ഗ്യോങ്ജു, ദക്ഷിണ കൊറിയ: ആണവോർജ്ജം ഉപയോഗിച്ച് പ്രവർത്തിക്കുന്ന അന്തർവാഹിനികൾ നിർമ്മിക്കാനുള്ള പദ്ധതിക്ക് ഇന്ധനം ലഭ്യമാക്കുന്നതിന് അനുമതി നൽകണമെന്ന് ദക്ഷിണ കൊറിയ വീണ്ടും അമേരിക്കയോട് ആവശ്യപ്പെട്ടു. ഉത്തര കൊറിയൻ, ചൈനീസ് അന്തർവാഹിനികളുടെ നീക്കങ്ങൾ നിരീക്ഷിക്കുന്നതിന് ഈ ശേഷി അനിവാര്യമാണെന്ന് ദക്ഷിണ കൊറിയ വാദിക്കുന്നു. ബുധനാഴ്ച ദക്ഷിണ കൊറിയയിലെ ഗ്യോങ്ജുവിൽ വെച്ച് നടന്ന കൂടിക്കാഴ്ചയിൽ ദക്ഷിണ കൊറിയൻ പ്രസിഡന്റ് ലീ ജെ മ്യുങ് യുഎസ് പ്രസിഡന്റ് ഡോണാൾഡ് ട്രംപിനോട് നേരിട്ടാണ് ഈ ആവശ്യം ഉന്നയിച്ചത്.
“ആണവശക്തി അന്തർവാഹിനികൾക്ക് ആവശ്യമായ ഇന്ധനം സ്വീകരിക്കാൻ ഞങ്ങൾക്ക് അനുമതി നൽകാൻ പ്രസിഡന്റ് ഒരു തീരുമാനമെടുത്താൽ, അത് ഞങ്ങൾ വിലമതിക്കും,” ട്രംപുമായി നടത്തിയ ഉഭയകക്ഷി കൂടിക്കാഴ്ചയ്ക്ക് മുന്നോടിയായി ലീ പറഞ്ഞു. ആണവാവായുധങ്ങൾ വഹിക്കാൻ ശേഷിയുള്ള അന്തർവാഹിനികൾ നിർമ്മിക്കാൻ ദക്ഷിണ കൊറിയയ്ക്ക് ഉദ്ദേശമില്ലെന്നും, മറിച്ച് ആണവോർജ്ജത്തിൽ പ്രവർത്തിക്കുന്നതും എന്നാൽ പരമ്പരാഗത ആയുധങ്ങൾ മാത്രം വഹിക്കുന്നതുമായ അന്തർവാഹിനികളാണ് ആവശ്യമെന്നും ലീ വ്യക്തമാക്കി.
“ഡീസൽ ഉപയോഗിച്ച് പ്രവർത്തിക്കുന്ന അന്തർവാഹിനികൾക്ക് വെള്ളത്തിനടിയിൽ കൂടുതൽ നേരം തുടരാനുള്ള ശേഷി കുറവാണ്. ഇത് വടക്കൻ കൊറിയൻ അല്ലെങ്കിൽ ചൈനീസ് അന്തർവാഹിനികളെ നിരീക്ഷിക്കുന്നതിൽ ഞങ്ങൾക്ക് പരിമിതികളുണ്ടാക്കുന്നു,” അദ്ദേഹം കൂട്ടിച്ചേർത്തു. യുഎസ് അനുമതി ലഭിക്കുകയും പുതിയ അന്തർവാഹിനികൾ നിർമ്മിക്കുകയും ചെയ്താൽ, ദക്ഷിണ കൊറിയക്ക് ഒടുവിൽ കൊറിയൻ പെനിൻസുലയുടെ ചുറ്റുമുള്ള കടലുകളിൽ നാവിക പ്രതിരോധ പ്രവർത്തനങ്ങൾ നടത്താൻ കഴിയും. ഇത് യുഎസ് സേനയുടെ ഭാരം ഗണ്യമായി കുറയ്ക്കുമെന്നും പ്രസിഡന്റ് ലീ ജെ മ്യുങ് പറഞ്ഞു.
