വാഷിംഗ്ടണ്‍ : വിവിധ രാജ്യങ്ങളില്‍ വിളവെടുപ്പിന് ശേഷം നടക്കുന്ന ആഘോഷമാണ് താങ്ക്‌സ് ഗിവിങ്. അമേരിക്കയാകട്ടെ താങ്ക്‌സ് ഗിവിങ് ആഘോഷത്തിലേക്ക് ആവേശത്തോടെ ചുവടുവച്ചുകഴിഞ്ഞു. ഭക്ഷണം, കാർഷിക വിളവ്, വസ്ത്രം, സൗഹൃദം, സ്നേഹം തുടങ്ങിയവയ്ക്കെല്ലാം പൂർവികർക്കും കുടുംബത്തിനും സുഹൃത്തുക്കൾക്കുമെല്ലാം നന്ദി അറിയിക്കാനുള്ളൊരു ദിനമായി അമേരിക്കക്കാർ ആഘോഷിക്കുന്നതാണ് ‘താങ്ക്‌സ് ഗിവിങ്’.
അമേരിക്കക്കാര്‍ക്ക് താങ്ക്‌സ് ഗിവിങ് വിരുന്നില്‍ തീന്‍മേശയില്‍ ഒഴിച്ചുകൂടാനാവാത്ത വിഭവമാണ് ടര്‍ക്കിയുടേത്. എന്നാല്‍ സ്വാദിഷ്ഠമായ വിഭവമുണ്ടാക്കാന്‍ ടര്‍ക്കികളെ കൊല്ലുമ്പോള്‍ ഇതൊടൊപ്പമുള്ള വേറിട്ട ഒരു ആചാരത്തിലൂടെയാണ് താങ്ക്‌സ് ഗിവിങും കടന്നുപോകുക.
1863 ല്‍ പ്രസിഡന്റായിരുന്ന എബ്രഹാം ലിങ്കനാണ് ടര്‍ക്കികള്‍ക്ക് മാപ്പ് അനുവദിക്കുന്ന ആചാരം തുടങ്ങിവെച്ചത്. മകന് പ്രിയപ്പെട്ട ടര്‍ക്കി കോഴിക്കാണ് അന്ന് പ്രസിഡന്റ് മാപ്പ് അനുവദിച്ചത്. പിന്നീട് 1989ല്‍ മൃഗസംരക്ഷകരുടെ പ്രതിഷേധങ്ങളെ തുടര്‍ന്ന് ജോര്‍ജ് ബുഷ് ആണ് ഇതൊരു ഔദ്യോഗിക വാര്‍ഷിക ആചാരമാക്കി മാറ്റിയത്. ഇക്കൊല്ലം പ്രസിഡന്റ് ഡോണള്‍ഡ് ട്രംപ് ഇത്തരത്തില്‍ രണ്ട് ടര്‍ക്കികള്‍ക്ക് മാപ്പു കൊടുത്തിരിക്കുകയാണ്.
താങ്ക്‌സ്ഗിവിംഗ് ദിനമായ നവംബര്‍ 27ന്, കഴുത്തില്‍ കത്തിവീഴില്ല എന്ന ആശ്വാസത്തോടെ ഇനി വാഡിളിനും ഗോബിളിനും ജീവിക്കാം. നോര്‍ത്ത് കരോലീനയില്‍ നിന്നും ആഘോഷങ്ങളുടെ ഭാഗമാകാന്‍ വാഷിംഗ്ടണിലെത്തിച്ചിരിക്കുകയാണ് ഈ രണ്ട് ടര്‍ക്കി കോഴികളെയും. വര്‍ഷങ്ങളായി വൈറ്റ് ഹൌസ് പിന്തുടര്‍ന്ന് വരുന്ന താങ്ക്‌സ്ഗിവിംഗ് ആചാരത്തിലേക്ക് ഈ വര്‍ഷം ക്ഷണിക്കപ്പെട്ട അതിഥികളാണ് വാഡിളും ഗോബിളും. വൈറ്റ് ഹൗസിലെ പ്രസ് റൂമിലെ ക്യാമറകള്‍ക്ക് മുന്നില്‍ പോസ് ചെയ്യാനെത്തിയ വാഡിളിനെ സ്വീകരിച്ചത്, പ്രസ് സെക്രട്ടറി കാരൊലിന്‍ ലെവിറ്റിന്റെ ഒന്നരവയസുകാരന്‍ മകനായിരുന്നു. പിന്നാലെ പ്രസിഡന്റും ഫസ്റ്റ് ലേഡി മെലാനിയ ട്രംപുമെത്തി ചടങ്ങാരംഭിച്ചു.
എന്നാല്‍, ആഘോഷത്തിനിടയിലും വീണുകിട്ടിയ അവസരം ഡെമോക്രാറ്റുകളെ പരിഹസിക്കാനുള്ളതാക്കി മാറ്റുകയായിരുന്നു ട്രംപ്. ചക്ക് എന്നും നാന്‍സി എന്നും ടര്‍ക്കികളുടെ പേരുമാറ്റണമെന്നായി ട്രംപിന്. ഡെമോക്രാറ്റ് നേതാക്കളായ ചക്ക് ഷൂമറെയും നാന്‍സി പെലോസിയെയും ലക്ഷ്യമിട്ടായിരുന്നു ഈ പരിഹാസം. ടര്‍ക്കികള്‍ക്ക് മാപ്പുകൊടുത്താലും ചക്ക് ഷൂമറെനും നാന്‍സി പെലോസിക്കും മാപ്പ് നല്‍കില്ലെന്നും ട്രംപ് ഒളിയമ്പ് തൊടുത്തു.
വൈറ്റ് ഹൌസിൽ എത്തിച്ച ടര്‍ക്കികള്‍ക്ക് മാപ്പ് നല്‍കിയെന്ന് ട്രംപ് പ്രഖ്യാപിക്കുന്നതായിരുന്നു ചടങ്ങ്. അമേരിക്കയിൽ നിന്ന് നാടുകടത്തപ്പെട്ട കുടിയേറ്റക്കാരെ പാർപ്പിക്കാൻ ഉപയോഗിക്കുന്ന എൽ സാൽവഡോറിലെ കുപ്രസിദ്ധമായ ഒരു ജയിലിലേക്ക് ടർക്കിക്കോഴികളെ അയയ്ക്കാമെന്നും ട്രംപ് തമാശ പറഞ്ഞു. ട്രംപ് മാപ്പ് നല്‍കിയതോടെ, ഇവയെ ഇനി കൊല്ലാനാകില്ല. ഇനിയുള്ള കാലം, നോര്‍ത്ത് കരോലീന സ്റ്റേറ്റ് യൂണിവേഴ്‌സിറ്റിയിലാകും വാഡിളും ഗോബിളും കഴിയുക.
President Donald Trump pardoned two turkeys ahead of thanks giving celebration
