സ്കോട്ട്ലൻഡ്: യുക്രൈനിലെ യുദ്ധം അവസാനിപ്പിക്കുന്നതുമായി ബന്ധപ്പെട്ട് റഷ്യൻ പ്രസിഡന്റ് വ്ലാഡിമിർ പുടിനിൽ തനിക്ക് കടുത്ത നിരാശയുണ്ടെന്ന് യുഎസ് പ്രസിഡന്റ് ഡോണൾഡ് ട്രംപ്. റഷ്യക്ക് താൻ നൽകിയ 50 ദിവസത്തെ സമയപരിധി കുറയ്ക്കുമെന്നും അദ്ദേഹം അറിയിച്ചു. ബ്രിട്ടീഷ് പ്രധാനമന്ത്രി കിയർ സ്റ്റാർമറുമായുള്ള കൂടിക്കാഴ്ചയ്ക്ക് മുന്നോടിയായി സ്കോട്ട്ലൻഡിൽ വെച്ച് മാധ്യമപ്രവർത്തകരോട് സംസാരിക്കുകയായിരുന്നു ട്രംപ്.
പ്രസിഡന്റ് പുടിനിൽ എനിക്ക് നിരാശയുണ്ട്, അദ്ദേഹത്തിൽ അതിയായ നിരാശയുണ്ട് – ട്രംപ് പറഞ്ഞു. “ഞാൻ അദ്ദേഹത്തിന് നൽകിയ 50 ദിവസത്തെ സമയപരിധി കുറഞ്ഞ ദിവസങ്ങളിലേക്ക് ചുരുക്കുമെന്നും ട്രംപ് വ്യക്തമാക്കി.
പുടിനുമായി താൻ പലതവണ സംസാരിച്ചിട്ടുണ്ടെന്നും, ചർച്ചകൾ നടത്തിയിട്ടുണ്ടെന്നും ട്രംപ് കൂട്ടിച്ചേർത്തു. രണ്ടാഴ്ച മുമ്പാണ് യുക്രെയ്നുമായി ഒരു ഒത്തുതീർപ്പിലെത്താൻ 50 ദിവസത്തെ സമയം പുടിന് താൻ അനുവദിച്ചതെന്ന് യുഎസ് പ്രസിഡന്റ് പ്രഖ്യാപിച്ചത്. അല്ലാത്തപക്ഷം കടുത്ത പ്രത്യാഘാതങ്ങൾ നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകിയിരുന്നു.
50 ദിവസത്തിനുള്ളിൽ ഒരു കരാറിലെത്തിയില്ലെങ്കിൽ ഞങ്ങൾ വളരെ കടുത്ത താരിഫുകൾ ചുമത്തും എന്ന് ട്രംപ് അന്ന് പറഞ്ഞിരുന്നു. ഏകദേശം 100 ശതമാനം വരുന്ന താരിഫുകൾ, അതിനെ നിങ്ങൾ സെക്കൻഡറി താരിഫുകൾ എന്ന് വിളിക്കും. അതിനർത്ഥം എന്താണെന്ന് നിങ്ങൾക്കറിയാം. എന്നാൽ, പുതിയ സമയപരിധി എത്രയാണെന്ന് ട്രംപ് വ്യക്തമാക്കിയിട്ടില്ല.
