വാഷിംഗ്ടൺ: വെനസ്വേലൻ ഭരണമാറ്റം ലക്ഷ്യമിട്ടുള്ള പ്രസിഡന്റ് ഡോണൾഡ് ട്രംപിന്റെ നീക്കങ്ങൾ തന്ത്രപരവും രാഷ്ട്രീയപരവും നിയമപരവുമായ കുഴപ്പങ്ങളിലേക്ക് വഴുതി വീഴാൻ സാധ്യതയുണ്ടെന്ന് റിപ്പോർട്ട്. തന്റെ നിയന്ത്രണത്തിൽ നിന്ന് വഴുതിപ്പോകുന്ന ഈ വെനസ്വേലൻ പ്രതിസന്ധിയിൽ അടുത്ത നടപടികൾ നിർണ്ണയിക്കുന്നതിനായി ട്രംപ് തിങ്കളാഴ്ച വൈകുന്നേരം ഉന്നത ദേശീയ സുരക്ഷാ ഉദ്യോഗസ്ഥരെയും സഹായികളെയും ഓവൽ ഓഫീസിലെ യോഗത്തിനായി വിളിച്ചുചേർത്തു.
ചർച്ചകൾക്ക് മുന്നോടിയായി, വെനസ്വേലൻ പ്രസിഡൻ്റ് നിക്കോളാസ് മാഡുറോ ട്രംപിൻ്റെ ശൈലിയിലുള്ള ഒരു പൊതു റാലിയിൽ തൻ്റെ അനുയായികൾക്ക് മുന്നിൽ നൃത്തം ചെയ്യുകയും വെല്ലുവിളിക്കുകയും ചെയ്തിരുന്നു. യുഎസ് ആവശ്യങ്ങൾ അംഗീകരിച്ച് രാജ്യം വിട്ടുവെന്ന മുൻ അഭ്യൂഹങ്ങൾ ഇതോടെ തകർന്നു. അടിമകളുടെ സമാധാനം ഞങ്ങൾ ആഗ്രഹിക്കുന്നില്ല, കോളനികളുടെ സമാധാനവും ഞങ്ങൾ ആഗ്രഹിക്കുന്നില്ല എന്ന് മഡുറോ പറഞ്ഞു.
കരീബിയൻ കടലിൽ മയക്കുമരുന്ന് കടത്തുകാരുടേതെന്ന് ആരോപിക്കപ്പെടുന്ന ബോട്ടിൽ നടന്ന തുടർ ആക്രമണത്തിൽ രക്ഷപ്പെട്ടവരെ കൊലപ്പെടുത്തി എന്ന വിവാദം ശമിപ്പിക്കാൻ വൈറ്റ് ഹൗസിന് കഴിയാത്തതിനാൽ ട്രംപിൻ്റെ ആഭ്യന്തര രാഷ്ട്രീയ അടിത്തറ ദുർബലമാകുകയാണ്. ട്രംപിന്റെ ഡെമോക്രാറ്റിക് വിമർശകർ ഇത് ഒരു യുദ്ധക്കുറ്റം ആകാൻ സാധ്യതയുണ്ടെന്ന് മുന്നറിയിപ്പ് നൽകുന്നു. ശക്തരായ പല റിപ്പബ്ലിക്കൻ നേതാക്കളും ഈ വിഷയത്തിൽ ഞെട്ടൽ രേഖപ്പെടുത്തുകയും ഭരണകൂടത്തിനെതിരെ കർശനമായ അന്വേഷണം നടത്താൻ തയ്യാറാണെന്ന് സൂചന നൽകുകയും ചെയ്യുന്നുണ്ട്.
