വാഷിംഗ്ടൺ: 2019-ൽ ഉത്തരകൊറിയൻ നേതാവ് കിം ജോങ് ഉന്നുമായി നിർണായക ആണവ ചർച്ചകൾക്ക് ട്രംപ് ഭരണകൂടം ഒരുങ്ങുന്നതിനിടെ, കിമ്മിൻ്റെ ആശയവിനിമയ സംവിധാനങ്ങൾ ചോർത്താൻ ശ്രമിച്ചതായി ന്യൂയോർക്ക് ടൈംസ് റിപ്പോർട്ട്. എന്നാൽ, യുഎസ് രഹസ്യാന്വേഷണ ഏജൻസികൾ നടത്തിയ ഈ രഹസ്യ ദൗത്യം ദയനീയമായി പരാജയപ്പെട്ടു.
ഉത്തരകൊറിയൻ നേതാവിൻ്റെ ഫോൺ കോളുകൾ ഉൾപ്പെടെയുള്ള വിവരങ്ങൾ ചോർത്തുക എന്ന ലക്ഷ്യത്തോടെ, ഡോണൾഡ് ട്രംപിൻ്റെ നേരിട്ടുള്ള അനുമതിയോടെയാണ് യുഎസ് നേവി സീൽ ടീം 6-ലെ ഒരു സംഘം ഉത്തരകൊറിയൻ മണ്ണിൽ രഹസ്യമായി കടന്നുകയറിയത്. കിമ്മിൻ്റെ ആശയവിനിമയ സംവിധാനത്തിന് സമീപം ഒരു ഇലക്ട്രോണിക് ഉപകരണം സ്ഥാപിക്കാനായിരുന്നു പദ്ധതി.
മാസങ്ങൾ നീണ്ട തയ്യാറെടുപ്പുകൾക്ക് ശേഷവും, മൂന്ന് പ്രധാന കാരണങ്ങൾ ഈ ദൗത്യം പരാജയപ്പെടാൻ കാരണമായി എന്ന് റിപ്പോർട്ടിൽ പറയുന്നു. അന്തർവാഹിനി വിന്യാസത്തിലെ നാവിഗേഷൻ പിഴവുകൾ, ലക്ഷ്യസ്ഥാനത്തെക്കുറിച്ചുള്ള തത്സമയ വിവരങ്ങളുടെയും നിരീക്ഷണത്തിൻ്റെയും അഭാവം, കൂടാതെ സാധാരണക്കാരുമായുള്ള അപ്രതീക്ഷിത ഏറ്റുമുട്ടൽ എന്നിവയാണ് നിർണായക നീക്കത്തിന് തിരിച്ചടിയായത്.
ഈ ദൗത്യം പരാജയപ്പെട്ടത് അമേരിക്കയ്ക്ക് വലിയ തിരിച്ചടിയാണ് ഉണ്ടാക്കിയത്. ട്രംപ് ഭരണകൂടം രഹസ്യമായി നടത്തിയ ഈ ശ്രമം പുറത്തുവന്നത് അന്താരാഷ്ട്ര തലത്തിൽ വലിയ ചർച്ചകൾക്ക് വഴിവച്ചിരിക്കുകയാണ്.
