വാഷിംഗ്ടൺ: 2021 ജനുവരി ആറിന് യുഎസ് ക്യാപിറ്റോളിൽ നടന്ന കലാപസമയത്ത് എഫ്ബിഐ ഏജന്‍റുമാരുടെ സാന്നിധ്യത്തെക്കുറിച്ച് മുൻ ഡയറക്ടർ ക്രിസ്റ്റഫർ റേ നുണ പറയുകയാണെന്ന് പ്രസിഡന്‍റ് ഡോണൾഡ് ട്രംപ് ആരോപിച്ചു. റേയുടെ മുൻഗാമിയായ ജെയിംസ് കോമിക്കെതിരെ ട്രംപ് ഭരണകൂടം കേസെടുത്തതിന് പിന്നാലെയാണ് പുതിയ ആരോപണങ്ങൾ. എഫ്.ബി.ഐ. രഹസ്യമായി ഏജന്റുമാരെ കലാപകാരികളായും പ്രകോപനകരായും ജനക്കൂട്ടത്തിനിടയിൽ വിന്യസിച്ചുവെന്ന് ട്രംപ് തെളിവുകളില്ലാതെ അവകാശപ്പെട്ടു. ഇതിനെ അദ്ദേഹം “ജനുവരി 6 തട്ടിപ്പ്” എന്നാണ് വിശേഷിപ്പിച്ചത്.
“ഇത് ഡയറക്ടർ ക്രിസ്റ്റഫർ റേ വീണ്ടും വീണ്ടും പറഞ്ഞ കാര്യങ്ങളിൽ നിന്ന് വ്യത്യസ്തമാണ്! അതെ, ഇപ്പോൾ പുറത്തുവരുന്നതനുസരിച്ച്, എഫ്.ബി.ഐ. ഏജന്റുമാർ ജനുവരി 6-ലെ പ്രതിഷേധത്തിൽ ഉണ്ടായിരുന്നു. ഒരുപക്ഷേ അവർ പ്രകോപനമുണ്ടാക്കുന്നവരും കലാപകാരികളായും പ്രവർത്തിച്ചു, എന്നാൽ തീർച്ചയായും ‘നിയമ നിർവ്വഹണ ഉദ്യോഗസ്ഥരാ’യിരുന്നില്ല,” ട്രംപ് ട്രൂത്ത് സോഷ്യലിൽ കുറിച്ചു.
അന്വേഷണ റിപ്പോർട്ടുകൾ പറയുന്നത്
ജസ്റ്റിസ് ഡിപ്പാർട്ട്‌മെന്റ് വാച്ച്ഡോഗിന്റെ റിപ്പോർട്ട് പ്രകാരം ജനുവരി ആറ് കലാപസമയത്ത് അണ്ടർകവർ എഫ്.ബി.ഐ. ഏജന്റുമാർ ക്യാപിറ്റോളിൽ ഉണ്ടായിരുന്നില്ല. എന്നിരുന്നാലും, 26 ശമ്പളം പറ്റുന്ന എഫ്.ബി.ഐ. വിവരദാതാക്കൾ (informants) അന്ന് വാഷിംഗ്ടൺ ഡി.സി.യിൽ ഉണ്ടായിരുന്നുവെന്ന് ഡിപ്പാർട്ട്‌മെന്റ് ഓഫ് ജസ്റ്റിസ് ഇൻസ്പെക്ടർ ജനറൽ പറഞ്ഞു.
“ഈ ‘ഏജന്റുമാർ’ ഓരോരുത്തരും ആരാണെന്നും ആ ‘ചരിത്രപരമായ’ ദിവസം അവർ എന്താണ് ചെയ്തതെന്നും എനിക്കറിയണം. തങ്ങളുടെ രാജ്യത്തോടുള്ള സ്നേഹം കാരണം നിരവധി മഹത്തായ അമേരിക്കൻ രാജ്യസ്നേഹികൾക്ക് വലിയ വില നൽകേണ്ടിവന്നു. ഈ ‘വൃത്തികെട്ട പോലീസുകാരെയും വളഞ്ഞ രാഷ്ട്രീയക്കാരെയും’ കുറിച്ചുള്ള അന്വേഷണം ഞാൻ അവർക്ക് കടപ്പെട്ടിരിക്കുന്നു! ” ട്രംപ് കൂട്ടിച്ചേർത്തു. ട്രംപിന്റെ ആരോപണം നുണയാണെന്ന് പ്രതിനിധി സഭയിലെ ന്യൂനപക്ഷ നേതാവ് ഹക്കീം ജെഫ്രീസ് ശനിയാഴ്ച പ്രതികരിച്ചു.
