വാഷിംഗ്ടൺ: യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷൻ (എഫ്.ഡി.എ) യുടെ വാക്സിൻ വിഭാഗം മേധാവി വിനയ് പ്രസാദ് മൂന്നു മാസത്തെ സേവനത്തിന് ശേഷം രാജിവെച്ചതായി സർക്കാർ വക്താവ് അറിയിച്ചു. സെന്റർ ഫോർ ബയോളജിക്സ് ഇവാലുവേഷൻ ആൻഡ് റിസർച്ചിന്റെ ഡയറക്ടർ സ്ഥാനത്ത് നിന്നാണ് ഓങ്കോളജിസ്റ്റായ പ്രസാദ് പടിയിറങ്ങിയത്.
യുഎസ് കോവിഡ്-19 വാക്സിൻ, മാസ്ക് നിർബന്ധിതമാക്കൽ എന്നിവയുടെ കടുത്ത വിമർശകനായിരുന്നു പ്രസാദ്. എഫ്.ഡി.എ കമ്മീഷണർ മാർട്ടി മക്കാരിയാണ് മെയ് മാസത്തിൽ അദ്ദേഹത്തെ ഈ സ്ഥാനത്തേക്ക് നിയമിച്ചത്. റെഗുലേറ്ററി നടപടികൾ വേഗത്തിലാക്കുമെന്നും പുതിയ അവലോകന മാർഗ്ഗങ്ങൾ പരീക്ഷിക്കുമെന്നും ഇരുവരും ചേർന്ന് വാഗ്ദാനം ചെയ്തിരുന്നു.
സമീപ ദിവസങ്ങളിൽ, സറെപ്റ്റ തെറാപ്യൂട്ടിക്സിന്റെ ഡുചെൻ മസ്കുലർ ഡിസ്ട്രോഫിക്കുള്ള ഒരു ജീൻ തെറാപ്പിയുടെ കാര്യത്തിൽ ഏജൻസി സ്വീകരിച്ച നിലപാടിനെതിരെ പ്രസാദിന്റെ ഭരണകാലത്ത് കടുത്ത വിമർശനമുയർന്നിരുന്നു. എഫ്.ഡി.എ അംഗീകരിച്ച ഈ തെറാപ്പി, രോഗം മൂർച്ഛിച്ച രണ്ട് കൗമാരക്കാരുടെ മരണത്തിന് കാരണമായിട്ടുണ്ട്. കമ്പനിയുടെ മറ്റൊരു പരീക്ഷണാത്മക ജീൻ തെറാപ്പിയിൽ മൂന്നാമതൊരു മരണം സംഭവിച്ചതിനെത്തുടർന്ന്, സുരക്ഷാ ആശങ്കകൾ ഉന്നയിച്ചുകൊണ്ട് ജൂലൈ 18-ന് എഫ്.ഡി.എ, അംഗീകൃത ഡി.എം.ഡി തെറാപ്പിയുടെ എല്ലാ കയറ്റുമതികളും നിർത്താൻ സറെപ്റ്റയോട് ആവശ്യപ്പെട്ടിരുന്നു.
അതേസമയം, തീവ്ര വലതുപക്ഷ പ്രവർത്തകയും ഡോണൾഡ് ട്രംപിന്റെ അനുഭാവിയുമായ ലോറ ലൂമർ ജൂലൈ 20-ന് ഒരു ബ്ലോഗ് പോസ്റ്റ് ചെയ്തിരുന്നു. അതിൽ പ്രസാദിനെ “പുരോഗമന ഇടതുപക്ഷ അട്ടിമറിക്കാരൻ” എന്ന് വിശേഷിപ്പിക്കുകയും, ഏജൻസിയുടെ പ്രവർത്തനങ്ങളെ തുരങ്കം വെക്കുകയാണെന്ന് ആരോപിക്കുകയും ചെയ്തിരുന്നു. ഈ വർഷം ആദ്യം ലൂമറിന്റെ വിമർശനങ്ങൾ ചില ദേശീയ സുരക്ഷാ ഉദ്യോഗസ്ഥരെ പുറത്താക്കുന്നതിലേക്ക് നയിച്ചിരുന്നു.
