വാഷിംഗ്ടൺ ഡിസി: വാഷിംഗ്ടൺ ഡിസിയിലെ വൈറ്റ് ഹൗസിന് സമീപം ബുധനാഴ്ചയുണ്ടായ വെടിവയ്പ്പിൽ രണ്ട് യുഎസ് നാഷണൽ ഗാർഡ് സൈനികർക്ക് ഗുരുതരമായി പരുക്കേറ്റു. നാഷനൽ ഗാർഡ്സ് അംഗങ്ങളായ ഇരുവരും പശ്ചിമ വിർജീനിയ സ്വദേശികളാണ്. വെടിവയ്പ്പ് നടത്തിയയാളെ പരിക്കുകളോടെ പിടികൂടിയിട്ടുണ്ട്. സംഭവത്തിൽ ശക്തമായ നടപടിയെടുക്കുമെന്ന് ഉറപ്പുനൽകിക്കൊണ്ട് പ്രസിഡന്റ് ഡോണൾഡ് ട്രംപ് പ്രതികരിച്ചു.
17-ാം സ്ട്രീറ്റ് നോർത്ത്‌വെസ്റ്റിന്റെയും ഐ സ്ട്രീറ്റ് നോർത്ത്‌വെസ്റ്റിന്റെയും ജംഗ്ഷന് സമീപമാണ് സംഭവം നടന്നതെന്ന് പൊലീസ് പറഞ്ഞു, നിരവധി വൈറ്റ് ഹൗസ് ജീവനക്കാർ ജോലി ചെയ്യുന്ന ഐസൻഹോവർ എക്സിക്യൂട്ടീവ് ഓഫീസ് കെട്ടിടം ഉൾപ്പെടുന്ന ഒരു പ്രദേശമാണിത്. വെടിവയ്പ്പിനെ തുടർന്ന് വൈറ്റ് ഹൗസ് അടക്കുകയും പ്രദേശത്ത് സുരക്ഷ ശക്‌തമാക്കുകയും ചെയ്തതായി യുഎസ് ടുഡേയും മറ്റ് നിരവധി യുഎസ് മാധ്യമങ്ങളും റിപ്പോർട്ട് ചെയ്തു.
അക്രമത്തിന് പിന്നിലുള്ളവർ വലിയ വില നൽകേണ്ടി വരുമെന്ന് ട്രംപ് വ്യക്തമാക്കി. “നമ്മുടെ മഹത്തായ നാഷണൽ ഗാർഡിനെയും, നമ്മുടെ എല്ലാ സൈന്യത്തെയും നിയമപാലകരെയും ദൈവം അനുഗ്രഹിക്കട്ടെ. ഇവർ ശരിക്കും മഹാന്മാരാണ്. യുണൈറ്റഡ് സ്റ്റേറ്റ്സിന്റെ പ്രസിഡന്റ് എന്ന നിലയിൽ ഞാനും, പ്രസിഡൻസി ഓഫീസുമായി ബന്ധപ്പെട്ട എല്ലാവരും നിങ്ങളോടൊപ്പമുണ്ട്!”- എന്നും ട്രംപ് പ്രസ്താവനയിലൂടെ അറിയിച്ചു.
വെടിവയ്പ് നടക്കുമ്പോൾ പ്രസിഡന്റ് ട്രംപ് ഫ്ലോറിഡയിൽ അദ്ദേഹത്തിന്റെ വെസ്റ്റ് പാം ബീച്ച് ഗോൾഫ് ക്ലബ്ബിലായിരുന്നു.
പ്രതിയെ തിരിച്ചറിഞ്ഞിട്ടുണ്ടെന്ന് എഫ്ബിഐയിൽ നിന്നും സൂചനകൾ ലഭിക്കുന്നതായി നിരവധി നിയമ നിർവ്വഹണ ഉദ്യോഗസ്ഥരെ ഉദ്ധരിച്ച് സിഎൻഎൻ റിപ്പോർട്ട് ചെയ്തു. 2021 ഓഗസ്റ്റിൽ അഫ്ഗാനിസ്ഥാനിൽ നിന്ന് കുടിയേറിയതായി തോന്നുന്ന വാഷിംഗ്ടൺ സ്റ്റേറ്റിൽ നിന്നുള്ള ഒരാളാണ് പിന്നിലെന്ന് സംശയിക്കപ്പെടുന്നതായും സിഎൻ എൻ റിപ്പോർട്ട് വ്യക്തമാക്കുന്നു.
ഗാർഡുകൾ പട്രോളിംഗ് നടത്തുന്നതിനിടെയാണ് വെടിയേറ്റതെന്ന് പൊലീസ് ഉദ്യോഗസ്ഥർ പറഞ്ഞു. അക്രമിയെന്ന് സംശയിക്കപ്പെടുന്ന ആളെ കീഴടക്കി കസ്റ്റഡിയിലെടുത്തുവെന്നും പൊലീസ് അറിയിച്ചു. അതേസമയം, വെടിവയ്പ്പിനെത്തുടർന്ന് വാഷിംഗ്ടൺ ഡിസിയിലേക്ക് 500 നാഷണൽ ഗാർഡ് സൈനികരെ കൂടി വിന്യസിക്കാൻ പ്രസിഡന്റ് ട്രംപ് ആവശ്യപ്പെട്ടിട്ടുണ്ടെന്ന് പ്രതിരോധ സെക്രട്ടറി പീറ്റ് ഹെഗ്സെത്ത് പറഞ്ഞു.
Shooting near White House: Two National Guard soldiers ‘critically injured’; attacker in custody
