വാഷിംഗ്ടൺ: വെനസ്വേലയിലെ മയക്കുമരുന്ന് കടത്ത് സംഘങ്ങൾക്കെതിരെ അമേരിക്ക പുതിയ നടപടികൾക്ക് ഒരുങ്ങുന്നതായി പ്രസിഡന്‍റ് ഡോണൾഡ് ട്രംപ് സൂചന നൽകി. താങ്ക്‌സ്‌ഗിവിംഗ് ദിനത്തിൽ സൈനികരുമായി നടത്തിയ ഫോൺ സംഭാഷണത്തിലാണ് അദ്ദേഹം ഇക്കാര്യം വെളിപ്പെടുത്തിയത്. മയക്കുമരുന്ന് കടത്ത് തടയുന്നതിനായി കരമാർഗ്ഗമുള്ള ആക്രമണങ്ങൾ വളരെ പെട്ടെന്ന് ആരംഭിക്കുമെന്നും അദ്ദേഹം പറഞ്ഞു. കഴിഞ്ഞ ആഴ്ചകളിൽ വെനസ്വേലൻ മയക്കുമരുന്ന് കടത്തുകാരെ തടയുന്നതിൽ സൈനികർ മികച്ച പ്രവർത്തനമാണ് നടത്തിയതെന്ന് ട്രംപ് അഭിപ്രായപ്പെട്ടിരുന്നു
കടൽ വഴിയുള്ള കടത്ത് ഇപ്പോൾ കുറഞ്ഞിട്ടുണ്ട്. അതിനാൽ ഇനി കരമാർഗ്ഗമുള്ള കടത്ത് തടയുന്നതിലേക്കാണ് നീങ്ങുന്നതെന്നും, അത് കൂടുതൽ എളുപ്പമാണെന്നും അദ്ദേഹം വ്യക്തമാക്കി. ഞങ്ങളുടെ രാജ്യത്തേക്ക് വിഷം അയക്കുന്നത് നിർത്തുക എന്ന് അദ്ദേഹം മയക്കുമരുന്ന് കടത്തുകാർക്ക് ശക്തമായ മുന്നറിയിപ്പും നൽകി. വെനസ്വേലൻ പ്രസിഡന്‍റ് നിക്കോളാസ് മഡുറോയെയും അദ്ദേഹത്തിന്‍റെ സർക്കാരിലെ സഖ്യകക്ഷികളെയും ട്രംപ് ഈയിടെ വിദേശ ഭീകര സംഘടനയിലെ അംഗങ്ങളായി പ്രഖ്യാപിച്ചിരുന്നു. “കാർട്ടൽ ഡി ലോസ് സോൾസ്” എന്ന പേരിൽ അറിയപ്പെടുന്ന അഴിമതിക്കാരായ സർക്കാർ ഉദ്യോഗസ്ഥരുടെ സംഘത്തെയാണ് ഇത്തരത്തിൽ പ്രഖ്യാപിച്ചത്.
ഇത് മഡുറോയുടെ ആസ്തികൾക്കും അടിസ്ഥാന സൗകര്യങ്ങൾക്കും എതിരെ പുതിയ ഉപരോധങ്ങൾ ഏർപ്പെടുത്താൻ ട്രംപിന് അധികാരം നൽകും. ഈ മാസം ആദ്യം മേഖലയിൽ യുഎസ് സൈനിക ശക്തി പ്രകടിപ്പിക്കുകയും ഉന്നതതല യോഗങ്ങൾ ചേരുകയും ചെയ്തിരുന്നു. ഇതിന് പിന്നാലെയാണ് വെനസ്വേലയിൽ ശക്തമായ നടപടികൾ സ്വീകരിക്കാൻ ട്രംപ് തീരുമാനിച്ചതെന്നാണ് റിപ്പോർട്ടുകൾ സൂചിപ്പിക്കുന്നത്. എന്നാൽ, ഭീകര സംഘടനയായി പ്രഖ്യാപിച്ചതുകൊണ്ട് മാത്രം മാരകമായ സൈനികാക്രമണം നടത്താൻ നിയമപരമായ അനുമതി ലഭിക്കില്ലെന്ന് നിയമവിദഗ്ധർ ചൂണ്ടിക്കാട്ടുന്നു.
