ന്യൂഡല്‍ഹി : യുഎസുമായുള്ള വ്യാപാര ചര്‍ച്ചയില്‍ മികച്ച ഒരു തീരുമാനത്തിലെത്താനുള്ള ശ്രമങ്ങള്‍ നടന്നുവരികയാണെന്നും എന്നാല്‍ ഇരുരാജ്യങ്ങളും തമ്മിലുള്ള വ്യാപാര കരാറില്‍ പ്രശ്‌നങ്ങളുണ്ടെന്നും സൂചന നല്‍കി വിദേശകാര്യമന്ത്രി എസ്. ജയശങ്കര്‍. ഒരു സ്വകാര്യ പരിപാടിയിലെ ചോദ്യോത്തര വേളയിലാണ് എസ്.ജയശങ്കര്‍ ഇക്കാര്യം വെളിപ്പെടുത്തിയത്.
യുഎസുമായുള്ള ഏതൊരു വ്യാപാര കരാറും ഒരു പരിധിക്കപ്പുറം ഇന്ത്യ അംഗീകരിക്കില്ലെന്നും ചില മേഖലകളിലെ കാര്യങ്ങളില്‍ യുഎസുമായുള്ള ചര്‍ച്ചക്ക് പോലും ഇന്ത്യ തയ്യാറല്ലെന്നും അദ്ദേഹം വ്യക്തമാക്കി. മാത്രമല്ല, ഇന്ത്യ മുന്നോട്ട് വയ്ക്കുന്ന ഈ ‘ചുവപ്പ് രേഖ’ യു.എസ് മാനിക്കേണ്ടതുണ്ടെന്നും അത് മറികടന്നുള്ള ഒരു ചര്‍ച്ചയും സാധ്യമല്ലെന്നും ജയശങ്കര്‍ വ്യക്തമാക്കി.
”ഇന്ന് നമുക്ക് അമേരിക്കയുമായി ചില പ്രശ്നങ്ങളുണ്ട്. നമ്മുടെ വ്യാപാര ചര്‍ച്ചകള്‍ ഒരു ‘ലാന്‍ഡിംഗ് ഗ്രൗണ്ടി’ല്‍ എത്തിയിട്ടില്ല. ഇതിന് ഒരു പ്രധാന കാരണം ഇന്ത്യയ്‌ക്കെതിരെ ചുമത്തിയ ഒരു നിശ്ചിത താരിഫ് ആണ്. ഇതിനുപുറമെ, വളരെ അന്യായമായി ഞങ്ങള്‍ കരുതുന്ന രണ്ടാമത്തെ താരിഫ് കൂടി ചുമത്തിയിരിക്കുന്നു. എന്ത് സംഭവിച്ചാലും, അമേരിക്കയുമായി ഒരു വ്യാപാര ധാരണ ഉണ്ടാകണം. കാരണം അത് ലോകത്തിലെ ഏറ്റവും വലിയ വിപണിയാണ്. പ്രശ്നങ്ങളുണ്ട്, ആരും അത് നിഷേധിക്കുന്നില്ല. ആ പ്രശ്‌നങ്ങള്‍ ചര്‍ച്ച ചെയ്യുകയും പരിഹരിക്കുകയും വേണം, അതാണ് ഞങ്ങള്‍ ചെയ്യാന്‍ ശ്രമിക്കുന്നത്”അദ്ദേഹം പറഞ്ഞു.
