വാഷിംഗ്ടൺ: വിദേശത്ത് നിർമ്മിച്ച വാഹനങ്ങൾക്ക് 25 ശതമാനം തീരുവ ചുമത്തിയതിന് ശേഷം കാർ നിർമ്മാതാക്കൾ വില വർദ്ധിപ്പിച്ചാലും ഒട്ടും കാര്യമാക്കാനില്ലെന്ന് യുഎസ് പ്രസിഡന്‍റ് ഡോണൾഡ് ട്രംപ്. വാഹനങ്ങൾ ഇറക്കുമതി ചെയ്യുന്ന ബിസിനസ്സുകളിൽ ട്രംപിന്‍റെ തീരുവകൾ യുഎസിലെ പ്രധാന കാർ ഉൽപ്പാദനം താൽക്കാലികമായി നിർത്തുന്നതിനും വില വർദ്ധിപ്പിക്കുന്നതിനും സഖ്യകക്ഷികളുമായുള്ള ബന്ധം വഷളാക്കുന്നതിനും കാരണമാകുമെന്ന് ചില വിശകലന വിദഗ്ധർ മുന്നറിയിപ്പ് നൽകിയിട്ടുണ്ട്.
എന്നാൽ, ശനിയാഴ്ച എൻബിസി ന്യൂസിനോട് സംസാരിച്ച യുഎസ് പ്രസിഡന്‍റ്, വിദേശ കാർ നിർമ്മാതാക്കൾ വില വർദ്ധിപ്പിക്കുമെന്ന് താൻ പ്രതീക്ഷിക്കുന്നതായി പറഞ്ഞു. കാരണം ആളുകൾ അമേരിക്കയിൽ നിർമ്മിച്ച കാറുകൾ വാങ്ങാൻ പോകുന്നു എന്നാണ് അതിനർത്ഥം. ഞങ്ങൾക്ക് ധാരാളം കാറുകളുണ്ടെന്നും ട്രംപ് കൂട്ടിച്ചേര്‍ത്തു. ഏപ്രിൽ രണ്ട് മുതൽ വിദേശത്ത് നിന്ന് യുഎസിലേക്ക് വരുന്ന കാറുകൾക്കും കാർ ഭാഗങ്ങൾക്കും 25 ശതമാനം ഇറക്കുമതി നികുതി ചുമത്തുന്നതായി ട്രംപ് ബുധനാഴ്ച പ്രഖ്യാപിച്ചിരുന്നു. വാഹനങ്ങൾ ഇറക്കുമതി ചെയ്യുന്ന ബിസിനസ്സുകളിൽ ഏപ്രിൽ 3-നും ഭാഗങ്ങൾക്ക് മെയ് മാസത്തിലോ അതിനുശേഷമോ നികുതി ചുമത്താനാണ് പ്രതീക്ഷിക്കുന്നത്.
അമേരിക്കയിൽ നിങ്ങളുടെ കാർ നിർമ്മിക്കുകയാണെങ്കിൽ, നിങ്ങൾക്ക് ധാരാളം പണം സമ്പാദിക്കാൻ കഴിയും എന്നതാണ് കാര്‍ നിര്‍മ്മാണ കമ്പനികൾക്കുള്ള സന്ദശമെന്ന് ട്രംപ് പറഞ്ഞു. നിങ്ങൾ അങ്ങനെ ചെയ്യുന്നില്ലെങ്കിൽ, നിങ്ങൾക്ക് ഒരുപക്ഷേ അധികം വൈകാതെ അമേരിക്കയിലേക്ക് വരേണ്ടി വരും. കാരണം അമേരിക്കയിൽ നിങ്ങളുടെ കാർ നിർമ്മിക്കുകയാണെങ്കിൽ, തീരുവയില്ല – ട്രംപ് കൂട്ടിച്ചേര്‍ത്തു.
