വാഷിംഗ്ടണ്‍: കുപ്രസിദ്ധമായ ചിക്കാഗോ തെരുവ് സംഘത്തിന്‍റെ സ്ഥാപകനായ ലാറി ഹൂവറിന്‍റെ ഫെഡറൽ ജയിൽ ശിക്ഷ ഇളവ് ചെയ്ത് യുഎസ് പ്രസിഡന്‍റ് ഡോണൾഡ് ട്രംപ്. ഈ ആഴ്ച നടത്തിയ ഇരുപതിലധികം ദയാപരമായ നടപടികളുടെ ഭാഗമായിട്ടാണ് ലാറി ഹൂവറിനും ഇളവ് ലഭിച്ചത്. ഗാങ്സ്റ്റർ ഡിസൈപ്പിൾസിന്‍റെ നേതാവായിരുന്ന ഹൂവറിന് 1990കളിൽ ഗൂഢാലോചന, ഭീഷണിപ്പെടുത്തി പണം തട്ടൽ, മയക്കുമരുന്ന്, മറ്റ് ക്രിമിനൽ കുറ്റങ്ങൾ എന്നിവയ്ക്ക് ആറ് ജീവപര്യന്തം തടവ് ശിക്ഷ ലഭിച്ചിരുന്നു.
ഫെഡറൽ ശിക്ഷയ്ക്ക് പുറമെ, കൊലപാതകത്തിന് ഇല്ലിനോയിസ് സംസ്ഥാനത്ത് ഹൂവർക്ക് 200 വർഷത്തെ തടവ് ശിക്ഷ കൂടി നേരിടുന്നുണ്ട്. അതിനാൽ ഉടൻ മോചിതനാകാൻ സാധ്യതയില്ല. പ്രസിഡന്‍റിന് സംസ്ഥാന തലത്തിലുള്ള ശിക്ഷകൾ ഇളവ് ചെയ്യാൻ കഴിയില്ല.
മുൻ ന്യൂയോർക്ക് സിറ്റി കോൺഗ്രസ് അംഗം മൈക്കിൾ ഗ്രിം ഉൾപ്പെടെയുള്ള മറ്റ് കുറ്റവാളികൾക്കും ട്രംപ് മാപ്പ് നൽകിയിരുന്നു. ഗുരുതരമായ നികുതി തട്ടിപ്പ് കുറ്റസമ്മതം നടത്തിയതിന് ശേഷം അദ്ദേഹം ഏഴ് മാസം ജയിലിൽ കഴിഞ്ഞിരുന്നു. ഹൂവറിനും ഗ്രിമ്മിനും പുറമെ, സമീപ ദിവസങ്ങളിൽ കുറഞ്ഞത് എട്ട് പേർക്ക് കൂടി പ്രസിഡന്‍റ് മാപ്പ് നൽകി. ജസ്റ്റിസ് ഡിപ്പാർട്ട്‌മെന്‍റ് (DoJ) രേഖകൾ പ്രകാരം തന്‍റെ രണ്ടാം ടേമിൽ ട്രംപ് 40-ലധികം ആളുകൾക്ക് മാപ്പ് നൽകിയിട്ടുണ്ട്. കൂടാതെ 2021 ജനുവരി 6-ലെ യുഎസ് കാപ്പിറ്റോൾ കലാപവുമായി ബന്ധപ്പെട്ട് കുറ്റം ചുമത്തപ്പെട്ട അല്ലെങ്കിൽ ശിക്ഷിക്കപ്പെട്ട ഏകദേശം 1,600 ആളുകൾക്ക് നൽകിയ മാപ്പുകൾക്ക് പുറമെയാണിത്.
