കാരെയും പൗരന്മാരെയും പോലെ തന്നെ പരിഗണന ലഭിക്കും. അതേസമയം ദേശീയ സുരക്ഷാപരമായ കാരണങ്ങളോ മറ്റ് അപകടങ്ങളോ ഉണ്ടായാൽ ഗോൾഡ് കാർഡ് റദ്ദാക്കാനും സാധ്യതയുണ്ട്.
President Donald Trump has announced that his long-promised “Gold Card” is officially on sale.
