വാഷിങ്ടൺ: സിറിയയിലെ ബാദിയ മേഖലയിൽ ശനിയാഴ്ച ഐഎസ് ഭീകരൻ നടത്തിയ ആക്രമണത്തിൽ രണ്ട് അമേരിക്കൻ സൈനികരും ഒരു സാധാരണക്കാരനായ പരിഭാഷകനും കൊല്ലപ്പെട്ട സംഭവം യുഎസിൽ പ്രതിഷേധ കൊടുങ്കാറ്റ് ഉയർത്തുന്നു. ഈ പശ്ചാത്തലത്തിൽ, സിറിയയിലെ അമേരിക്കൻ സൈനിക സാന്നിധ്യം അടിയന്തരമായി പുനഃപരിശോധിക്കണമെന്ന് കെന്റക്കിയിൽ നിന്നുള്ള റിപ്പബ്ലിക്കൻ സെനറ്റർ റാൻഡ് പോൾ ശക്തമായി ആവശ്യപ്പെട്ടു.
സെനറ്റർ പോൾ എൻബിസിയുടെ “മീറ്റ് ദ പ്രസ്” എന്ന പരിപാടിയിൽ സംസാരിക്കുകയായിരുന്നു സെനറ്റർ പോൾ. കൊല്ലപ്പെട്ട സൈനികർക്ക് നീതി ലഭിക്കണമെന്ന് അദ്ദേഹം ആവശ്യപ്പെട്ടെങ്കിലും, സിറിയയിൽ സൈന്യത്തെ നിലനിർത്തേണ്ട കാര്യമുണ്ടോ എന്ന വലിയ ചോദ്യമാണ് അദ്ദേഹം ഉന്നയിച്ചത്. “അതെ, നമ്മുടെ സൈനികരെ കൊലപ്പെടുത്തിയവരെ ശിക്ഷിക്കണം. എന്നാൽ, സിറിയയിൽ നമ്മുടെ സൈന്യം തുടരേണ്ടതുണ്ടോ എന്ന കാര്യം നമ്മൾ യഥാർത്ഥത്തിൽ പുനഃപരിശോധിക്കണം,” പോൾ പറഞ്ഞു.
സിറിയയിൽ നിലവിലുള്ള നൂറുകണക്കിന് സൈനികർ ഒരു തന്ത്രപരമായ മുതൽക്കൂട്ട് എന്നതിനേക്കാൾ ഒരു അപകടക്കെണി മാത്രമാണ്. അവർക്ക് യുദ്ധത്തെ തടയാൻ കഴിയുമെന്ന് താൻ കരുതുന്നില്ലെന്നും സെനറ്റർ പോൾ വിമർശിച്ചു.
പ്രത്യാക്രമണം ഉണ്ടാകുമെന്ന് ട്രംപിന്റെ മുന്നറിയിപ്പ്
യുഎസ് സെൻട്രൽ കമാൻഡിന്റെ റിപ്പോർട്ട് അനുസരിച്ച്, ഒറ്റയ്ക്ക് എത്തിയ ഐഎസ് തോക്കുധാരിയാണ് ആക്രമണം നടത്തിയത്. ശനിയാഴ്ചത്തെ ഈ ക്രൂരമായ ആക്രമണത്തിന് പ്രത്യാക്രമണം നടത്തുമെന്ന് പ്രസിഡന്റ് ഡോണൾഡ് ട്രംപ് പ്രതിജ്ഞയെടുത്തിട്ടുണ്ട്. കൊല്ലപ്പെട്ട സൈനികർ പ്രദേശത്തെ ഐഎസ് വിരുദ്ധ/ഭീകരവിരുദ്ധ ഓപ്പറേഷനുകളുടെ ഭാഗമായ ദൗത്യത്തിലായിരുന്നുവെന്ന് പെന്റഗൺ വക്താവ് പ്രസ്താവനയിൽ അറിയിച്ചു. വർഷങ്ങളായി അമേരിക്കൻ സൈന്യം സിറിയയുടെ വിവിധ ഭാഗങ്ങളിൽ ഭീകരവാദത്തിനെതിരെ പോരാടിക്കൊണ്ടിരിക്കുകയാണ്. എന്നാൽ, ഈ ഏറ്റവും പുതിയ ആക്രമണം, സിറിയയിലെ സൈനിക ദൗത്യങ്ങളുടെ നിലനിൽപ്പിന്റെ പ്രാധാന്യം സംബന്ധിച്ച് യുഎസ് കോൺഗ്രസ്സിൽ പുതിയ ചർച്ചകൾക്ക് തിരികൊളുത്തിയിരിക്കുകയാണ്.
