വാഷിംഗ്ടൺ: ആർട്ടിഫിഷ്യൽ ഇന്‍റലിജൻസ് (എഐ) സംബന്ധിച്ച സംസ്ഥാന നിയമങ്ങളെ ചോദ്യം ചെയ്യാനും റദ്ദാക്കാനും ഫെഡറൽ സർക്കാരിന് അധികാരം നൽകുന്ന ഒരു എക്‌സിക്യൂട്ടീവ് ഓർഡർ പുറത്തിറക്കാൻ യുഎസ് പ്രസിഡന്‍റ് ഡോണൾഡ് ട്രംപ് ആലോചിക്കുന്നതായി റിപ്പോര്‍ട്ട്. എഐ കമ്പനികൾക്ക് കംപ്ലയൻസ് ബുദ്ധിമുട്ടാക്കുന്ന, സംസ്ഥാന തലത്തിലുള്ള വിവിധ നിയമങ്ങൾക്കെതിരെ പ്രതികരിക്കാൻ ഭരണകൂടം സ്വീകരിക്കാൻ സാധ്യതയുള്ള നിയമപരവും സാമ്പത്തികപരവുമായ നടപടികൾ കരടിൽ എടുത്തുപറയുന്നുണ്ട്. ഓരോ സംസ്ഥാനവും വ്യത്യസ്ത എഐ നിയമങ്ങൾ നടപ്പാക്കുന്നത് ഒരു ദുരന്തമായിരിക്കും എന്നും ട്രംപ് മുന്നറിയിപ്പ് നൽകിയിരുന്നു.
സംസ്ഥാനങ്ങളുടെ എഐ നിയമങ്ങൾ അന്തർസംസ്ഥാന വാണിജ്യത്തിനോ നിലവിലുള്ള ഫെഡറൽ നിയമങ്ങൾക്കോ വിരുദ്ധമാണെങ്കിൽ ആ സംസ്ഥാനങ്ങൾക്കെതിരെ നിയമനടപടി സ്വീകരിക്കാൻ ഫെഡറൽ ഏജൻസികളെ അനുവദിക്കാൻ കരട് നിർദ്ദേശിക്കുന്നു. കർശനമായ എഐ ആവശ്യകതകളുള്ള സംസ്ഥാനങ്ങൾക്കുള്ള ബ്രോഡ്ബാൻഡ് ഫണ്ടുകൾ പിടിച്ചുവെക്കാനും വാഷിംഗ്ടണിന് ഇത് അധികാരം നൽകും. എന്നാൽ, ഒരു ഉത്തരവ് ഔദ്യോഗികമായി പ്രഖ്യാപിക്കുന്നതുവരെ ഏതൊരു ചർച്ചയും ഊഹക്കച്ചവടമായി തുടരുമെന്ന് വൈറ്റ് ഹൗസ് ഉദ്യോഗസ്ഥൻ റോയിട്ടേഴ്സിനോട് പറഞ്ഞു. സംസ്ഥാനങ്ങളിലെ എഐ നിയമങ്ങളെ എതിർക്കുന്നതിനായി എഐ വ്യവഹാര ടാസ്‌ക് ഫോഴ്‌സ് രൂപീകരിക്കാൻ യുഎസ് അറ്റോർണി ജനറൽ പാം ബോണ്ടിക്ക് നിർദ്ദേശം നൽകിയിട്ടുണ്ട്.
കാലിഫോർണിയയുടെ പുതിയ എഐ നിയമം സങ്കീർണ്ണമാണെന്ന് വിമർശിക്കുന്ന കരട്, അൽഗോരിതമിക് പക്ഷപാതം തടയാൻ ലക്ഷ്യമിട്ടുള്ള കൊളറാഡോ നിയമം കമ്പനികളെ അവരുടെ സിസ്റ്റങ്ങൾ ക്രമീകരിക്കാൻ പ്രേരിപ്പിക്കുമെന്നും പറയുന്നു. അതേസമയം, എഐ നിയന്ത്രിക്കുന്ന സംസ്ഥാനങ്ങൾക്കുള്ള ബ്രോഡ്ബാൻഡ് ഫണ്ടുകൾ വെട്ടിക്കുറയ്ക്കാനുള്ള ഒരു നിർദ്ദേശത്തിനെതിരെ സെനറ്റിൽ നടന്ന വോട്ടെടുപ്പിൽ 99-1 എന്ന വലിയ ഭൂരിപക്ഷത്തിൽ പരാജയപ്പെട്ടിരുന്നു.
