അമേരിക്കയിൽ മലയാളത്തിൻ്റെ അഭിമാന തിളക്കം: ശിവ പണിക്കർ (ശിവൻ മുഹമ്മ) ഇല്ലിനോയിയിലെ പ്ലെയിൻഫീൽഡ് വില്ലേജ് ട്രസ്റ്റിയായി തിരഞ്ഞെടുക്കപ്പെട്ടു

ഷിക്കാഗോ: ഇന്ത്യ പ്രസ് ക്ലബ് ഓഫ് നോർത്ത് അമേരിക്ക മുൻ നാഷണൽ പ്രസിഡണ്ടും കൈരളി ടിവി ഡയറക്ടറുമായ ശിവ പണിക്കർ (ശിവൻ മുഹമ്മ) ഇല്ലിനോയിയിലെ പ്ലെയിൻഫീൽഡ് വില്ലേജ് ട്രസ്റ്റിയായി എതിരില്ലാതെ വിജയിച്ചു . ഇതാദ്യമായാണ് ഒരു ഇന്ത്യാക്കാരൻ ഇവിടെ മത്സരിക്കുന്നതും വിജയിക്കുന്നതും. ഏപ്രിൽ ഒന്നിനായിരുന്നു ഇലക്ഷൻ. മെയ് ആദ്യവാരം അദ്ദേഹം സത്യപ്രതിജ്ഞ ചെയ്യും.

55,000 ഓളം ജനസംഖ്യയുള്ള പ്ലെയിൻഫീൽഡ് ഷിക്കാഗോയിൽ നിന്ന് ഏതാണ്ട് 35 മൈൽ അകലെയുള്ള സമ്പന്നമായ വില്ലേജ് ആണ്. വോട്ടർമാർ 28,000. അതിൽ 1500 ൽ പരം പേർ മാത്രമാണ് ഇന്ത്യക്കാർ. കൂടുതലും വെള്ളക്കാർ. ആറു ട്രസ്റ്റിമാരും വില്ലേജ് പ്രസിഡന്റും (മേയർ) അടങ്ങിയ ബോർഡാണ് വില്ലേജിന്റെ ഭരണം നടത്തുന്നത്. മൂന്നു ട്രസ്ടിമാരെ വേണ്ട സ്ഥാനത്ത് നാല് പേർ മത്സര രംഗത്തുണ്ടായിരുന്നു. എന്നാൽ ഒരാളെ അയോഗ്യനാക്കിയതിനാൽ മൂന്ന് പേരും വിജയിക്കുകയായിരുന്നു. ഇലക്ഷൻ പാർട്ടി അടിസ്ഥാനത്തിലല്ലെങ്കിലും റിപ്പബ്ലിക്കൻ പാർട്ടി ശിവ പണിക്കാരെ പിന്തുണച്ചിരുന്നു. എതിരില്ലായിരുന്നുവെങ്കിലും വോട്ടെടുപ്പ് നടന്നു. 2000 ൽ പരം വോട്ട് ശിവ പണിക്കർക്ക് ലഭിച്ചു. മേയർ സ്ഥാനത്തേക്കുള്ള മത്സരത്തിൽ നിലവിലെ മേയർ ജോൺ അർഗൗഡെലിസ് മൂന്നാമതും തിരഞ്ഞെടുക്കപ്പെട്ടു.

ശിവ പണിക്കരുടെ ഇലക്ഷൻ കമ്മിറ്റിയിൽ താഴെപ്പറയുന്നവരാണ് ഉണ്ടായിരുന്നത്. കാമ്പെയ്ൻ ചെയർമാൻ- ഡെയ്ൽ ഫൊൻ്റാന; കോ-ചെയർ – രാജ് പിള്ള; സെക്രട്ടറി- ഷിബു കുര്യൻ; അംഗങ്ങൾ- ശിശിർ ജെയിൻ, മദൻ പാമുലപതി, രാജൻ മാടശേരി, സുബാഷ് ജോർജ് .

ട്രസ്റ്റി എന്ന നിലയിൽ, വർദ്ധിച്ചുവരുന്ന നികുതി ഭാരം കുറയ്ക്കുകയും പ്ലെയിൻഫീൽഡ് ഗ്രാമം കുടുംബങ്ങൾക്കും കുട്ടികൾക്കും കൂടുതൽ താങ്ങാനാവുന്നതും സുരക്ഷിതവുമാണെന്ന് ഉറപ്പാക്കുകയുമാണ് പ്രധാന ലക്ഷ്യങ്ങൾ. തന്റെ കുടുംബത്തിൽ ആരും രാഷ്ട്രീയത്തിൽ ഇല്ലെന്നു പ്രാദേശിക പത്രത്തിന് നൽകിയ അഭിമുഖത്തിൽ അദ്ദേഹം പറഞ്ഞു.

ഫിസിക്സിൽ ബിരുദാനന്തര ബിരുദം നേടി 1995 ൽ യുഎസിൽ എത്തിയ ശിവൻ മുഹമ്മ വിവര സാങ്കേതിക വിദ്യയിൽ നിരവധി സർട്ടിഫിക്കേഷനുകൾ നേടി. വെബ് ഡിസൈൻ മുതൽ പലചരക്ക് കടകളും മെഡിക്കൽ ഓഫീസുകളും വരെ മാനേജ് ചെയ്തു. സോഫ്റ്റ്‌വെയർ എഞ്ചിനീയറായി ജോലി ചെയ്യുകയും വിജയകരമായ ബിസിനസുകൾ നടത്തുകയും ചെയ്തു. ഇപ്പോൾ മുഴുവൻ സമയ സ്റ്റോക്ക് വ്യാപാരി എന്ന നിലയിലുള്ള വിശാലമായ അനുഭവം ട്രസ്റ്റിയായി സേവിക്കാൻ തന്നെ പ്രാപ്തനാക്കുന്നുവെന്ന് അദ്ദേഹം ചൂണ്ടിക്കാട്ടുന്നു.

‘എന്നിരുന്നാലും, യോഗ്യതകൾ മാത്രം പോരാ. നിങ്ങൾ പറയുന്നത് കേൾക്കുക മാത്രമല്ല, നിങ്ങളുടെ ആശങ്കകൾ പരിഹരിച്ചുവെന്ന് ഉറപ്പാക്കി നിങ്ങൾക്കൊപ്പം നിൽക്കുന്ന ഒരു പ്രതിനിധിയെ നിങ്ങൾ അർഹിക്കുന്നു. തിരഞ്ഞെടുക്കപ്പെട്ടാൽ, നിങ്ങളുടെ പ്രശ്‌നങ്ങൾ എൻ്റേതായി കണക്കാക്കി, പ്ലെയിൻഫീൽഡിനെ എല്ലാവരും അഭിമാനിക്കുന്ന സ്ഥലമാക്കി മാറ്റാൻ അക്ഷീണം പ്രയത്നിക്കും,’ അദ്ദേഹം ഉറപ്പു നൽകി.

മയക്കുമരുന്ന് രഹിത കമ്മ്യൂണിറ്റിയാണ് മറ്റൊരു ലക്‌ഷ്യം. മയക്കുമരുന്ന് ദുരുപയോഗം എല്ലാവർക്കും ഭീഷണിയായതിനാൽ, അത് യുവാക്കളെയും മുതിർന്നവരെയും സ്‌കൂളിനെയും ജോലിസ്ഥലത്തെയും കുടുംബങ്ങളെയും ബാധിക്കുന്നു. ഒരുമിച്ച് പ്രവർത്തിക്കാനും കളിക്കാനും, എല്ലാ വംശീയ, സാമ്പത്തിക, മത വിഭാഗങ്ങളിൽ നിന്നുമുള്ള ആളുകളിലേക്ക് എത്തിച്ചേരാനും ആരോഗ്യകരമായ ഒരു ജീവിതരീതി പ്രോത്സാഹിപ്പിക്കുന്നതിന് സജീവമായി പ്രവർത്തിക്കാനും താൻ മുന്നിലുണ്ടാവുമെന്ന് അദ്ദേഹം ഉറപ്പു പറയുന്നു.

പരിസ്ഥിതി സംരക്ഷണമാണ് മറ്റൊരു വാഗ്ദാനം. നമ്മുടെ ആരോഗ്യത്തിൻ്റെയും ക്ഷേമത്തിൻ്റെയും അടിസ്ഥാനം പ്രകൃതിയാണ്. ഭൂമിയെയും അതിൻ്റെ കാലാവസ്ഥയെയും ആവാസവ്യവസ്ഥയെയും പരിപാലിക്കുന്നില്ലെങ്കിൽ, അത് നമ്മുടെ ക്ഷേമത്തിന് ഹാനികരമാകും.

കുടുംബത്തിനും കുട്ടികൾക്കും സുരക്ഷിതമായ സ്ഥലം എന്നതാണ മറ്റൊന്ന്. കുടുംബത്തിനും കുട്ടികൾക്കും സുരക്ഷിതമായ ഇടം അവരുടെ ആരോഗ്യകരമായ വികസനത്തിന് അത്യന്താപേക്ഷിതമാണ്, അത് സുരക്ഷിതത്വബോധം വളർത്തുകയും വൈകാരിക ക്ഷേമം അനുവദിക്കുകയും പ്രോത്സാഹിപ്പിക്കുകയും ചെയ്യുന്നു.

കൂടുതൽ തൊഴിൽ അവസരങ്ങൾ സൃഷ്ടിക്കുക, വിദ്യാഭ്യാസരംഗം മെച്ചപ്പെടുത്തുക തുടങ്ങിയവയും അജണ്ടയിലുണ്ട്. വോട്ടർമാർ നിങ്ങളെ എന്തിന് വിശ്വസിക്കണമെന്ന് ചോദ്യത്തിന് കഴിഞ്ഞ 30 വർഷമായി താൻ കുടുംബത്തോടൊപ്പം ഈ പ്രദേശത്ത് താമസിക്കുന്നുവെന്ന് അദ്ദേഹം ചൂണ്ടിക്കാട്ടി. “അയൽക്കാരുമായും എല്ലാ വോട്ടർമാരുമായും ശക്തമായ ബന്ധം എനിക്കുണ്ട്. ഇത് സമഗ്രതയ്ക്കും വിശ്വാസ്യതയ്ക്കുമുള്ള എന്റെ പ്രതിബദ്ധതയെ ശക്തിപ്പെടുത്തുന്നു. ജനങ്ങളെ കേൾക്കുകയും മനസ്സിലാക്കുകയും സത്യസന്ധതയോടെ പ്രവർത്തിക്കുകയും ചെയ്യുന്ന ഒരു നേതാവായിരിക്കുക എന്നതാണ് പ്രധാനം. നിങ്ങളുടെ ആശങ്കകൾക്കായി വാദിക്കുകയും അവ പരിഹരിക്കപ്പെടുന്നുണ്ടെന്ന് ഉറപ്പാക്കുകയും ചെയ്യുന്ന ഒരു പ്രതിനിധി. എന്റെ സമൂഹത്തെ സഹായിക്കാൻ എന്റെ കഴിവിന്റെ പരമാവധി ഞാൻ ചെയ്യും.” അദ്ദേഹം പറഞ്ഞു

വിവാഹിതനും രണ്ട് കുട്ടികളുടെ പിതാവുമാണ്. ഭാര്യ 25 വർഷമായി ഈ പ്രദേശത്തു ഫിസിഷ്യനാണ്.

Shiva Panicker (Sivan Muhamma) Elected as Trustee of Plainfield Village Illinois