വാഷിംഗ്ടണ്‍: യുഎസ് സർവകലാശാലകളിൽ ചൈനീസ് വിദ്യാർത്ഥികളെ പ്രവേശിപ്പിക്കുന്നതിനെ ന്യായീകരിക്കുന്നതിനിടെ ഫ്രാൻസിനെ വിമര്‍ശിച്ച് യുഎസ് പ്രസിഡന്‍റ് ഡോണൾഡ് ട്രംപ്. ഫോക്സ് ന്യൂസ് അവതാരകയുമായി നടത്തിയ സംവാദത്തിലാണ് വിമര്‍ശനം. അമേരിക്കൻ യൂണിവേഴ്സിറ്റികളിൽ ചൈനീസ് പൗരന്മാരെ പ്രവേശിപ്പിക്കുന്നതിനെക്കുറിച്ച് ചോദിച്ചപ്പോൾ, “മറ്റ് രാജ്യക്കാർ ഇവിടെ വരുന്നത് നല്ലതാണെന്ന് ഞാൻ കരുതുന്നു,” എന്ന് പ്രസിഡന്‍റ് പറഞ്ഞു.
“അവർ ഫ്രഞ്ചുകാരല്ല. അവർ ചൈനക്കാരാണ്. അവർ നമ്മെ ചാരപ്രവർത്തി നടത്തുന്നു. അവർ നമ്മുടെ ബൗദ്ധിക സ്വത്ത് മോഷ്ടിക്കുന്നു,” ഫോക്സ് ന്യൂസ് അവതാരകയായ ലോറ ഇൻഗ്രഹാം പ്രതികരിച്ചു. “ഫ്രഞ്ചുകാർ ഇതിലും മികച്ചവരാണെന്ന് നിങ്ങൾ കരുതുന്നുണ്ടോ?” പ്രസിഡന്‍റ് മറുചോദ്യം ഉന്നയിക്കുകയായിരുന്നു. അതെ എന്ന് ഇൻഗ്രഹാം മറുപടി പറഞ്ഞു. തനിക്ക് അത്ര ഉറപ്പില്ലെന്ന് ഇതോടെ ട്രംപ് തിരിച്ചടിച്ചു.
ട്രംപിന്‍റെ രണ്ടാം ടേമിലുടനീളം അദ്ദേഹവും ഫ്രഞ്ച് പ്രസിഡന്‍റ് ഇമ്മാനുവൽ മാക്രോണും തമ്മിൽ ചില അഭിപ്രായ വ്യത്യാസങ്ങൾ നിലനിന്നിരുന്നു. റഷ്യ-യുക്രെയ്ൻ യുദ്ധം, ഇസ്രായേൽ-ഹമാസ് യുദ്ധം എന്നിവ കേന്ദ്രീകരിച്ചായിരുന്നു ഈ അഭിപ്രായവ്യത്യാസങ്ങൾ. പലസ്തീൻ രാഷ്ട്രത്തെ അംഗീകരിക്കുമെന്ന് പ്രഖ്യാപിച്ച ഐക്യരാഷ്ട്രസഭ സുരക്ഷാ കൗൺസിലിലെ ആദ്യ പാശ്ചാത്യ രാജ്യവും ആദ്യ ജി7 രാജ്യവും മാക്രോണിന്‍റെ ഫ്രാൻസായിരുന്നു.
