ഡോണാൾഡ് ട്രംപിന്റെ 2024-ലെ പ്രസിഡന്‍റ് തെരഞ്ഞെടുപ്പ് പ്രചാരണത്തിൽ, അമേരിക്കൻ കുടുംബങ്ങൾക്ക് താങ്ങാനാവുന്ന വില നിലനിർത്തുമെന്നും പണപ്പെരുപ്പം നിയന്ത്രിക്കുമെന്നും അദ്ദേഹം ആവർത്തിച്ച് വാഗ്ദാനം ചെയ്തിരുന്നു. “ഞാൻ വിജയിച്ചാൽ, അധികാരമേറ്റ ആദ്യ ദിവസം മുതൽ ഞാൻ വില കുറയ്ക്കും,” 2024 ഓഗസ്റ്റിലെ ഒരു റാലിയിൽ അദ്ദേഹം പ്രഖ്യാപിച്ചു. “അമേരിക്കയെ വീണ്ടും താങ്ങാനാവുന്നതാക്കും” എന്നത് ട്രംപിന്റെ പ്രധാന തെരഞ്ഞെടുപ്പ് വാഗ്ദാനങ്ങളിൽ ഒന്നായിരുന്നു. എന്നാൽ, അദ്ദേഹത്തിന്റെ നയങ്ങൾ അമേരിക്കയെ കൂടുതൽ അപ്രാപ്യമാക്കുന്ന നിലയിലേക്ക് എത്തിച്ചിരിക്കുന്നു.
വർധിച്ചുവരുന്ന വിലക്കയറ്റം
ട്രംപ് രണ്ടാമതും പ്രസിഡന്റായി അധികാരമേറ്റതിന് ശേഷം പലചരക്ക് സാധനങ്ങൾ, വൈദ്യുതി തുടങ്ങിയ പ്രധാന ഗാർഹിക ചെലവുകൾ വർദ്ധിച്ചുവെന്നും, അത് ദശലക്ഷക്കണക്കിന് അമേരിക്കക്കാർക്ക് സാമ്പത്തിക ബുദ്ധിമുട്ടുകൾ ഉണ്ടാക്കിയെന്നുമാണ് സാമ്പത്തിക വിദഗ്ദ്ധരുടെ വിശകലനങ്ങളും സാമ്പത്തിക ഡാറ്റയും സൂചിപ്പിക്കുന്നത്. ഇറക്കുമതി ചെയ്യുന്ന ഉൽപ്പന്നങ്ങൾക്ക് അധിക നികുതി ചുമത്തുന്ന ട്രംപിന്റെ നയങ്ങളും, ജൂലൈയിൽ നിയമമായി മാറിയ “വൺ ബിഗ് ബ്യൂട്ടിഫുൾ ബിൽ ആക്റ്റ്” എന്ന സമഗ്ര നികുതി-ചെലവ് പാക്കേജും ഈ വിലക്കയറ്റത്തിന് കാരണമായതായി സാമ്പത്തിക വിദഗ്ദ്ധർ ചൂണ്ടിക്കാട്ടുന്നു.
“ഡി മിനിമസ്” നിയമം റദ്ദാക്കിയത് വില വർദ്ധിപ്പിക്കുന്നു
അമേരിക്കൻ ഉപഭോക്താക്കൾക്ക് 800 ഡോളർ വരെയുള്ള സാധനങ്ങൾ താരിഫ്, തീരുവ, ഫീസ് എന്നിവയില്ലാതെ ഇറക്കുമതി ചെയ്യാൻ അനുവദിച്ചിരുന്ന “ഡി മിനിമസ്” (de minimis) നിയമം ട്രംപ് ഭരണകൂടം റദ്ദാക്കിയതിനെതിരെ സാമ്പത്തിക വിദഗ്ദ്ധരും വ്യാപാര രംഗത്തെ വിദഗ്ദ്ധരും മുന്നറിയിപ്പ് നൽകുന്നുണ്ട്. ഇത് കുറഞ്ഞ വിലയിലുള്ള സാധനങ്ങൾ ഓൺലൈനായി വാങ്ങുന്ന ഉപഭോക്താക്കൾക്ക് വില വർധനവിന് കാരണമാവുകയും ചില ഉൽപ്പന്നങ്ങളുടെ ലഭ്യത കുറയ്ക്കുകയും ചെയ്യും. ട്രംപിന്റെ ഈ നീക്കത്തെ തുടർന്ന് ഓഗസ്റ്റ് 25 മുതൽ യു.എസിലേക്കുള്ള തപാൽ കയറ്റുമതി ഇന്ത്യ പോസ്റ്റ് നിർത്തിവെച്ചു. ട്രംപിന്റെ തീരുമാനത്തിന് ശേഷം കയറ്റുമതി നിർത്തിയ 25-ഓളം രാജ്യങ്ങളിലെ കാരിയറുകളിൽ ഒന്നാണ് ഇന്ത്യ പോസ്റ്റ്. ഈ രാജ്യങ്ങളിൽ നിന്നുള്ള വിൽപ്പനക്കാർ യു.എസ്. ഉപഭോക്താക്കൾക്ക് സാധനങ്ങൾ എത്തിക്കാൻ പുതിയ കാരിയറുകളെ തേടുന്നതിനാൽ ഉൽപ്പന്നങ്ങൾക്ക് വില വർധിക്കാൻ സാധ്യതയുണ്ട്.
