ഇന്ത്യ-പാക് സംഘർഷത്തിൽ ഇന്ത്യ നടത്തിയ ഓപ്പറേഷൻ സിന്ദൂറിൽ പുതിയ വാദവുമായി അമേരിക്കൻ പ്രസിഡൻ്റ് ഡോണാൾഡ് ട്രംപ്. ഇന്ത്യയും പാകിസ്ഥാനും തമ്മിൽ വെടിനിർത്തൽ കരാർ തൻ്റെ മധ്യസ്ഥതയിലായിരുന്നുവെന്ന അവകാശവാദം ട്രംപ് ആവർത്തിക്കുന്നതിനെയാണ് പുതിയ കൂട്ടിച്ചേർക്കൽ. സംഘർഷത്തിൽ ഏഴ് ജെറ്റുകൾ വെടിവച്ചിട്ടതായാണ് ട്രംപ് ഇപ്രാവശ്യം ഉന്നയിക്കുന്നത്. കഴിഞ്ഞ മാസം പറഞ്ഞത് സംഘർഷത്തിൽ അഞ്ച് വിമാനങ്ങൾ തകർന്നുവെന്നായിരുന്നു.
അതേസമയം, കഴിഞ്ഞ തവണത്തെപ്പോലെ, ഇത്തവണയും ഏത് രാജ്യമാണ് എത്ര ജെറ്റുകൾ വെടിവെച്ചിട്ടതെന്ന് ട്രംപ് വ്യക്തമാക്കിയിട്ടില്ല. പാകിസ്ഥാനിലെയും പാകിസ്ഥാൻ അധിനിവേശ കശ്മീരിലെയും തീവ്രവാദ അടിസ്ഥാന സൗകര്യങ്ങൾ ലക്ഷ്യമിട്ടുള്ള സൈനിക നടപടിയായ ഓപ്പറേഷൻ സിന്ദൂരിനിടെ ഇന്ത്യ അഞ്ച് പാകിസ്ഥാൻ യുദ്ധവിമാനങ്ങൾ വെടിവച്ചിട്ടതായി എയർ ചീഫ് മാർഷൽ അമർ പ്രീത് സിംഗ് സ്ഥിരീകരിച്ചതിന് ആഴ്ചകൾക്ക് ശേഷമാണ് ട്രംപിൻ്റെ പുതിയ വെളിപ്പെടുത്തൽ.
അതിർത്തി പങ്കിടുന്ന രണ്ട് രാജ്യങ്ങൾ തമ്മിലുള്ള സംഘർഷത്തിൽ വ്യാപാരവുമായി ബന്ധിപ്പിച്ചാണ് വെടിനിർത്തൽ പരിഹരിച്ചത് എന്നാണ് ട്രംപ് പറയുന്നത്. യുദ്ധം പരിഹരിക്കാൻ ഇരു രാജ്യങ്ങൾക്കും 24 മണിക്കൂർ സമയം നൽകിയതായും, അവർ സംഘർഷം അവസാനിപ്പിച്ചില്ലെങ്കിൽ അമേരിക്ക വ്യാപാരം നിർത്തിവയ്ക്കുമെന്ന് ഭീഷണിപ്പെടുത്തിയതായും അദ്ദേഹം പറഞ്ഞു. ഇന്ത്യ-പാക് സംഘർഷത്തെക്കുറിച്ചുള്ള ട്രംപിന്റെ പരാമർശങ്ങൾ നിരവധി തവണ ആവർത്തിക്കുന്നതിനിടെയാണ് പുതിയ അവകാശവാദം.
ഏപ്രിൽ 22 ന് ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തിൽ 26 പൗരന്മാർ കൊല്ലപ്പെട്ടതിന് മറുപടിയായാണ് ഇന്ത്യ ഓപ്പറേഷൻ സിന്ദൂർ ആരംഭിച്ചത്. പാകിസ്ഥാൻ ഡയറക്ടർ ജനറൽ ഓഫ് മിലിട്ടറി ഓപ്പറേഷൻസ് (ഡിജിഎംഒ) ഇന്ത്യൻ എതിരാളിയെ വിളിച്ചതിനെ തുടർന്നാണ് വെടിനിർത്തൽ കരാറിലെത്തിയതെന്ന് അവകാശപ്പെട്ടുകൊണ്ട് ഇന്ത്യ പലതവണ ട്രംപിന്റെ മധ്യസ്ഥ അവകാശവാദം നിരസിച്ചിട്ടുണ്ട്. മൂന്നാം കക്ഷി ഇടപെടലില്ലാതെ ഉഭയകക്ഷി അടിസ്ഥാനത്തിലാണ് കരാറിലെത്തിയതെന്നാണ് ഇന്ത്യയുടെ വാദം.
