ന്യൂയോര്‍ക്ക്: ടെക് ഭീമനായ മെറ്റയ്‌ക്കെതിരെയുള്ള യു.എസ് സര്‍ക്കാരിന്റെ വിശ്വാസ വഞ്ചനാ കേസില്‍ വാദം ആരംഭിച്ചു. ഇന്‍സ്റ്റഗ്രാം, വാട്‌സ് ആപ്പ് എന്നീ സോഷ്യല്‍ മീഡിയ പ്ലാറ്റ്‌ഫോമുകള്‍ ഏറ്റെടുത്തതുമായി ബന്ധപ്പെട്ട ആരോപണങ്ങളിലാണ് വിചാരണ. മെറ്റ 2012 ല്‍ ഇന്‍സ്റ്റഗ്രാം ഏറ്റെടുത്തതും രണ്ടുവര്‍ഷത്തിന് ശേഷം വാട്‌സ് ആപ്പ് ഏറ്റെടുത്തതും സോഷ്യല്‍ മീഡിയ കുത്തക കയ്യടക്കുന്നതിന് വേണ്ടിയുള്ള പദ്ധതിയുടെ ഭാഗമാണ് എന്നാണ് ആരോപണം. ഇവ വാങ്ങുന്നതിനു വേണ്ടി വിപണിയിലെ ആധിപത്യം ദുരുപയോഗം ചെയ്തു എന്നാണ് ഫെഡറല്‍ ട്രേഡ് കമ്മീഷന്റെ മെറ്റയ്‌ക്കെതിരായ ആരോപണം. എതിരാളികളെ പൂര്‍ണമായി വാങ്ങുകയോ അല്ലെങ്കില്‍ ഇല്ലാതാക്കുകയോ ചെയ്യുകയായിരുന്നു മെറ്റയുടെ നയം എന്നും ഫെഡറല്‍ ട്രേഡ് കമ്മീഷന്‍ ആരോപിക്കുന്നു.
വിചാരണയില്‍ മൊഴി നല്‍കാന്‍ മാര്‍ക്ക് സക്കര്‍ബര്‍ഗ് എത്തി. സാങ്കേതിക ഭീമന്‍ ഒരു കുത്തകയാണെന്ന ഫെഡറല്‍ ആരോപണങ്ങളില്‍ നിന്ന് തന്റെ സോഷ്യല്‍ മീഡിയ കമ്പനിയെ പ്രതിരോധിക്കാന്‍ വാഷിംഗ്ടണ്‍ ഡി.സി.യിലെ കോടതിമുറിയില്‍ സക്കര്‍ബര്‍ഗ് ശ്രമിച്ചു.
ഫേസ്ബുക്ക്, ഇന്‍സ്റ്റാഗ്രാം, വാട്ട്സ്ആപ്പ് എന്നിവയുടെ മാതൃ കമ്പനിയായ മെറ്റ, കമ്പനിയുടെ തകര്‍ച്ചയിലേക്ക് നയിച്ചേക്കാവുന്ന ഒരു നാഴികക്കല്ലായ ആന്റിട്രസ്റ്റ് വിചാരണയുടെ ആദ്യ ദിവസമായ തിങ്കളാഴ്ച ഫെഡറല്‍ ട്രേഡ് കമ്മീഷനെ നേരിടുകയാണ്. സക്കര്‍ബര്‍ഗിനെ സംബന്ധിച്ചിടത്തോളം, ഹാര്‍വാര്‍ഡ് സര്‍വകലാശാലയില്‍ വിദ്യാര്‍ത്ഥിയായിരിക്കെ അദ്ദേഹം കെട്ടിപ്പടുക്കാന്‍ തുടങ്ങിയ ബിസിനസ്സ് സാമ്രാജ്യം തകരാന്‍ നിര്‍ബന്ധിതമാകുമോ എന്ന് ഈ കേസ് എന്നത് നിര്‍ണ്ണയകമാണ്.
2020-ല്‍ ട്രംപിന്റെ ആദ്യ ഭരണകാലത്താണ് മെറ്റയ്ക്കെതിരെ ആദ്യം കേസ് ഫയല്‍ ചെയ്തത്. ജഡ്ജ് ജെയിംസ് ബോസ്‌ബെര്‍ഗാണ് കേസില്‍ വാദം കേള്‍ക്കുന്നത്.
