ദീപ്തി വിവിഷ്
ഷിക്കാഗോ : അമേരിക്കയിൽ സീറോമലബാർ രൂപത സ്ഥാപിതമായിട്ട്ഇരുപത്തിയഞ്ചു വർഷം പിന്നിട്ടതിന്റെയും അഭിവന്ദ്യ മാർ ജേക്കബ് അങ്ങാടിയത്തു പിതാവിൻ്റെ ജൂബിലിയുടെയും സമാപനം 2026 ജൂലൈ 9 മുതൽ 12 വരെ ഷിക്കാഗോയിലെ മക്കോർമിക് പ്ലെയ്‌സിൽ നടത്തക്കും. ഇക്കഴിഞ്ഞ സെപ്റ്റംബർ 28നു ചിക്കാഗോ മാർത്തോമാ ശ്ലീഹ കത്തിഡ്രലിലെ പൊതുയോഗത്തിൽ വച്ച് കൺവെൻഷൻ്റെ രജിസ്ട്രേഷൻ ആരംഭിച്ചതായി റവ. ഫാദർ തോമസ് കടുകപ്പിള്ളിൽ ഔദ്യോദികമായി അറിയിക്കുകയുണ്ടായി. ഏകദേശം ആറായിരം പേരെ ഉൾക്കൊള്ളിച്ചു-കൊണ്ടു ള്ള പരിപാടികൾ നടത്താൻ സൗകര്യങ്ങളുള്ള വളരെ മനോഹരമായ സ്ഥലമാണ് ഈ കൺവെൻഷൻ സെന്റർ. ആത്മീയ നവീകരണവും, കലാസാംസ്‌കാരിക പരിപാടികളും സാമൂഹിക വികസന ചിന്തകളും കോർത്തിണക്കികൊണ്ടു ഈ ജൂബിലി കൺവെൻഷൻ അവിസ്‌മരണീയമാക്കാൻ മാസങ്ങളായി പദ്ധതികൾ ഒരുക്കികൊണ്ടിരിക്കുകയാണ്.
2001 മാർച്ച് 13-നാണ്, വിശുദ്ധ ജോൺ പോൾ രണ്ടാമൻ മാർപാപ്പ, സെന്റ് തോമസ് സീറോ മലബാർ കത്തോലിക്കാ രൂപത ഷിക്കാഗോയിൽ സ്ഥാപിക്കുകയും രൂപതയുടെ ആദ്യ മെത്രാനായി മാർ ജേക്കബ് അങ്ങാടിത്ത് പിതാവിനെ നിയമിക്കുകയും ചെയ്‌തത്‌. അമ്പത്തിരണ്ട് ഇടവകകളും മുപ്പത്തിമൂന്ന് മിഷനുകളും ഉൾകൊണ്ടുകൊണ്ട് രൂപത വളർന്നു പന്തലിച്ചു നിൽക്കുന്ന ഈ വേളയിൽ ദൈവത്തിനു നന്ദി അർപ്പിക്കുകയും രൂപതയിലെ എല്ലാ ഇടവകകളിലെയും അംഗങ്ങളെ ഒരുമിച്ചു കൂട്ടി സന്തോഷം പങ്കുവെക്കുകയും ചെയ്യുകയും എന്ന ഉദ്ദേശ്യത്തോടെയാണ് ഈ കൺവെൻഷൻ പദ്ധതിയിട്ടിരിക്കുന്നത്. രൂപതയുടെ വളർച്ചക്കുവേണ്ടി തുടക്കം മുതൽ ആത്മാർത്ഥയി സഹകരിച്ചവരോടുള്ള നന്ദിയും കടപ്പാടും പ്രകടിപ്പിക്കാനും ഈ കൺവെൻഷൻ അവസരമാകും. മുതിർന്നവർ, യുവജനങ്ങൾ, ഹൈസ്‌കൂൾ-കോളേജ് പ്രായക്കാർ, കുട്ടികൾ എന്നീ നാലു വ്യത്യസ്ത വിഭാഗങ്ങളിലായാണ് കൺവെൻഷൻ പരിപാടികൾ ആസൂത്രണം ചെയ്തിരിക്കുന്നത്. വളരെയധികം പരിജ്ഞാനവും ആത്മീയ കാര്യങ്ങളിൽ പ്രാവീണ്യമുള്ള പ്രശസ്‌തരായ പ്രഭാഷകർ ഈ കൺവെൻഷനിൽ ക്ലാസുകൾ എടുക്കാൻ വരുന്നുണ്ട്.
സീറോ മലബാർ രൂപതയുടെ സഭാതലവനായ മേജർ ആർച്ചു ബിഷപ്പ് മാർ റാഫേൽ തട്ടിൽ പിതാവിൻ്റെ അനുഗ്രഹാശിസ്സുകളോടെയാണ് ഈ കൺവെൻഷനുള്ള ഒരുക്കങ്ങൾക്ക് തുടക്കമിട്ടത്. അതോടൊപ്പം തന്നെ അമേരിക്കയിലെ സിറോമലബാർ സഭയുടെ അമരക്കാരനായ അഭിവന്ദ്യ മാർ ജോയ് ആലപ്പാട്ട് പിതാവിന്റെ പ്രാർത്ഥനയും ശക്തമായ നേതൃത്ത്വവും ഈ കൺവെൻഷന്റെ വിജയത്തിലേക്ക് നയിക്കുന്നു. ജൂബിലി ജനറൽ കൺവീനർമാരായി റവ. ഫാദർ ജോൺ മേലേപ്പുറവും റവ. ഫാദർ തോമസ് മുളവനാലും രൂപത തലത്തിൽ വിവിധ കമ്മിറ്റികൾക്ക് നേതൃത്വം നൽകി പ്രവർത്തിച്ചു വരുന്നു.
മക്കോർമിക് പ്ലേസിൽ നടക്കുന്ന കൺവെൻഷന്റെ മുഖ്യ കൺവീനർ റവ. ഫാദർ തോമസ് കടുകപ്പിള്ളിലും ജോയിന്റ് കൺവീനർമാർ റവ. ഫാദർ ജോയൽ പയസും റവ. ഫാദർ യൂജിൻ ജോസഫുമാണ്. കൺവെൻഷൻ്റെ യൂത്ത് കൺവീനർ ആയി റവ. ഫാദർ മെൽവിൻ പോൾ പ്രവർത്തിക്കുന്നു. ജോസഫ് ചാമക്കാല (ജൂബിലി ചെയർമാൻ ), ആൻഡ്രൂ പി. തോമസ് (ഫിനാൻസ് ), ജോണി വടക്കുംചേരി (ഫെസിലിറ്റി), ബിജി സി മാണി(പ്രോഗ്രാം), സജി വർഗ്ഗീസ് (പബ്ലിക് റിലേഷൻസ് ) എന്നിവർ അടങ്ങുന്ന കോർ കമ്മിറ്റി അംഗങ്ങൾ കൺവെൻഷന് വേണ്ടിയുള്ള ക്രമീകരങ്ങൾ നടത്തിവരുന്നു. കൺവെൻഷൻ സെക്രട്ടറി ശ്രീമതി ബീന വള്ളിക്കളം വളരെ സജീവമായി ഇവരോടൊപ്പം പ്രവർത്തിക്കുന്നു. ഇരുനൂറ്റിഅമ്പതോളം അംഗങ്ങൾ അടങ്ങുന്ന മുപ്പതോളം കമ്മിറ്റികൾ ഈ കൺവെൻഷൻ്റെ വിജയത്തിനായി പ്രവർത്തിച്ചു വരുന്നു.
ഷിക്കാഗോയുടെ ഹൃദയഭാഗത്തും കൺവെൻഷൻ സെന്ററിന് സമീപവുമുള്ള, വളരെ സൗകര്യങ്ങൾ ഉള്ള ഹോട്ടലുകളാണ് പങ്കെടുക്കുന്നവർക്ക് താമസത്തിനായി ഒരുക്കിയിരിക്കുന്നത്. കേരളത്തിൽ നിന്നും അമേരിക്കയിലേക്ക് കുടിയേറി പാർത്ത സിറോമലബാർ സഭാവിശ്വാസികൾ നമ്മുടെ വിശ്വാസപൈതൃകത്തിന്റെ വിത്ത് ഈ നാട്ടിലും വിതച്ചു. അത് ഒത്തിരി ചില്ലകളുള്ള മരമായി വളർന്നിരിക്കുന്നു. ഓരോരുത്തർക്കും അഭിമാനിക്കാനും ഒത്തൊരുമയോടെ സന്തോഷിക്കാനുമുള്ള അപൂർവ്വവസരമാണിത്. ആയതിനാൽ എല്ലാവരും എത്രയും വേഗം റജിസ്റ്റർ ചെയ്‌തു പങ്കാളിത്ത്വം ഉറപ്പുവരുത്തൂ. രജിസ്ട്രേഷൻ ലിങ്ക് താഴെ കൊടുക്കുന്നു.
ലിങ്ക്: https://register.syroconvention.org/syro-convention-2026
Syro Malabar USA Convention Registration
