ന്യൂയോർക്ക്: തകർച്ച നേരിടുന്ന ബിസിനസ്സ് മെച്ചപ്പെടുത്തുന്നതിൻ്റെ ഭാഗമായി സ്റ്റാർബക്സ് നൂറുകണക്കിന് കഫേകൾ അടച്ചുപൂട്ടാനും ആസ്ഥാനത്ത് ജീവനക്കാരെ പിരിച്ചുവിടാനും തീരുമാനിച്ചു. പുതിയ സി.ഇ.ഒ. ബ്രയാൻ നിക്കോളിന്റെ നേതൃത്വത്തിലാണ് പ്രതിസന്ധിയിലായ കോഫി ശൃംഖലയെ പുനരുജ്ജീവിപ്പിക്കാനുള്ള ഈ “നിർണ്ണായകമായ നടപടികൾ” പ്രഖ്യാപിച്ചത്. ഈ മാസം അവസാനത്തോടെ കമ്പനിയുടെ മൊത്തം ശാഖകളിൽ 1% വരുന്ന, അതായത് നൂറുകണക്കിന് സ്റ്റോറുകൾ അടച്ചുപൂട്ടുമെന്ന് നിക്കോൾ വ്യാഴാഴ്ച അറിയിച്ചു.
ജൂൺ അവസാനത്തോടെ വടക്കേ അമേരിക്കയിൽ സ്റ്റാർബക്സിന് 18,734 ശാഖകൾ ഉണ്ടായിരുന്നെങ്കിലും, സെപ്റ്റംബർ അവസാനത്തോടെ ഇത് 18,300 ആയി കുറയും. ഈ പുനഃക്രമീകരണത്തിനായി കമ്പനി ഏകദേശം 1 ബില്യൺ ഡോളർ (ഏകദേശം $100 കോടി) ചെലവ് പ്രതീക്ഷിക്കുന്നു.
ജീവനക്കാർക്ക് അയച്ച കത്തിൽ നിക്കോൾ, അടച്ചുപൂട്ടുന്ന ശാഖകൾ “ഉപഭോക്താക്കളും പങ്കാളികളും പ്രതീക്ഷിക്കുന്ന ഭൗതിക അന്തരീക്ഷം സൃഷ്ടിക്കാൻ കഴിയാത്തതോ, സാമ്പത്തികമായി ലാഭകരമാക്കാൻ സാധ്യതയില്ലാത്തതോ” ആണെന്ന് വ്യക്തമാക്കി. മോശം പ്രകടനം കാരണം സ്റ്റാർബക്സ് പലപ്പോഴും ശാഖകൾ അടച്ചുപൂട്ടാറുണ്ടെങ്കിലും, ഇത്തവണത്തെ നടപടി കൂടുതൽ വിപുലമായതാണെന്ന് നിക്കോൾ പറഞ്ഞു.
“ഇത് ജീവനക്കാരെയും ഉപഭോക്താക്കളെയും ബാധിക്കുന്ന ഒരു പ്രധാന നടപടിയാണ്. ഞങ്ങളുടെ കഫേകൾ സമൂഹത്തിൻ്റെ കേന്ദ്രമാണ്, അതിനാൽ ഏതൊരു ശാഖ അടച്ചുപൂട്ടുന്നതും പ്രയാസകരമാണ്,” അദ്ദേഹം കൂട്ടിച്ചേർത്തു.
നൂറുകണക്കിന് ശാഖകൾ അടച്ചുപൂട്ടുന്നതിനിടയിലും, സ്റ്റാർബക്സ് വളർച്ചയിലേക്ക് മടങ്ങാൻ പദ്ധതിയിടുന്നുണ്ട്. നിലവിലുള്ള 1,000-ത്തിലധികം ശാഖകൾ നവീകരിക്കാനും കമ്പനി തീരുമാനിച്ചു. കൂടുതൽ സുഖപ്രദമായ കസേരകൾ, കൂടുതൽ പവർ ഔട്ട്ലെറ്റുകൾ, ഊഷ്മളമായ നിറങ്ങൾ എന്നിവ ഉൾപ്പെടുത്തി പുതിയ രൂപത്തിലാണ് സ്റ്റാർബക്സ് സ്റ്റോറുകൾ നവീകരിക്കുന്നത്.
