കാലിഫോർണിയ: ഓപ്പറേഷനുകൾക്കിടെ ഭൂരിഭാഗം നിയമ നിർവ്വഹണ ഉദ്യോഗസ്ഥരും മാസ്ക് ധരിക്കുന്നത് നിരോധിച്ച കാലിഫോർണിയൻ നിയമത്തെ ചോദ്യം ചെയ്തുകൊണ്ട് ട്രംപ് ഭരണകൂടം തിങ്കളാഴ്ച ഫെഡറൽ കോടതിയിൽ ഹർജി നൽകി. ഫെഡറൽ ഏജന്‍റുമാരുടെ സുരക്ഷ ഉറപ്പാക്കാൻ ഇത് അത്യന്താപേക്ഷിതമാണെന്ന് നീതിന്യായ വകുപ്പ് വാദിച്ചു.
കാലിഫോർണിയയിലെ സെൻട്രൽ ഡിസ്ട്രിക്റ്റിനായുള്ള യുഎസ് ഡിസ്ട്രിക്റ്റ് കോടതിയിലാണ് ഫയൽ ചെയ്തത്.
ലോസ് ഏഞ്ചൽസിൽ കഴിഞ്ഞ വേനൽക്കാലത്ത് നടന്ന ഇമിഗ്രേഷൻ റെയ്ഡുകളോടുള്ള പ്രതികരണമായി സെപ്റ്റംബറിൽ ഒപ്പിട്ട കാലിഫോർണിയ നിയമം ഫെഡറൽ നിയമ നിർവ്വഹണ ഉദ്യോഗസ്ഥരെ നിയന്ത്രിക്കുന്നതിനുള്ള ഭരണഘടനാ വിരുദ്ധമായ ശ്രമമാണെന്ന് ട്രംപ് ഭരണകൂടം വാദിച്ചു. രാജ്യത്തുടനീളം ആക്രമണോത്സുകമായ തന്ത്രങ്ങൾ ഉപയോഗിച്ച് മാസ്ക് ധരിച്ച ഫെഡറൽ ഏജൻ്റുമാർ മാസങ്ങളോളം ഇമിഗ്രേഷൻ അറസ്റ്റുകൾ നടത്തിയതിന് ശേഷമാണ് ഈ നീക്കം.
കാലിഫോർണിയയുടെ ഈ നിരോധനം അടുത്ത വർഷം ജനുവരിയിൽ പ്രാബല്യത്തിൽ വരാനിരിക്കുകയായിരുന്നു. നിയമ നിർവ്വഹണ ഉദ്യോഗസ്ഥരുടെ സുരക്ഷ നിലനിർത്താൻ മാസ്കുകൾ ഒരു പ്രധാന മുൻകരുതലാണ് എന്ന് ട്രംപ് ഭരണകൂടം ആവർത്തിച്ച് വാദിച്ചു. ഫെഡറൽ ഏജൻ്റുമാർ അവരുടെ ചുമതലകൾ നിർവഹിക്കുന്നതിൻ്റെ പേരിൽ മാത്രം അവരുടെ സ്വകാര്യ വിവരങ്ങൾ പുറത്തുവിടാനോ ഉപദ്രവിക്കാനോ കഴിയില്ലെന്ന് അറ്റോർണി ജനറൽ പാം ബോണ്ടി തിങ്കളാഴ്ച ഒരു പത്രക്കുറിപ്പിൽ പറഞ്ഞു.
