വാഷിംഗ്ടൺ: ഗാസയിലും സിറിയയിലും ഇസ്രായേൽ നടത്തിയ സൈനിക നടപടികളിൽ അമേരിക്കൻ പ്രസിഡന്‍റ് ഡോണൾഡ് ട്രംപ് അതൃപ്തി രേഖപ്പെടുത്തി. ഇരു സംഭവങ്ങളിലും സ്ഥിതിഗതികൾ ശരിയാക്കാൻ പ്രധാനമന്ത്രി ബെഞ്ചമിൻ നെതന്യാഹുവിനെ ട്രംപ് ഫോണിൽ വിളിച്ചതായി വൈറ്റ് ഹൗസ് അറിയിച്ചു. ഇത് ഇരു നേതാക്കൾക്കുമിടയിൽ വർദ്ധിച്ചുവരുന്ന പിരിമുറുക്കം അടിവരയിടുന്നുണ്ടെന്ന് വൃത്തങ്ങൾ സൂചിപ്പിക്കുന്നു.
കഴിഞ്ഞ വ്യാഴാഴ്ച ഗാസയിലെ ഏക കത്തോലിക്കാ പള്ളിക്ക് നേരെയുണ്ടായ ആക്രമണം ട്രംപിൽ നിന്ന് ഉടനടി നെഗറ്റീവ് പ്രതികരണം ക്ഷണിച്ചുവരുത്തി.
ഈ വിഷയത്തിൽ തന്‍റെ അതൃപ്തി അറിയിക്കാനും, ആക്രമണം ഒരു തെറ്റായിരുന്നുവെന്ന് പ്രസ്താവന ഇറക്കാൻ ഇസ്രായേൽ നേതാവിനോട് ആവശ്യപ്പെടാനും ട്രംപ് നെതന്യാഹുവിനെ ഫോണിൽ വിളിച്ചു. അതുപോലെ, കഴിഞ്ഞയാഴ്ച സിറിയൻ തലസ്ഥാനമായ ഡമാസ്കസിലെ സർക്കാർ കെട്ടിടങ്ങളെ ലക്ഷ്യമിട്ട് ഇസ്രായേൽ നടത്തിയ വ്യോമാക്രമണങ്ങളിലും ട്രംപ് ആശ്ചര്യപ്പെട്ടു. കാരണം, അദ്ദേഹത്തിന്‍റെ ഭരണകൂടം യുദ്ധത്തിൽ തകർന്ന സിറിയയെ പുനർനിർമ്മിക്കാൻ ശ്രമിക്കുന്ന സമയത്തായിരുന്നു ഈ ആക്രമണങ്ങൾ.
പ്രസിഡന്‍റിന് നെതന്യാഹുവുമായി നല്ലൊരു സൗഹൃദമുണ്ട്. അദ്ദേഹവുമായി നിരന്തര സമ്പർക്കത്തിലുമാണ്. സിറിയയിലെ ബോംബാക്രമണത്തിലും ഗാസയിലെ കത്തോലിക്കാ പള്ളിക്ക് നേരെ നടന്ന ആക്രമണത്തിലും അദ്ദേഹം അമ്പരന്നുപോയിരുന്നു എന്ന് പ്രസ് സെക്രട്ടറി കരോലിൻ ലീവിറ്റ് തിങ്കളാഴ്ച വൈറ്റ് ഹൗസിൽ വെച്ച് മാധ്യമപ്രവർത്തകരോട് പറഞ്ഞു. രണ്ട് വിഷയങ്ങളിലും സാഹചര്യങ്ങൾ ശരിയാക്കാൻ പ്രസിഡന്‍റ് ഉടൻതന്നെ പ്രധാനമന്ത്രിയെ വിളിച്ചുവെന്നും ലിവിറ്റ് കൂട്ടിച്ചേർത്തു. സിറിയയിലെ സംഘർഷങ്ങൾ ലഘൂകരിക്കാൻ സ്റ്റേറ്റ് സെക്രട്ടറി മാർക്കോ റൂബിയോ നടത്തുന്ന ശ്രമങ്ങളെ ലീവിറ്റ് ചൂണ്ടിക്കാട്ടി.
