വാഷിംഗ്ടൺ: ഫെഡറൽ റിസർവ് ഗവർണർ ലിസ കുക്കിനെ പുറത്താക്കണമെന്ന് ആവശ്യപ്പെട്ട് ട്രംപ് ഭരണകൂടം വീണ്ടും ഫെഡറൽ അപ്പീൽ കോടതിയെ സമീപിച്ചു. ഇത് ലിസ കുക്ക് നേരിടുന്ന രാഷ്ട്രീയ വിമർശനങ്ങൾക്കിടയിൽ പുതിയ നീക്കമാണ്. പലിശ നിരക്ക് കുറയ്ക്കാൻ ഫെഡറൽ റിസർവിൽ സമ്മർദ്ദം ചെലുത്തുന്നതിൻ്റെ ഭാഗമായാണ് ട്രംപിൻ്റെ ഈ നടപടി.
ഈ ആഴ്ച നടക്കുന്ന കേന്ദ്ര ബാങ്കിന്റെ പലിശ നിരക്ക് വോട്ടിന് തൊട്ടുമുമ്പാണ് ഈ നീക്കം നടന്നത്. പ്രസിഡൻ്റ് ഡൊണാൾഡ് ട്രംപ് ഫെഡിൻ്റെ പലിശ നിരക്ക് കുറയ്ക്കാൻ ആവർത്തിച്ച് ആവശ്യപ്പെടുകയും, ഫെഡ് ചെയർ ജെറോം പവലിനെ പരസ്യമായി വിമർശിക്കുകയും ചെയ്തിരുന്നു.
ഞായറാഴ്ച വൈകുന്നേരം 3 മണിക്ക് മുമ്പായി യു.എസ്. കോർട്ട് ഓഫ് അപ്പീൽസ് ഫോർ ദ ഡിസ്ട്രിക്റ്റ് ഓഫ് കൊളംബിയയിലാണ് ട്രംപ് ഭരണകൂടം അപേക്ഷ സമർപ്പിച്ചത്. സാമ്പത്തിക നയങ്ങളിൽ ഫെഡറൽ റിസർവ് സ്വതന്ത്രമായി പ്രവർത്തിക്കുന്നതിനെതിരെ ട്രംപ് ഭരണകൂടം നടത്തുന്ന നീക്കം വലിയ ചർച്ചകൾക്ക് വഴിവെച്ചിരിക്കുകയാണ്.
