വാഷിംഗ്ടൺ: യുഎസിലെ മുതിർന്നവരിൽ 75 ശതമാനത്തിലധികം (ഏകദേശം മുക്കാൽ ഭാഗം) ആളുകളും പൊണ്ണത്തടിയുടെയോ അമിതഭാരത്തിന്റെയോ പരിധിയിൽ വരുന്നുവെന്ന് പുതിയ പഠനങ്ങൾ വ്യക്തമാക്കുന്നു.
പൊണ്ണത്തടി നിർണ്ണയിക്കാൻ ബോഡി മാസ് ഇൻഡക്സിന് (BMI) പുറമെ അരക്കെട്ടിന്റെ അളവ് (waist circumference) കൂടി കണക്കിലെടുക്കുന്ന പുതിയ മാനദണ്ഡം ഏർപ്പെടുത്തിയതോടെയാണ് ഞെട്ടിക്കുന്ന പുതിയ കണക്ക് പുറത്തുവന്നത്. ഈ രീതി പ്രകാരം യുഎസിലെ മുതിർന്നവരിൽ 75.2% പേരും പൊണ്ണത്തടിയുള്ളവരാണെന്ന് കണക്കാക്കപ്പെടുന്നു.ബെത്ത് ഇസ്രായേൽ ഡീക്കണസ് മെഡിക്കൽ സെന്റർ, ഹാർവാർഡ്, യേൽ സർവ്വകലാശാലകൾ എന്നിവടങ്ങളിൽ നിന്നുള്ള ഗവേഷകർ നടത്തിയ പഠനമനുസരിച്ച്, നിലവിലെ ബോഡി മാസ് ഇൻഡക്സ് (BMI) മാനദണ്ഡം ഉപയോഗിക്കുമ്പോൾ അമേരിക്കയിലെ മുതിർന്നവരിൽ പൊണ്ണത്തടിയുടെ അളവ് യഥാർത്ഥത്തിലുള്ളതിനേക്കാൾ വളരെ കുറവായാണ് കണക്കാക്കപ്പെടുന്നത് എന്ന് കണ്ടെത്തി.
നിലവിലുള്ള ബിഎംഐ (BMI) മാത്രം അടിസ്ഥാനമാക്കിയുള്ള കണക്കുകൾ പ്രകാരം ഏകദേശം 40% മുതൽ 43% വരെ ആളുകളെയാണ് പൊണ്ണത്തടിയുള്ളവരായി കണക്കാക്കിയിരുന്നത്. എന്നാൽ അമിതഭാരവും (Overweight) പൊണ്ണത്തടിയും (Obesity) ചേർത്ത് കണക്കാക്കുമ്പോൾ ഇത് 74%-ത്തിന് മുകളിലാണ്. പുരുഷന്മാരിൽ 102 സെന്റീമീറ്ററിൽ (40 ഇഞ്ച്) കൂടുതലും സ്ത്രീകളിൽ 88 സെന്റീമീറ്ററിൽ (35 ഇഞ്ച്) കൂടുതലും അരക്കെട്ടിന്റെ അളവ് വരുന്നത് രോഗസാധ്യത വർദ്ധിപ്പിക്കുന്നതായി ഈ മാനദണ്ഡം കണക്കാക്കുന്നു. 70 വയസ്സോ അതിൽ കൂടുതലോ പ്രായമുള്ളവരിൽ ഈ പുതിയ മാനദണ്ഡപ്രകാരം പൊണ്ണത്തടിയുള്ളവർ 80 ശതമാനത്തോളമാണ്.
ഒരു വ്യക്തിയുടെ ശരീരത്തിലെ കൊഴുപ്പിന്റെ വിതരണത്തെക്കുറിച്ച് (പ്രത്യേകിച്ച് വയറിലെ കൊഴുപ്പ്) വ്യക്തമായ ധാരണ നൽകാൻ BMI-ക്ക് കഴിയില്ലെന്ന് ഗവേഷകർ ചൂണ്ടിക്കാട്ടുന്നു. സംസ്കരിച്ച ഭക്ഷണങ്ങളുടെ ലഭ്യത, ശാരീരിക വ്യായാമമില്ലാത്ത ജീവിതശൈലി, സാമൂഹിക-സാമ്പത്തിക ഘടകങ്ങൾ എന്നിവയാണ് ഈ വർദ്ധനവിന് കാരണമായി ചൂണ്ടിക്കാണിക്കപ്പെടുന്നത്. ഈ ആരോഗ്യ പ്രതിസന്ധി പരിഹരിക്കുന്നതിനായി ചിട്ടയായ ഭക്ഷണക്രമവും വ്യായാമവും ആരോഗ്യ വിദഗ്ധർ ശുപാർശ ചെയ്യുന്നു. സാധാരണ BMI ഉള്ളവരാണെങ്കിലും അരക്കെട്ടിന്റെ അളവ് കൂടുതലുള്ളവർക്ക് പ്രമേഹം, ഹൃദ്രോഗം തുടങ്ങിയവ വരാനുള്ള സാധ്യത കൂടുതലാണെന്നും പഠനം വ്യക്തമാക്കുന്നു.
Three-quarters of US adults are overweight; shocking new study.
