വാഷിംഗ്ടണ്‍: പ്രസിഡന്‍റ് ഡോണൾഡ് ട്രംപിന്‍റെ രാജ്യവ്യാപകമായ നാടുകടത്തൽ നീക്കം ഈ വാരാന്ത്യത്തിൽ നോർത്ത് കരോലിനയിലെ ഷാർലറ്റിൽ എത്തി. സംസ്ഥാനത്തെ ഏറ്റവും വലിയ നഗരത്തിൽ ഇമിഗ്രേഷൻ എൻഫോഴ്സ്മെൻ്റ് ഏജൻ്റുമാരുടെ തിരച്ചിൽ വർധിപ്പിച്ചതായി ഫെഡറൽ ഉദ്യോഗസ്ഥർ സ്ഥിരീകരിച്ചു. ഏജൻ്റുമാർ പല സ്ഥലങ്ങളിലും അറസ്റ്റ് ചെയ്യുന്നതായി കണ്ടു. മേയർ വി ലൈൽസ് ഉൾപ്പെടെയുള്ള പ്രാദേശിക ഉദ്യോഗസ്ഥർ ഈ നടപടിയെ വിമർശിച്ചു. അനാവശ്യമായ ഭയവും അനിശ്ചിതത്വവും ഇത് സൃഷ്ടിക്കുന്നു എന്ന് അവർ പ്രസ്താവനയിൽ പറഞ്ഞു.
സെൻട്രൽ അവന്യൂവിലെ പ്രശസ്തമായ ബേക്കറിയുടെ പുറത്ത് പച്ച യൂണിഫോം ധരിച്ചവർ ആളുകളെ ഓടിക്കുകയും കീഴ്‌പ്പെടുത്തുകയും ചെയ്തതിനെത്തുടർന്ന് തന്‍റെ കുടുംബത്തിന്‍റെ ബേക്കറി ഇന്നലെ അടച്ചുപൂട്ടിയതായി മാനുവൽ മനോലോ ബെറ്റാൻകൂർ എന്നയാൾ സിഎൻഎന്നിനോട് പറഞ്ഞു. എപ്പോഴാണ് തുറക്കുക എന്ന് തനിക്ക് ഉറപ്പില്ല എന്നും അദ്ദേഹം പറഞ്ഞു. തന്‍റെ ഉപഭോക്താക്കൾ കൊളംബിയൻ കേക്കുകളോ പലഹാരങ്ങളോ വാങ്ങാൻ ശ്രമിക്കുമ്പോൾ ഫെഡറൽ ഏജന്‍റുമാരുമായി സമാനമായ ഒരു ഏറ്റുമുട്ടലിന് സാധ്യതയുണ്ടാകരുത് എന്ന് ബെറ്റാൻകൂർ പറഞ്ഞു.
“എൻ്റെ ഉപഭോക്താക്കളെ എനിക്ക് സംരക്ഷിക്കണം. എൻ്റെ ആളുകളെ സംരക്ഷിക്കണം. എന്നെയും എൻ്റെ കുടുംബത്തെയും എനിക്ക് സംരക്ഷിക്കണം,” അദ്ദേഹം പറഞ്ഞു. ബേക്കറിയുടെ പുറത്ത് ഏജൻ്റുമാർ രണ്ട് പേരെ ഓടിച്ചിട്ട് പിടികൂടുന്നതിൻ്റെ വീഡിയോയും പുറത്ത് വന്നിട്ടുണ്ട്. പോക്കറ്റിൽ വെറും 900 ഡോളറുമായി യുണൈറ്റഡ് സ്റ്റേറ്റ്സിൽ എത്തിയ ബെറ്റാൻകൂർ, ഇപ്പോൾ യുഎസ് പൗരനാണ്, മൂന്ന് ബിസിനസ്സുകൾ സ്വന്തമായുണ്ട്, കൂടാതെ ഏകദേശം 35 പേർക്ക് തൊഴിൽ നൽകുന്നു. അമേരിക്കൻ സ്വപ്നം യാഥാർത്ഥ്യമാണ് എന്നതിൻ്റെ തെളിവാണ് താനെന്ന് അദ്ദേഹം പറഞ്ഞു. എന്നാൽ ഇപ്പോൾ ഫെഡറൽ ഏജൻ്റുമാരുടെ ഈ തിരച്ചിലിൽ, തൻ്റെ സമൂഹത്തെ സംരക്ഷിക്കാൻ വേണ്ടിയാണ് താൻ ബേക്കറി അടയ്ക്കുന്നതെന്നും അദ്ദേഹം പറയുന്നു.
