തിരുവനന്തപുരം: ശബരിമല ക്ഷേത്രത്തിലെ സ്വർണ്ണക്കവർച്ച കേസിൽ തിരുവിതാംകൂർ ദേവസ്വം ബോർഡിന്റെ മുൻ എക്സിക്യൂട്ടീവ് ഓഫീസർ മുരാരി ബാബുവിനെ റാന്നി കോടതി 14 ദിവസത്തേക്ക് റിമാൻഡ് ചെയ്തു. പെരുന്നയിലെ വീട്ടിൽ നിന്ന് എസ്ഐടി കസ്റ്റഡിയിലെടുത്ത ശേഷം ഈഞ്ചക്കൽ ക്രൈം ബ്രാഞ്ച് ഓഫീസിൽ ചോദ്യം ചെയ്താണ് അറസ്റ്റ് രേഖപ്പെടുത്തിയത്. നിലവിൽ സസ്പെൻഷനിലുള്ള മുരാരി ബാബുവിനെ തിരുവനന്തപുരം സ്പെഷ്യൽ സബ് ജയിലിലേക്ക് മാറ്റും. 2019ലെ ശബരിമല ദ്വാരപാലക പാളികളിലെ സ്വർണ്ണം കവർന്ന കേസിൽ രണ്ടാം പ്രതിയാണ് മുരാരി ബാബു.
സ്വർണ്ണപ്പാളികൾ ചെമ്പാണെന്ന് വ്യാജരേഖകൾ തയ്യാറാക്കിയ ഗൂഢാലോചനയിൽ മുരാരി ബാബു പ്രധാന കണ്ണിയാണെന്ന് ദേവസ്വം വിജിലൻസും എസ്ഐടിയും കണ്ടെത്തി. 1998ൽ ശ്രീകോവിലിലും ദ്വാരപാലക പാളികളിലും സ്വർണ്ണം പതിച്ചിരുന്നത് അറിയാമായിരുന്നിട്ടും, 2019ലും 2024ലും ഇവ ചെമ്പാണെന്ന് രേഖകളിൽ രേഖപ്പെടുത്തി. വിവാദ ഇടനിലക്കാരൻ ഉണ്ണിക്കൃഷ്ണൻ പോറ്റിക്ക് സ്വർണ്ണം കടത്താൻ ആവശ്യമായ ഒത്താശകൾ ചെയ്ത സംഘത്തിലെ പ്രധാനിയാണ് മുരാരി ബാബു. പാളികൾ പോറ്റിയുടെ കൈവശം കൈമാറാൻ അനുവദിക്കണമെന്ന കുറിപ്പ് ദേവസ്വം ബോർഡിന് നൽകിയതും ഇദ്ദേഹമാണ്.
കേസിൽ ഉന്നത ഉദ്യോഗസ്ഥർക്ക് പങ്കുണ്ടോ എന്ന ആശങ്ക ശക്തമാകുകയാണ്. പോറ്റിയുടെ അറസ്റ്റിന് പിന്നാലെ മുരാരി ബാബുവിന്റെ അറസ്റ്റ് കേസിൽ കൂടുതൽ വെളിപ്പെടുത്തലുകൾക്ക് വഴിയൊരുക്കുമെന്നാണ് പ്രതീക്ഷ. ഇനി പോറ്റിയെയും ബാബുവിനെയും ഒരുമിച്ച് ചോദ്യം ചെയ്യാനാണ് എസ്ഐടിയുടെ തീരുമാനം. വർഷങ്ങളായി ദേവസ്വം ബോർഡിൽ ശക്തനായ ഉദ്യോഗസ്ഥനായിരുന്ന മുരാരി ബാബുവിന്റെ അറസ്റ്റ് കേസിന്റെ അന്വേഷണത്തിൽ നിർണായക വഴിത്തിരിവാകുമെന്ന് അന്വേഷണ സംഘം കരുതുന്നു. കൂടുതൽ ഉദ്യോഗസ്ഥർക്ക് പങ്കുണ്ടോ എന്നതിൽ ആകാംക്ഷ തുടരുകയാണ്.
